8 غلطات تدمر ماكياجك َ! تجنبيهم
المكياج اكيد مهم جدا بالنسبة لكل البنات لانه بيأثر على شكلنا و مزاجنا أو نفسيتنا كمان، و مفيش شك انه المكياج الحلو بيدينا ثقة كبيرة فى نفسنا، علشان كده خدى بالك من غلطات المكياج ممكن يدمروا ماكياجك و ادواته ..ويضيعوا كل المجهود اللي بتبذيله عشان شكلك يطلع حلو.
النهرده جيبنلكم غلطات المكياج اللي ممكن نكون بنعملها من غير ناخد بالنا.. خلي بالك ومتعمليهمش!
1- متنسيش تغسلى ايدك:
أول غلطة من غلطات المكياج هي إن البنات ممكن تبدأ وضع مكياج من غير غسل اديها.. قبل ما تبدأى تحطى ماكياجك لازم تتأكدى انك غسلتى ايدك ووشك كمان كويس جدا علشان تتجنبى نقل البكتيريا و الجراثيم من ايدك لوشك وكمان ضرورى انك تمسحى ايدك بين استخدام كل مستحضر تجميل و التانى .
2- خدى بالك من الصلاحية:
كتير مننا بينسوا يتأكدوا من تاريخ انتهاء مستحضرات التجميل، تاريخ الانتهاء مهم جدا لانه المكياج اللى صلاحيته منتهية بالضبط زى الاكل اللى صلاحيته منتهية مضر جدا لصحتك وله تأثير سلبى على بشرتك، اتاكدى دايما انه مكياجك لسه صالح للاستخدام . اتعرفي علي اوقات الصلاحية لانواع المكياج المختلفة من هنا
3- ما تحفظيش المكياج فى اماكن غلط :
غلط جدا انك تحتفظى بمكياجك فى اماكن حرارتها عالية جدا او منخفضة زى التلاجة ، دايما احتفظى بمكياجك فى دولاب الحمام او شنطة مكياج مقفولة بعيد عن الرطوبة او الحرارة .
4- رمى المكياج فى شنطة ايدك !
لما بنبقى مستعجلين واحنا خارجين للشغل او الجامعة بنرمى ادوات المكياج فى شنطة ايدينا وخلاص، دايما حطى المكياج فى جيب صغير فى الشنطة خصوصا لو البودرة او الكونسيلر عشان تتجنبي انه يتكسر.
5- ماتسيبيش المكياج مفتوح:
من اسوأ الغلطات انك تسيبيى ادوات ماكياجك مفتوحة، لانه ده بيخليها متعرضه لانها تجف بسبب الهواء و كمان بتتغطى بالجراثيم.. اهتمى دايما انك تقفلى ادوات ماكياجك بعد ما تخلصى .
6- نضفى الفرش:
لما تغسلى فرش المكياج بين فترة و التانية بيخليها تحتفظ بنعومتها ونظافتها وبتبقى اسهل فى تطبيق المكياج و بيطلع شكله مضبوط و احلى، اغسلى الفرش بالمياة و الصابون مرة كل اسبوعين بانتظام .
ايه هي أنواع فرش المكياج و استخدامتهم ؟
7- ماكياجك ليكى لوحدك !
استخدمى ماكياجك ليكى لوحدك و حاولى متشاركيش مع حد فى نفس الادوات لانه ده بيسهل نقل الامراض الجلدية والجراثيم بسهولة جدا و كمان بيتلف ادوات ماكياجك و يخلى عمرها اقل .
8- متحركيش الماسكارا كتير:
ادخال و اخراج فرشاة الماسكارا مرات كتير فى العلبة ورا بعض بيتلف الفرشة ويسمح بدخول الهوا وده هيسبب الجفاف لرموشك و يخليها تقع اكتفى بانك تدخلى الفرشة و تخرجيها مرة واحدة بس .