ازاى تتجنبى تسلخات تحت الابط بعد السويت ؟!
بنات جوا بيواجهوا مشكلة احيانا بعد عملية ازالة الشعر وهى تسلخات الجلد او الحبوب او التشققات اللى بتسبب نزيف بسيط احنا جايبنلكم نصائح النهاردة بناء على طلبكم ازاى نحاول نقلل من المشكلة دى و خصوصا فى المناطق الحساسة زى تحت الابط تعالى اعرفى معانا ازاى تتجنبى تسلخات تحت الابط بعد السويت..
ليه بيحصل ظهور دم و تسلخات بعد السويت على الجلد؟
عشان فى اغلب الوقت طريقة نزع الشعر بتكون عنيفة على الجلد او بنكون بننزعه مش عكس اتجاه نمو الشعر و كمان الجلد بيكون حساس و جاف و الشعيرات الدموية طبيعى بتكون قريبة جدا من الطبقة الالولى من الجلد فبيحصل النزيف ده .
نصائح لتجنب المشكلة :
1 – بلاش تعملى سويت قبل الدورة الشهرية بايام قليلة عشان الجلد وقتها بيكون حساس جدا و الشعيرات الدموية بتكون ضعيفة و سهلة انها تتسلخ و تسبب كدمات .
2 – اتاكدى انك مش بتاخدى علاج او دوا بيسبب سرعة النزيف ف الجلد .
3 – و انتى بتستخدمى السويت متشيليش الشعر كله مرة واحدة و ابدأى بمناطق صغيرة واحدة واحدة هتاخد وقت اكثر بس هتقلل من الاصابات .
4 – اتاكدى انك عملتى تقشير للجلد قبل السويت بفترة طويلة مش يومها و بلاش تستخدمى فرشاة او ليفة خشنة عشان متسببش حساسية اكثر للجلد .
5 – اتاكدى من انك ماسكة جلدك و شداه اثناء نزع الشعر عشان لو سبتيه مش مشدود هيزود من الالم و الاصابات .
ايه الحجات اللى ممكن تعالج الالم و الاصابات دى ؟
1 – اغسلى الجلد بمياه ساقعة و متستخدميش اى مواد كيماوية او صابون يلهب المنطقة اكثر .
2 – البقدونس يعتبر علاج سحرى للمشكلة و بيقلل من الندبات و الكدمات اطحنى شوية بقدونس و افردى على المنطقة و ممكن تلبسى هدوم ماسكة عشان يفضل فى مكانه و سيبيه 10 دقائق و اغسليه .
3 – الفيتامين سى هيساعد على صحة جلدك و بيقويه و بيمنعه من التشققات و بيكون موجود على شكل حبوب فى الصيدلية او فى الاكل زى الجرجير و البرتقال و اليوسفى و الليمون .
4- احرصى دايما على استخدام مرطب لجلدك عشان كل ما يكون الجلد جاف كل ما يتشقق و ينزف اكثر .
5 – استخدمى كيس فيه تلج و اضغطى على المنطقة المصابة بعد السويت عشان يهديها .
6 – ممكن تلجأى للدكتور الجلدية لو حاسة ان المشكلة زايدةعن الحد او جلدك بدأ يكون تقرحات مؤلمة عشان تتأكدى ان معندكيش اى عدوة جلدية هى اللى بتسبب التشققات دى.
شوفي كمان وسائل ازالة الشعر الزائد وازاي تختاري اللي يناسبك
