صورى بموبايلك زى المحترفين !
محدش فينا دلوقتى مش معاه موبايل ” سمارت” و فيه كاميرا امامية و خلفية و بإمكانيات عالية جدا واحنا بطبعنا بقينا بنحب قوي التصوير بالموبايل عشان نحافظ علي ذكريات حلوة سواء في مناسبات أو حتي في أيام حياتنا العادية.. بس معظمنا مبيعرفش يستفيد كويس من امكانيات كاميرات موبايله و بناخد بالنا دايما اننا مش عارفين نظبطها كويس او مبنطلعش حلوين فى الصور لما بنتصور فى الموبايل …
هنا هنقولك على 10 نصائح تخليكى تقدرى تتصورى بموبايلك زى المحترفين !
1- استخدمى الفلاش عند الحاجه بس:
كتير مننا على طول يصوروا باستخدام الفلاش لأننا بنبقى فاكرين انه بيخلينا نطلع احلى فى الصور او انه الصور بتبقى منورة اكتر ، و فى الحقيقة ده غلط. استخدمى الفلاش لما يكون ضرورى بس ، يعنى لما تكونى بتصورى فى مكان اضاءته ضعيفة او خافته او ضلمه ، لكن غلط جدا انك تصورى و الفلاش شغال بالنهار او فى مكان الاضاءة فيه كويسة ، لانك هتلاقى وشك طالع محمر جدا او بيلمع فى الصور و كمان ممكن تلاقى عنيكى فيها ” نقط حمراء” ، تقدرى تتجنبى ده بأنك تخلى الفلاش دايما معمول على وضعية ” تلقائى” و على الوضعية دى الموبايل هيشغل الفلاش تلقائيا فى الاماكن اللى بتبقى محتاجة اضاءة زيادة وانتى بتصورى فيها .
2- اتجنبى ايدك تطلع فى الصورة:
اغلبنا ما بيمسكش الموبايل بالطريقة الصح لما بنيجى نصور ، بمعنى انه ممكن مناخدش بالنا انه صباعنا او جزء من ايدينا مثلا طالع فى الصورة لأنه كان مغطى جزء من عدسة الكاميرا واحنا بنصور، خدى بالك دايما من انه ايدك تبقى ماسكة الموبايل من الجنب و انه اصبعك او ايدك مش مغطية الكاميرا، لانه مهما كانت الصورة حلوه ، اما يبان جزء من ايد اللى بيصور الصورة هتبوظ ! وفيه للاسف لحظات حلوة كتير ممكن تبوظ بسبب غلطة بسيطة زي ديه.
3- دورى على الاضاءة:
حاولى يكون المكان اللى بتصورى فيه يكون فيه اضاءة طبيعية ، زى مكان مفتوح بالنهار مثلا اوغرفة اضائتها جيدة ، لو ده مش متوفر وقتها فلاش الموبايل هيعوض الاضاءة الضعيفة. اضاءة الصورة مهمة جدا علشان الصورة تنور و تبان احلى و تفاصيلها تبقى اوضح, كمان دلوقتي في كل الموبيلات تقريبا بقي فيه اوبشن اسمه النيت مود “Night Mode” يعني الوضع الليلي, يفضل إنك تظبطي الموبايل عليه لو هتصوري بالليل.
4- اختارى الجودة الاعلى:
الصورة على الموبايل بعد ما تلقطيها هتبان جودتها عالية، لكن لما تنقليها على الكمبيوتر او لما تحبى تستخدميها على الانترنت ممكن تلاقى جودتها مش عالية كفاية ، قبل التصوير بالموبايل اختارى الجودة الاعلى للصورة ، و ده تقدرى تظبطيه من ” الاعدادات” الخاصة بكاميرا موبايلك ، ممكن الصورة تاخد مساحة اكبر لكن فى المقابل هتكون جودتها اعلى.
5- القطى اكتر من صورة للمنظر الواحد:
حاولى دايما تاخدى اكتر من لقطة للمنظر الواحد خصوصا لو بتصور شئ متحرك او طفل صغير مثلا و صعب انه يثبت فى مكانه ، صورى لقطات سريعة ورا بعض و اختارى الافضل بينهم علشان تبقى هى دى الصورة الاحلى ، تقدرى تنفذى ده من خلال خاصية ” التصوير المتعدد” من اعدادات الكاميرا الخاصة بموبايلك .
6- اختارى الزاويا الصح:
ساعات بنحس اننا مش طالعين حلوين فى الصور مع اننا بنبقى لابسين كويس او عاملين ماكياج مظبوط و حلو ، ده مابيبقاش عيب فى اللبس او الماكياج و لكنه بيبقى لأنك اختارتىى” زاوية التصوير ” غلط ، دايما حاولى تصورى من الزاوية الصح بالذات لو بتاخدى صورة لوشك ، مثلا متصوريش وشك و الموبايل فى مستوى منخفض عنه لانه ده هيبين انفك اكبر و يخلي وشك يبان ماليان ، حاولى تدرسى وشك ك ويس و تختارى الزاوية او الجنب الافضل و تتصورى بيه . شوفي معانا الموضوع ده اتكلمنا فيه قبل كده عن وضعيات التصوير الصح اللي تبينك في اجمل شكل.
7- قربى من اللى بتصوريه:
قربى دايما من اللى بتصوريه سواء شخص او شئ او مكان ، بس اللى اقصده هنا انك تقربي بالموبايل نفسه مش باستخدام ” الزوم” ، لانه الزوم بيقلل من جودة الصورة وتفاصيلها بتضيع وبتطلع النتيجة في الاخر مش حلوة . كل ما تقربى من اللى بتصوريه كل ما تفاصيله بانت اكتر.
8- اختارى خلفية الصورة:
اختارى دايما خلفية حلوة للصورة ، و حاولى تبعدى من انه خلفية الصورة تبقى حيطة او منظر لونه غامق ، ده بيضيق المجال فى الصورة و بيدى احساس بأنها مضغوطة فبتطلع مش حلوة .
9- ثبتى ايدك:
خدى بالك دايما من انه ايدك تبقى ثابتة وانتى بتصورى ، واهم حاجة دايما بصي في الكاميرا بعد ماتصوري عشان تتأكدي إن الصورة طلعت مظبوطة, الصور المهزوزة دايما مش حلوة .
10- نظفى عدسة الكاميرا:
قبل ما تصورى اى صورة ، امسحى كاميرا الموبايل الخلفية والأمامية بمنديل علشان تشيلى اى تراب عليها لانه ممكن يطلع الصورة مش واضحة .
