إزاي نحط الماسكارا صح؟!
الماسكرا تعتبر حاجة مهمة جدا فى المكياج و منقدرش نستغنى عنها لانها بتظهر جمال عنيكى اكثر و ممكن نستعملها لوحدها من غير اى مكياج و هتخلى برده شكلنا جميل و طبيعى و عشان كده لازم نتعلم الطريقة الصحيحة لوضع الماسكرا عشان نخلى اللوك بتاعنا رائع . تعالوا نعرف إزاي نحط الماسكرا صح…
ايه هى خطوات استعمال الماسكرا ؟
1 – اول حاجة لازم نعرفها ان احنا نسيب الماسكرا للاخر و نحط المكياج بتاعنا كله الاول زى كريم الاساس و الاى شادو و الاى لاينر و لو عايزة رموش طويلة و جميلة استخدمى جهاز اللى بيتباع فى محلات التجميل والصيدليات اللى بيتنى الرموش قبل وضع المكياج . lash curler
2 – قبل ما تحطى الماسكرا لازم تنظفى الفرشاة بتاعتها من اى سائل زيادة عن طريق انك تمشيها على طرف العلبة و تمسحى البواقى عشان متعملش كلاكيع على الفرشاة و بالتالى تبان على رموشك .
3 – حاولى تشوفى اكثر مكان مريح و تعرفى تشوفى فيه كويس اذا كان مراية الاوضة او اى مرايا تانية و اسندى كوعك على اى طرابيزة مناسبة تحتك عشان الايد اللى هتحطى بيها الماسكرا متتهزش و اول حاجة هتعمليها تبدأى من جدور الرموش مش الاطراف .
4 – ببطء و حركات ثابتة و هادية مشى الفرشاة من جدور الرموش لحد الاطراف و كررى بحيث انك كل مرة تبدأى من الجدور عشان اللون يبان و رموشك تبان ثقيلة . بعد لما تخلصى و توصلى للون و التقل اللى انتى عايزاه هاتى الفرشاة و مشيها على الاطراف بس بالعرض رايح جاى .
5 – استخدمى مشط صغير مخصص للرموش و سرحى رموشك عشان يبان طولها و تبعدى الرموش اللى لازقة فى بعض و يكون شكلها طبيعى اكثر زى الصورة .
6 – عشان تحطى ماسكرا على الرموش اللى تحت ممكن تستخدمى ورقة او معلقة بلاستيك عشان تبعدى اللون انه يجى تحت عنيكى و يعمل بقع سوداء .
7 – بعد لما تخلصى خالص استخدمى القطنة اللى بنظف بيها الودان و حطى عليها مزيل المكياج اللى بتيتعمليه و مشيها حولين عنيكى عشان تتجنبى اى بقع .