ازاى تلبسى البلوفر فى الشتا ؟

معظمنا بنستني الشتا ييجى بالرغم من الجو الساقعه والبرد والمطر الا انه الشتا له ميزة كبيرة جدا عن باقى فصول السنة و هى ” شياكة لبس الشتا ” ، فصل الشتا بيرتبط دايما بموضة الملابس الاشيك و الالوان الاهدأ ، و الاحذية الشيك جدا اللى كلنا بنستنى الشتا ييجى علشان نستمتع بشكلها. فى المقالة دى هنتكلم عن واحدة من اهم قطع الملابس فى الشتا و اللى مسيطرة على موضة شتا 2016 بشكل كبير و كمان  مبنستغناش عنها كلنا و هى ” البلوفر” .. تعالوا نشوف موضة البلوفر في شتا 2016 وستيلاته المختلفة.

هنا هنعرضلك اهم 5 نصائح تخليكى تعرفى ازاى تلبسى البلوفر فى الشتا و يكون شكله حلو و انيق:

1 . البلوفر اللى لونه غامق دايما شيك و بيليق على حاجات كتير سواء قمصان او بنطلونات و بيتناسب مع اغلب الاوقات فى اليوم ، وقطع الاكسسوارات المختلفة من سلاسل او اساور و خواتم بتليق عليه بأكتر من لون ،و بتزود من أناقته و بتخلى شكله حلو جدا . أحرصى دايما على وجود بلوفر او اتنين الوانهم غامقة فى دولابك ، الوان زى الاسود او الكحلى او البنى أو النبيتي.

2. البلوفر اللى لونه فاتح زى الوان ” الروز ، الابيض، اللبنى، الاوف وايت ، الأصفر, او البمبى بدرجاته الفاتحة” بتناسب النهار اكتر ، و زى البلوفرات صاحبة الالوان الغامقة ممكن تضيفلها قطعة اكسسوار او اكتر من نفس اللون او من درجات الوان اغمق علشان تزود من شياكة البلوفر .

3. لو عندك بلوفر سادة و مابتلبيسيهوش علشان فاكرة شكله ممل او مش حلو ، ممكن تغيرى من شكل البلوفر بأنك تضيفيله بروش او حبات لؤلؤ موزعة بشكل عشوائى عليه  او تلبسى تحته بلوزة او قميص اطول منه شوية ، وممكن تغيرى شكله بأنك تلبسى طرحة ملونة بلون مختلف عن لون البلوفر و تضيفي للطقم شنطة او  حذاء من نفس لون الطرحة مع ساعة يد مناسبة مثلا .

4. البلوفرات الطويلة أو الفستان السويتر اتكلمنا عنه قبل كده وقلنا اد ايه انه من أشيك الستايلات اللى ممكن تجربيها فى الشتاء، ممكن تجربى تلبسى بلوفر طويل على حذاء برقبة طويلة ” بوت طويل” من لون يتناسب مع لون البلوفر لو البلوفر بيعدى الركبة أو ممكن تجربى تلبسى تحت البلوفر الطويل جوارب طويلة من نفس لونه على حذاء مناسب .

5. البلوفر اللى ياقته كبيرة واسعة ” Turtle neck ” أو رقبة السلحفة :) موضة ومنتشرة السنة ديه وشكل الرقبة بقي مختلف عن موضة زمان اللي كانت بتبقي ضيقة وماسكة “هاي كول”, شكله بيبقي حلو جدا مع تسريحة شعر و ماكياج مناسبين وكمان بيليق معاه قوي لم الشعر ديل حصان أو كعكة لفوق.