6 أسباب لتساقط الشعر .. اعرفيهم !
كلنا بنعانى من مشكلة فقدان الشعر وعلى طول بنلاحظ اننا بنفقد جزء منه واحنا بنسرحه او بنفرده او بنحاول نعمل قصة جديدة و حتى اثناء الاستحمام ، وبنحاول نجرب وصفات او علاجات و لكن ممكن تكون ما بتحققش النتيجة اللى احنا مستنيينها، و طول الوقت بنحاول نعرف ايه هى اسباب تساقط الشعر! هنا هنقولك 6 اخطاء شائعة بتساهم فى فقدان الشعر بشكل كبير:
1- المبالغة فى استخدام الشامبو،خصوصا لو كان جاف:
كتير مننا فاكرين انه كل ما استخدمنا كمية شامبو اكبر اثناء غسيل الشعر كل ما شعرنا بقى انضف او رطب اكتر ، لكن فى الحقيقة ده مش صحيح . الشامبو هو عبارة عن مجموعة من المواد الكيميائية و استخدام كمية كبيرة منه بيخلى الشعر جاف و ده بيخليه اضعف وسهل انه يقع اكتر، وده بيزيد فى حالة الشعر الجاف اكتر من الشعر الدهنى او الناعم،علشان كده حاولى تستخدى كمية شامبو مناسبة اثناء غسيل الشعر و ترطبيه باستخدام البلسم او حمامات الكريم .
2- استخدام الامشاط الحادة:
تسريح الشعر بالامشاط البلاستيكية او الحادة بيكسر الشعر و يقصفه ، استخدام امشاط الشعر الخشبية اللى نهاية اسنانها دائرية هو الافضل دايما.
3- تسريح الشعر وهو لسه رطب:
ابدا متسرحيش شعرك وهو لسه رطب او مبلول، ده بيكسر الشعر وبيخليه يتقصف ويبقى اضعف وبالتالي بيقع بكمية اكبر، حاولى تجففي شعرك باستخدام الفوطة الخاصه بيه فى حركة دائرية علشان يتجفف اسرع وتنشطى الدورة الدموية لفروة الرأس .
4- ماتنشفيش شعرك اوى!
فرك الشعر بالفوطة اوى مش هيخليه ينشف اوى ولا ينشف بسرعه ،ولكن حركة تجفيف الشعر العنيفة بتساهم فى انه تقع كمية كبيرة منه، حاولى تفركيه بالراحة و زى ما قلنا فى حركة دائرية.
5- استعمال السيشوار:
متقربيش السيشوار اوى من شعرك، ده بيجفف الشعر من زيوته المرطبة الطبيعية فبتنشف و تبقى عرضه اكتر للتساقط , حولي تخلي السشوار مينشفش الشعر 100% وبعد كده لميه كعكة أو ضفيرة ولما تفكيه هيبقي فيه موجة طبيعية وشكله حلو قوي وطبيعي.
6- المبالغة فى فرد الشعر:
الشعر المفرود بالمكواه شكله حلو طبعا ، بس تكرار فرد الشعر على فترات قريبة بيضعفه جدا و مع الوقت تلاقي شعرك بيقع بكمية كبيرة ، حاولى تعوضى استخدام المكواة بإنك ترطبى شعرك و تغذيه بحمامات الكريم او حمامات من خليط الزيوت الطبيعة زى زيت الزيتون و زيت الصبار .