ليه مش بخس ؟ اعرفى اسباب فشل خفض الوزن

بدأنا رجيم؟ يلا عايزين نخس و كلنا ارادة و نشاط و فجأة بعد اسبوع او اتنين الارادة دى بتختفى و بنلاقى نفسنا مش قادرين نكمل ولا بنلتزم بالرجيم و يمكن نكون بنتخن كمان و بنلاقى الدنيا ضلمت قدامنا و بننسى فكرة الرجيم اصلا , بنات حوا عايزاكوا تكونوا فى قمة الرشاقة و الجمال دايما و عشان كده هنتكلم فى الموضوع ده انهارده.تعالوا اعرفوا الاسباب اللى بتأدى للمشكلة دى و فشل خفض الوزن…

1 – تأثير الاخرين :

دى تعتبر من اكبر و اوحش المعوقات اللى ممكن تقابلك و انتى بتعملى دايت لما بتبدأى بتلاقى ناس كثير بتشجعك و ناس كثير برده بتحبطك حاولى تبعدى عنهم و عن تعليقاتهم و انك تقعدى معاهم كثير لو بيعزموا عليكى بأكل ممنوع و حلويات و حاولى تتجنبى انك تخشى فى نقاش معاهم او انك تضحكى على نفسك و تقولى المره دى بس .خلى الناس اللى حواليكى يكونوا فى الفترة دى ليهم نفس هدفك هو الصحة و فقدان الوزن عشان يساعدوكى مش يحبطوكى .

2 – الاكل مش كفاية :

لو مكلتيش كويس او كلتى سعرات حرارية قليلة اوى طبيعى مش هتقدرى تخسى لان الحرمان من اكبر اسباب فشل الرجيم و كمان بيسبب صدمة للجسم عند الجوع و بيخزن دهون اكثر . كمية النشويات و الاكل الصحيحة بتساعد على افراز الهرمونات بطريقة صحية فى جسمك و منهم الغدة الدرقية اللى هى بتنظم الحرق فى الجسم و كمان بيساعدك على الحرق اكثر و فقدان الوزن اسرع و بيخليكى طول حياتك تلتزمى بطريقة اكل صحية من غير حرمان .

3 – قلة الفيتامينات :

سبب مهم كثير مننا مش بيركز فيه هو ان الفيتامينات فى جسمنا اثناء الرجيم ساعات بتقل جدا بسبب قلة الاكل و عدم تنظيمه بطريقة صحية و ده بيخلى جسمك يدور على مصدر الفيتامينات دى و ممكن يجبرك انك تلخبطى فى الاكل بحثا عنها ! عشان كده مينفعش نعمل رجيم من دماغنا و نلتزم بكلام الدكتور لانه عارف جسمك بيحتاج ايه فى الفترة دى اكثر منك .

4 – اكل الرجيم طعمه ممل :

لما نغير نظام اكلنا ن بيتزا و حلويات لخضار و فاكهة اكيد فى الاول هنكون قرفانين و محتاجين نحس بطعم الاكل تانى و عشان كده ممكن فى النص نلخبط فى المرحلة دى لازم نعلم نفسنا ازاى نصبر عشا كده كده حاسة التذوق بتاعتنا هتاخد وقت و تتعود على طعم الاكل الجديد و هتنسى تماما طعم الاكل الغير صحى و مش هتشتهيه اصلا . دورى كمان على النت على وصفات جديدة للرجيم و اللى بتتعمل بطريقة بتخلى طعمها مبتكر و احلى بدل ما كل حاجة تكون مشوية و بس و ملهاش طعم .

5 – التوقعات اللى مش واقعية :

كلنا بنبدأ رجيم و بنكون متخيلين ان احنا هنخس بسرعة جدا اول ما نبطل اكل و بنتفاجىء بعدها باسبوع ان معدل الحرق بتاعنا مش زى ما توقعناه . لازم نرسم لنفسنا توقعات مش خيالية عشان منزعلش و نرجع نلخبط فى الاكل و بلاش نقارن نفسنا بغيرما لان كل واحد و معدل حرقه بيختلف و طالما فى تقدم و مش واقفين مكاننا مش مهم خسينا كيلو فى الاسبوع و لا 4 كيلو و لازم نعرف ان اللى بيخس ببطء عمره ما بيرجع تانى للوزن اللى خسره بسهولة .