إزاي تباني اجمل وارفع في الصور ؟
خروجاتنا وحياتنا دلوقتي بقت مخلتفة قوي عن زمان, بقينا نحب نسجل كل احداث حياتنا بالصور, اعياد ميلاد, افراح, مناسبات خاصة, خروجات, حتي في الشغل أو الكلية.. وتلاقي بنات كتير بعد ماتتصور تيجي تشوف الصورة وتقول “يا نهار أبيض أنا إزاي طالعة كده ؟!” ويكون شكلها أو جسمها مش عجبينها في الصورة..
النهرده بنقدملكم شوية نصايح إزاي تباني اجمل وارفع في الصور..
1- صور الوش:
حاولي دايما وإنتي بتتصوري صورة لوشك إن دقنك تبقي ممدودة وتوطيها قدامك, ده هيخلي رقبتك تبان اطول وعيونك تبان اوسع.
كمان صور الوش بتبقي احلي كتير لو اللي بيصورك صورك من فوق, يعني كان اعلي منك, زي كده الصورة اللي علي اليمين احلي.
2- صور الجزء الاعلي من الجسم:
اكبر مشكلة ممكن تخليكي زايدة في الصور 5 ل 10 كيلو مثلا هي الكتاف لانها اعرض جزء من جسمك اللي فوق, لما تقفي قدام الكاميرا بلاش تقفي مواجهه ليها مباشرة بس يفضل إنك تقفي بزواية 45 درجة, وتخلي كتفك في الاول ونزليه سنه صغيرة, شوفي الفرق في الصورة.
3- صور الوقوف:
تاني اعرض جزء من الجسم هو الجناب , عشان كده برضه يفضل إنك متواجهيش الكاميرا بجسمك كله لكن بجنبك هيبقي احلي كتير, وكمان ممكن تعملي وضع زي إنك تتني ركبتك سنه صغيرة لقدام, زي الصورة كده.
جربي برضه إنك تلفي بجسمك بزاوية اكبر , 90 درجة يعني, وترفعي كتفك شوية, وايدك تبقي قدامك.
وممكن بضهرك, وتلفي بجسمك عشان تبصي للكاميرا وتكوني بصة لتحت ودقنك ممدودة زي ماقلنا فوق.
ممكن كمان لو حابة تقفي بوشك في مواجهة الكاميرا بس جربي تحطي ايدك في وسطك وميلي بجسمك, يعني متقفيش مفرودة.
4- صورة الجلوس:
خليكي دايما فاكرة إن اقرب جزء من جسمك للكاميرا هيطلع هو اكبر واكتر جزء متركز عليه, عشان كده لو قاعدة, جربي إنك تطلعي بوشك قدام عشان يبقي هو أكتر حاجة عليها التركيز وجسمك يبان ارفع واحلي.