أفكار لفساتين الخطوبة
عرايس بنات حوا الجميلات بعد ما جبنالكم موديلات فساتين الافراح قبل كده انهاردة جايبنلكم افكار ممكن تعملوها فى الخطوبة بتاعتكم . الموديلات اللى جايبنها ممكن تلاقى الخامات و القماش بتاعها فى اى محل و تنفذيها عند اى ترزى و تعدلى فيها زى ما انتى عايزة . تعالوا اتفرجوا معانا على افكار لفساتين الخطوبة…
البنات اللى بيحبوا الالوان الازرق بدرجاته و الموف و البنفسجى جايبنلكم موديلات من بيوت ازياء المصممين العالميين ايلى صعب و زهير مراد و ممكن نقلدهم بأبسط الخامات . الفستان الاولانى مصنوع من التل للبطانة و من فوق الزهور و التطريز من الدانتيل اما الفستان التانى لونه افتح و شكله مميز جدا للبنات اللى بيحبوا الزهور اللى طالعة موضة جدا السنة دى فى كل اللبس. اما الفستان التالت فلمحبى الرقة البساطة و الشياكة لونه ازرق و فيه شغل بسيط عند منطقة الصدر بالدانتيل و شكله كلاسيك جدا .
اما للبنات العاشقات للذهبى اللون الملوكى الشيك اللى بيلجأله كثير من البنات فى وقت الخطوبة جايبنلكم الذهبى بدرجاته و منهم الاصفر الفستان الاول مصنوع من التل اللى بيخليه منفوش من تحت و بيزينه تطريز على الجيب بالدانتيل اما التانى فستان على موديل قصة البرنسيس او الاميرة و شكله مميز جدا لانه مصنوع من التل الشفاف المنفوش و التطريز الرائع .الفستان الرابع للبنات اللى بتحب الشغل و التطريز الكثير و هو شبه فستان الفرح بس لونه ذهبى و كمان التطريز بالذهبى الفاتح .اما الفستان الرابع فلونه اصفر و من الدانتيل الملفوف بطريقة جميلة على الجسم .الفستان الاخير بقى مشغول شغل يدوى رائع من اوله لاخرة بالدهبى .
و للبنات الى بيحبوا الاحمر و النبيتى و الفوشيا و البينك الالوان اللى كلها انوثة و جاذبية جايبنلكم المجموعة دى اللى بتختلف ما بين البساطة و التطريز الكثير و خصوصا فى الظهر و منطقة الصدر و اللى بيغلب عليها الطابع المنفوش من الدانتيل و التل .