ايه هو ال BB كريم؟ وايه فرقه عن ال CC كريم؟

بقلمسارة جمال فيمكياج visibility25469

ال BB كريم, أو ال beauty balm كريم, يعني بلسم الجمال, ايه هو بظبط ال BB كريم؟ وامتى وإزاي ممكن نستعمله؟ 

BB كريم معالجة ومعادلة لون البشرة ومش فونداشن أو كريم أساس, ومش بينفع نستعمله مع كريم الاساس لكن يعتبر بديل ليه.. هو ليه 5 مميزات ( مرطب للبشرة, بريمر, واقي من الشمس, كريم أساس, حامي من التجاعيد والشيخوخة). طبعا هو كده بديل لل 5 حاجات ديه اللي ممكن نكون بنحطها علي بشرتنا كل يوم, يعني هيوفر فلوس ووقت, وكمان احساسه اخف ومش إحساس كريم الاساس. طب وايه تأثير الكريم ده؟ تأثيره رائع علي البشرة وبيخلي شكلها نضره ونقية كأنها بشرة طفل.

طيب وايه هو ال CC كريم بقي؟ ده يعتبر تطور لل BB كريم , CC يعني Color Corrector أو تصحيح لون البشرة, من مميزاته انه بيعالج البشرة, بيرطبها, بيحميها من الشمس, وكمان مضاد للشيخوخة.. و بيعالج ويخبي لوعندك مكان فيه احمرار أو التهاب في بشرتك ال CC كريم هو الحل الأمثل عشان يخفي العيوب ديه وكمان لو لون وشك شاحب أو مرهق ال CC كريم بيخليه نضر ومتورد وفيه ماركات زي فلورمار ولوريال بتنزل منه ألوان كل لون  ليه وظيفة مختلفة وبيصحح عيب معين للبشرة زي الكونسلير الألوان كده بظبط, شوفي الألوان ووظيفتها:

1 – البيج بيوحد لون البشرة بشكل عام وبيخفي أي اثر للجروح أو الندبات.

2- البينك أو الخوخي أو البرتقالي: بيدي شكل طبيعي للأماكن الغامقة علي الوش وبيشيل السواد تحت العين و الزرقان اللي بيبقي غالبا بيبقي لون هالات تحت العين. 

3 – الاخضر: بيخفي المناطق الحمرا على الوش زي أثر الحبوب والبقع الحمرا وكمان ده افضل لتغطية حب الشباب.

4- الموف: بيوحد لون البشرة خصوصا لو لونها اصفر أو بهتان وبيدي ضى و حياة للجلد المرهق.

طيب ايه افضل طريقة عشان نحطه علي وشنا؟ اسفنجه؟ فرشة؟ ولا صوابعنا؟

يفضل إنك تستعملي ايديكي ومش الفرشة, عشان توزعي الكريم بشكل ادق والبشرة تشربه أحسن وكمان تنشطي الدورة الدموية وتعملي مساج لبشرتك بصوابعك.

طيب إيه الفرق بين الاتنين؟ الفرق مابينهم بسيط جدا, لو إنتي محتاجة تداري حاجات بسيطة في وشك وعايزة تغطية خفيفه أو عايزة تعالجي حبوب مثلا يبقي علي طول ال CC كريم لانه اخف ومناسب أكتر للبشرة الدهنية, لكن لو حبة تغطية اتقل وعندك هالات تحت العين أو بشرتك جافة أو عادية يبقي اختيارك الأمثل هو ال BB كريم.

شوفي ماركات وأسعار ال BB كريم وال CC كريم

في النهاية حابين نقول إن منتجات الجمال والمكياج مش هتبطل تتقدم وسبب انتشار ال BB وال CC كريم هو دمجهم لاكتر من منتج مع بعض لأن كل البنات دلوقتي محتاجة الحاجة اللي تبسط حياتنا ومش تعقدها وفي الزمن اللي احنا فيه مع ضيق الوقت وحرصنا على جمالنا وبشرتنا الكريمات اللي من النوع ده بيبقي أحسن اختيار