الشمع لإزالة الشعر مميزاته وعيوبه

أنجي سليمان
أنجي سليمان
في
بشرة
38431

يعتبر موضوع الشعر الزائد في الجسم من اكبر المشكلات اللي بتضايق بنات حوا، ودايما بنبقى في حالة بحث مستمرة عن الوسيلة الانسب للتخلص من المشكلة دي وازالة الشعر الزائد، وبتختلف اسباب المشكلة من بنت للتانية سواء كانت المشكلة في ان الشعر بينمو بسرعة او ان البشرة حساسة او مثلا ان في بنابت مش بتحمل الالم الناتج عن عملية ازالة الشعر، والنهاردة حنتكلم عن الشمع لإزالة الشعر الزائد وحنتعرف سوا على فوايده وعيوبه من خلال اراء البنات والسيدات وتجاربهم.

انواع الشمع لإزالة الشعر

بيتوفر الشمع في شكلين مختلفين الاول عبارة عن ورق شرايط شمع جاهزة بتتباع في الصيدلية او محلات الماركت الكبيرة وهي عبارة عن ورقتين ملزوقين في بعض وما بينهم في كمية من الشمع بتفركيه بإيدك وبعدين بتفصلي الورقتين وبتلزقي الورق على مكان الشعر وتسيبيه نص دقيقة وبعدين تنزعيه في عكس اتجاه نمو الشعر

والنوع ده من الشمع بينفع في المناطق اللي شعر فيها خفيف عشان طبقة الشمع الموجودة على الورقة مابتبقاش كبيرة ينفع مثلا مع شعر الوجه او الذراعين

الشمع لإزالة الشعر 1
الشمع لإزالة الشعر 1

اما الشكل التاني فهو جهاز الشمع وهو عبارة عن جهاز في حجم الريموت كنترول مثلا بيتوصل بالكهربا وبيتحط فيه قالب الشمع اللي غالبا بتشتريه مع الجهاز وبتوصيل الجهاز في الكهرباء الشمع بيبدأ يسخن ويسيح ةبتقدري تفردي طبقة منه على المكان اللي عايزة تشيلي منه الشعر، وعلى طول بتحطي فوق الطبقة دي قطعه مخصوص مع القماش برضه بتشتريها مع الجهاز وبتضغطي عليها بإيدك في اتجاه من فوق لتحت وبعدين بتنزعيها في عكس اتجاه نمو الشعر

اما النوع ده فهو بينفع في الاماكن اللي الشعر فيها اكثر كثافة زي الساقين مثلا

الشمع لإزالة الشعر 2
الشمع لإزالة الشعر 2

ودلوقتي حنتكلم عن عيوب ومميزات الوسيلة دي بشكل عام سواء كان الجهاز او ورق الشمع

اولا مميزات استخدام الشمع لإزالة الشعر

  • الشعر بياخد فترة حوالي 4 اسابيع عشان يظهر مرة تانية ودي ميزة كبيرة بتفرق الشمع عن الوسائل التانية زي الحلاقة او الكريم
  • الجلد بيبقى ناعم جدا لأن الشمع بيشيل الشعر الرفيع والدقيق وده بيخلي الجلد ناعم جدا
  • سهل الاستخدام ممكن تعميه لنفسك في البيت مش شرط عند كوافير او خبيرة تجميل
  • مش مكلف لأن سعر الجهاز مش غالي والشمع متوفر الغيار بتاعه في اماكن كتير وبرضه مش مكلف ده غير ان عبوة الشمع الواحدة بتكفي الجسم كله اكتر من مرة
  • مش بيسبب الشعر المدفون تحت الجلد او الحبوب زي الوسائل اللي فيها مركبات كيميائية من كريم او لوسيون او غيرها

ثانيا عيوب استخدام الشمع لإزالة الشعر

  • الشمع مؤلم شوية زي السويت فأحيانا حتحتاجي تستخدمي بعده كريم مهديء او ممكن تحتاجي مخدر موضعي قبل ما تستخدميه
  • لو بشرتك حساسة جدا ممكن تعاني من الاحمرار او البثور الرفيعة بعد استخدام الشمع عشان كده يفضل لو استخدمتيه على جزء صغير من بشرتك الاول
  • بيحتاج شوية وقت في استخدامه مش سريع الاستخدام زي الحلاقة او الكريم
  • حتحتاجي تختبريه الاول على اجزاء الجسم كل واحد بمفرده عشان الاستجابة مش حتكون واحدة يعني مثلا ممكن مايعملش التهاب في الساقين لكن يكون قوي على بشرة الوجه وما تستحملهوش
  • ممكن يسبب شوية فوضى وده عشان ماينفعش تستحمي على طول او تمسحي مكانه بالمايه ولكن لازم استخدام الزيت زي زيت الاطفال مثلا او حتى زيت الزيتون على قطعة قطن او قماش قبل الاستحمام منه او غسل الجسم بالمايه

وبيعتبر الشمع عموما وسيلة آمنه زي السويت لأن مافيهوش مركبات كيميائية زي الكريم واللوسيون وحتى لو سبب بثور او احمرار مع البشرة الحساسة فهي بتتعالج ببساطة بأى كريم مرطب، احكيلنا تجربتك مع استخدام الشمع في ازالة الشعر وهل كان مفيد بالنسبه لك ولا لأ؟

مقالات متعلقه

6 نصايح فعالة هتساعدك تتخلصي من اكتر المشاكل الجمالية المزعجة

6 نصايح فعالة هتساعدك تتخلصي من اكتر المشاكل الجمالية المزعجة

ازاي تتعاملي مع ازالة الشعر لو بشرتك حساسة

ازاي تتعاملي مع ازالة الشعر لو بشرتك حساسة

ازاي تعملي تفتيح “تشقير” شعر الوجه بطرق طبيعية

ازاي تعملي تفتيح “تشقير” شعر الوجه بطرق طبيعية