حقيقة البرج ال 13 .. برج حامل التعبان
الموضوع اللي شاغل بال كل الناس اللي مهتمة بالابراج دلوقتي وعامل ضجة علي السوشيال ميديا, ايه حقيقة البرج ال 13؟ أو برج حواء؟ أو برج حامل التعبان؟ هل الأبراج فعلا زادت برج؟ واللي كان نايم أسد صحي لقي نفسه سرطان؟! والجوزاء بقي ثور؟! والعقرب يبقي ميزان؟! بنات حوا عملتلكم البحث ده عشان نعرف الحقيقة.. تعالوا نقرا مع بعد ونفهم هل موضوع البرج اللي طلع فجأة ده حقيقي ولا لأ؟
ايه هو برج حواء أو برج حامل التعبان؟
قال عالم الفلك ريك ليفين إن برج حواء ده كوكبة أو مجموعة نجوم وملوش أي علاقة بعلامات الأبراج. اسمه المعروف بالإنجليزي هو “Ophiuchus” ,الاسم اصله يوناني وبيرمز اليه برجل ماسك تعبان عشان كده اشتهر الاسم التاني أكتر من برج حواء وهو برج حامل التعبان.
طيب ايه أصل الاشاعة؟
بدأت الحكاية لما عالم الفلك بارك كانكل طلع قال انه حصل تمايل في دوران الأرض يعني شكل النجوم كان مختلف من 2000 لما رسموا واعلنوا الأبراج ال 12. والمفروض دلوقتي يحصل تغيير ويضم برج حامل التعبان للابراج الفلكية ويبقي البرج ال 13.
هل فعلا حامل التعبان هو البرج التالت عشر؟
من آلاف السنين ووالعلماء والفلكيين بيستخدموا الرياضة للمسار الشمسي ومش بيعتمدوا علي النجوم, وصحيح إن الأرض اتحركت بس خبراء الأبراج كانوا بيستعملوا علامات النجوم بس لتسمية الأبراج ومش بيعتدموا علي اماكنها في السما. عشان كده الخلاصة إن موضوع البرج ال 13 ده مجرد كلام افتراضي وغير صحيح بالمرة ومش هيفرق ولا هيغير في ال 12 برج الحاليين. نسبة قليلة من علماء الأبراج اللي بيحبوا وبيسعوا للاختلاف هما اللي معترفين بيه انه البرج ال 13, والنسبة ديه مش أكتر من 1% من العلماء منهم العالم كانكل.
طيب يعني أنا كده اطمن إن برجي متغيرشي؟
بظبط كده, اطمنوا انتوا برجكم متغيرش, يعني العقرب هيفضل عقرب, والحمل حمل والأسد اسد, الخبراء أكدوا أن مفيش وجود لبرج “حامل الثعبان”.
من باب الفضول مش أكتر احنا جبنالكم التغيرات اللي كانت ممكن تحصل لبرجكم لو كان موضوع برج حواء أو حامل التعبان طلع كلام حقيقي ومش اشاعة!
برج الجدى: 20 يناير – 16 فبراير
برج الدلو: 16 فبراير – 11 مارس
برج الحوت: 11 مارس – 18 أبريل
برج الحمل: 18 أبريل – 13 مايو
برج الثور: 13 مايو – 21 يونيو
برج الجوزاء: 21 يونيو -20 يوليو
برج السرطان: 20 يوليو – 10 أغسطس
برج الأسد: 10 أغسطس – 16 سبتمبر
برج العذراء: 16 سبتمبر – 30 أكتوبر
برج الميزان: 30 أكتوبر – 23 نوفمبر
برج العقرب : 23 نوفمبر – 29 نوفمبر
برج حامل الثعبان : 29 نوفمبر-17 ديسمبر
القوس: 17 ديسمبر – 20 يناير
