إزاي تبرزي خدودك بالمكياج!

الخدود من اهم ملامح الوش اللي بتبين ايه الوش شكله صحي وجذاب أو مرهق وتعبان … النهرده هنوريكم إزاي بالمكياج ممكن نبرز الخدود بطريقة سهله وبسيطة.

يلا نشوف الخطوات عشان نعمل مكياج خدود بارز وجذاب.

أول حاجة في مكياج الخدود هي تحديد الاماكن :

محتاجين نحدد فين مكان عضمة الخد وفين مكان تفاحة الخد وده هتلاقوها متوضحة فالصورة.

تاني حاجة في مكياج الخدود البارزة هي الأدوات:

1- كونتور أو برونز أو بلاشر غامق.

2- البلاشر باللون اللي بتحبيه. وممكن تشوفي من هنا إزاي تختاري لون البلاشر علي حسب لون بشرتك.

3- يفضل إنا نستعمل فرشة مسطحة للكونتور وفرشة مدورة للبلاشر. 

تالت حاجة الخطوات:

1- بصي فالمراية, اشفطي خدودك وهتلاقي عضمة خدك برزت وبان التجويف اللي تحت العضمة, وده المكان اللي هنعمله كونتور أو نحت , ممكن تشوفي ايه هو الكونتور من هنا.

2- بالفرشة المسطحة هنحط الكونتور أو البلاشر الغامق أو البرونز في التجويف اللي تحت العضمة وليه بنحتاج فرشة مسطحة عشان محتاجين نرسم الكونتور في المكان ده بظبط ومنطلعش لفوق ولا تحت وده فايدة نوع الفرشة ديه.

3- بعد ماتخلصي هيبان كأنك لسه شفطة خدودك وده هيكون تأثير الكونتور أو نحت الوش.

4- ابتسمي في المراية وهتشوفي تفاحة خدك بارزة وباينة وهو ده المكان اللي هنحط فيه البلاشر.

5- هنمشي بالفرشة المدورة من بداية تفاحة الخد لحد اخر الخد, هيبقي علي العضمة بالظبط وفوق المكان اللي عملنا فيه الكونتور. والفرشة المدورة فايدتها إنها عكس المسطحة وبتفرد البلاشر بشكل اوسع.

كده نكون خلصنا وعملتي مكياج خدود جذاب وهيبرز جمال وشك وهينعمه. نتمني إن الطريقة تكون نالت اعجابكم.