10 معلومات مهمين عن المكياج لازم تعرفيهم!
مع شوية نصايح وحيل كل اللي ملهاش قوي في المكياج ممكن تتعلم وتبقي خبيرة كمان… المكياج محتاج تجارب ووقت عشان تقنيه واحنا هنساعدكم إننا هجيبلك خلاصة تجارب خبراء المكياج عشان يوصلوا للي هما فيه دلوقتي.. جيبنلكم النهرده 10 نصايح جديدة عشان تتقنوا فن المكياج!
1- عشان تبرزي جمال عينيكي بلوك طبيعي وخلاب:
هنحط الايشدو الفاتح باللون اللي تفضليه (الابيض ، الكريمي ، والدهبي الفاتح قوي) هنحطه في 3 اماكن (زوايه العين ، وسط العين، وفقط تحت عضمة الحاجب ) وبعدين امزجيهم بصوابعك وحطي بس المسكرا.
2- اختيار نوع البلاشر أو احمر الخدود:
اختياراتك البلاشر أو احمر الخدود لازم تكون علي حسب نوع بشرتك.. يعني مثلا البشرة الدهنية يفضل نستعملها المنتجات البودر المسحوق عشان تثبت فترة اطول وتشيل لمعه البشرة الدهنية، بس البشرة الجافة نختارلها المنتجات الكريمي اللي بتدي لمعان ونضارة للبشرة.
3- الطريقة الأمثل لوضع الماسكرا:
بنات كتير لما بتيجي تحت الماسكرا دايما بتبدي من جوه لبرة وبترسم الماسكرا في اتجاه واحد.. الطريقة الصح هي إننا نوزع الرموش في جميع الاتجهات.. شوفي الفرق في رسمه رموشها في الصورة.
4- الحل الأمثل للبشرة الدهنية أثناء اليوم!
ورق الزبدة!! ايوه احنا بنتكلم بجد.. ورق الزبدة معروف عنه إني بيمتص الدهون بشكل قوي عشان كده خليكي شايلة معاكي ورقتين في شنطتك وفي نص اليوم لما تحسي إن بشرتك بقت بتلمع ودهننت اوعي تحطي طبقة بودر لأن ده هيكتم المسام وهيتعب بشرتك ويسبب ظهور حبوب, لكن استعملي ورقة الزبدة إنك تحتيها على الاماكن اللي بتلمع ودوسي بشويش لحد لما تمتص الدهون من وشك.
5- نفس لون الايشادو مع الروج:
لو عندك لون أيشادو بتحبيه ومن النوع البودر, إنتي ممكن تعملي منه احمر شفايف كمان .. اخلطي شوية منه في معلقه مع مرهم ترطيب الشفايف بفرشة وبعد كده استعمليه علي شفايفك كروج!
6- تعملي ايه لو صباع الروج اللي إنتي بتحبيه اتكسر؟
بولاعة سيحي الجزء المكسور من صباع الروج وثبيته بأديكي كويس واضغطي عليه.. سيبيه ينشف 10 دقايق وهتلاقيه رجع كأنه جديد.
7- لو ازازة البرفان قربت تخلص:
حطي اخر كام نقطة من البرفان في ازازة البودي لوشن أو كريمك المرطب.. واستمتعي بالريحة اللي بتحبيها لوقت اطول..
8- لو عاملة تسريحة ولمة شعرك:
بيبقي فيه الشعر الصغير اللي اسمه “baby hair” وبيبقي مش مزبط ومهما تحاولي تسرحيه بفرشة الشعر مش هيستجيب أو هيتسرح زي ما إنتي عايزة.. عشان كده جربي تستعملي فرشة سنان.. هتلمي بيها كل الشعر الصغير وكمان ممكن تحطي عليها رشة من مثبت الشعر .. هيخلي التسريحة تدوم طول اليوم.
9- قلم الكحل بيتكسر لما تيجي تبريه؟
قبل ماتبري قلم الكحل أو محدد الشفايف جربي إنك تحطيه في الفريزر 10 دقايق.. هتلاقيه مسك نفسه وبقي سميك وهتعرفي تبريه من غير تكسير.
10- استعمال مكنة الحلاقة:
احنا اتكلمنا كتير عن افضل وسائل ازاله الشعر وطبعا مكنة الحلاقة مش من الوسائل المفضلة تماما ومع ذلك فيه بنات كتير بتستعملها عشان ضيق الوقت واوقات بيبقوا مش قادرين علي وجع السويت أو السيلكابيل عشان كده نصيحة مننا لهم انهم يستعملوا زيت الأطفال “baby oil” ده هيخلي الشفرة تفضل حادة لفترة اطول.. هيسرع وقت ازالة الشعر وهيخلي جلدك ناعم ولامع وهيقلل من فرص إنك تجرحي نفسك..