أنواع وأشكال الكورسيه ومشدات الجسم
كثير من بنات حوا بيلجأوا للكورسيه عشان يخفوا بعض الوزن الزائد فى اللبس او لو فى مناسبة ومحتاجين يلبسوا حاجة سواريه وعايزين يبانوا في احلي شكل.. زمان في فترة الخمسينات والستينات اشتهرت قوي الكورسيهات الستان والحديد واللي كانت بتشد الجسم وترسمه…
دلوقتي رجعت موضة تاني بس بنشوفها أكتر في الملابس الداخليه “اللانجري” وطلعت أنواع جديدة من مشدات الجسم اسمها “Spandex” سباندكس وديه دلوقتي اللي كل المشاهير والممثلين تقريبا بيلبسهوا تحت الهدوم وبتخلي جسمهم بالشكل المنحوت اللي بنشوفه ده…
هتلاقوا ال spandex بيتباع في محلات اللانجري ولما نيجي ننزل هنلاقي منه انواع كثير جدا وعشان متحتاروش ايه المناسب لكم انهاردة جايبنلكم معلومات عن انواعهم المختلفة . تعالوا اقرأوا فى السطور اللى جاية عن أنواع وأشكال الكورسيه ومشدات الجسم..
ايه الحجات اللى لازم اعرفها قبل ما انزل اشترى؟
- لازم تعرفى ان الكورسيه اللى قماشته خفيفه هيضبط جسمك شوية لكن اللى قماشته تقيلة ممكن يخفى عيوب جسمك و يشكله كمان.
- ما تشتريش كورسيه يكون ضيق بزيادة و يخليكى متعرفيش تتنفسى لازم تكونى مستريحة عشان كمان ميتقلعش من مكانه .
- لازم تعرفى مقاساتك قبل ما تنزلى مقاس الصدر و الوسط و الفخذين عشان تحددى ايه المقاس المناسب ليكى و انتى بتقيسى.
- لازم تحددى المنطقة اللى عايزة تداريها بالضبط عشان متشتريش اى نوع و خلاص .
- حاولى تختارى اللون المناسب للبس اللى هتستعمليه عشان ميبنش من تحت اللبس .
طيب اي هى انواع الكورسيه او مشدات الجسم ؟
1 – الكورسيه الكامل :
النوع ده بيغطى جسمك كله و بيدى تغطية من متوسطة لعالية حسب قماشته كل ما تكون اتخن كل ما يكون اقوى و بيغطى من الصدر لحد الارداف و مناسب جدا لفساتين السواريه و بيكون فيه مكان يخليكى ممكن تستغنى عن حمالة الصدر لو عايزة و بييجى منه على شكل فستان زى الصورة او بيكون اللى تحت شورت مش فستان .
2 – التانك :
مناسب جدا لما تكونى لابسة حاجة ماسكة شوية من فوق و مناسب لفصل الشتاء بيشتغل على منطقة الوسط و الصدر و البطن و بيديكى مساحة مناسبة تلبسى اى شكل حمالة صدر انتى عايزاه و بيرفع من شكل الصدر و بيخلى شكله مظبوط و مشدود .
3 – الشورت القصير :
دول اكثر نوع ممكن تستعمليه كل يوم و سهل فى ارتداءه ممكن يتلبس تحت البنطلون و الجيب و بيكون ليه اشكال و قماشات كتيرة و بيشد منطقة البطن و المؤخرة و بيدارى اى شكل للملابس الداخليه و النوع الاحسن منه اللى بيكون واصل للوسط و عالى لانه بيلم الجسم اكثر.
4 – الشورت الطويل :
النوع ده بيدارى الدهون الللى قوق منطقة البطن لحد الارداف و بيتلبس اكثر تحت الجيب و ليه اشكال كثير و مناسب جدا للاستخدام اليومى و مريح و بيدفى كمان فى الشتاء.
5 – كورسيه الوسط :
النوع ده بيوصل من تحت الصدر لحد البطن و بيدارى دهون المنطق دى و كمان بيساعد فى رفع الصدر و بيديله شكل حلو و ممكن نستعمله للفساتين او البلوزات عشان وسطنا يبان اكثر.
6- كورسيه التتخين:
ديه احدث موضة في عالم الكورسيهات ومناسبة للبنات اللي عايزة تبان اتخن مش ارفع, بيبقي فيه نوع من أنواع السيليكون أوالجيل اللي ممكن تدي حجم اكبر للمؤخرة.
