16 نصيحة مهمين لمكياجك لازم تبقي عرفاهم!
البنات بتبذل جهد ووقت كبير عشان تحافظ علي جمالها وشياكتها… شوفي 16 نصايح للمكياج جديدة من بنات حوا هتفرق معاكي قوي وهتسهل حياتك, يلا نبدأ؟
1- زهقتي من إن احمر الشفايف بيلزق على سنانك؟
جربي طريقة من الاتنين, بعد ماتحتي احمر الشفايف, لفي منديل بشكل طولي , دخليه وحركيه عشان يمسح الروج اللي بيبقي لازق في شفايفك من جوه, أو بس بصباعك داخل الفم واسحبيه ببطء, هتتفجئي بكمية الروج اللي بتبقي لازقه في شفايفك من جوه وكانت ممكن تتنقل لسنانك.
2- تحديد الشفايف:
عايزة شفايفك تبان بارزة واكبر من حجمها, شوفي الطريقة ديه اللي كل المشاهير والممثلين بيعملوها, استعملي قلم كونسيلر, وحددي بيه شفايفك من فوق ومن تحت, امزجيه بصوابعك وبعدين حتي الروج بالطريقة المعتادة.. وشوفي الفرق.
3- حددي حواجبك ورسمة عينيكي:
عشان تخلي المنطقة اللي تحت حاجبك مشدودة ورسمة حواجبك تبان, ارسمي بقلم ابيض أو بينك خط تحت الحاجب كله وبعد كده امزجيه بصوابعك.
4- طريقة توزيع الفاونديشن :
طريقة توزيع كريم الوش المرطب بتبقي من تحت لفوق عشان تنشيط الدورة الدموية, لكن طريقة توزيع الفاونديشن الصح بتبقي من فوق لتحت عشان بيبقي مع اتجاه شعر الوش وعشان يسيح أحسن وميكلكعش.
5- المانيكير الابيض تحت لون المانيكير:
كتير بنجيب ألوان مانيكير ولما نيجي نحطها لونها علي ايدينا بيبقي مختلف عن لونها في زجاجة المانيكير, بس عشان اللون يطلع بارز ومظبوط حطي طبقة من المانيكير الابيض تحت اللون اللي هتحطيه. ده كمان بيحافظ علي لون ضفرك الاساسي من انه يتصبغ من لون المانيكير.
6- تقشير الشفايف:
قشري شفيفك كل اسبوع بإستعمال فرشة سنان للأطفال مع خلطة مكونة من معلقة سكر ومعلقة زيت جوز هند.
7- طولي عمر الماسكرا الناشفة:
عشان تطولي عمر الماسكرا الناشفة جربي تحطي فيها كام نقطة من قطرة العين Visine أو أي قطرة تانية من اللي بتعمل دموع صناعية.
8- بصي في المراية في نور الشمس:
دايما بصي في المراية لما تنزلي من البيت عشان نور الشمس بيبقي مختلف عن نور البيت ودايما بيفضح أي أخطاء ماكياج ممكن تكوني عملاها.
9- اختاري لون الفاونديشن يكون ماشي مع لون رقبتك:
دايما قلقنا واحنا بنشتري الفاونديشن أو الكونسيلر إن اللون يطلع غامق أو فاتح ومش لايق علي بشرتنا, بس لأنه رقبتك مش بتتعرض لأشعة الشمس زي وشك, هي بتبقي أفضل بكتير لمطابقة اللون الحقيقي من خدودك أو تحت عينك.
10- زبدة الكاكاو حوالين ضوافرك قبل ماتحطي المانيكير:
حطي طبقة من زبدة الكاكاو حوالين ضوافرك قبل ماتحطي المانيكير, وهتلاقي إن أي لغبطة إنتي بتعملها وإنتي بتحطي مش هتلزق على ضوافرك وممكن تمسحيها بمنديل عادي بعد ماتخلصي كل ضافر.
11- انقذي الماسكرا الناشفة:
طريقة تانية عشان تنقذي بيها الماسكرا وهي إنك تحطيها في كوباية ماية سخنة عشان تسيح وتعرفي تستفادي بكل نقطة فيها.
12- كبري شفايفيك:
لو شفايفك رفيعة لازم تتعودي إنك ترسميها وتحدديها بقلم وعادي جدا إنك تخرجي عن حدود شفايفك, بس يفضل بنسبة بسيطة ومش كتير قوي عشان متبانش مفتعلة ومش طبيعية.
13- ماسكرا الرموش اللي تحت:
الماسكرا في الرموش اللي تحت بتبقي مأساوية جدا ودايما بتبهدل المنطقة اللي تحت العين ومش بتطلع مظبوطة, جربي تستعملي معلقة بشكل زي اللي في الصورة وإنتي بتحطي الماسكرا عشان تعرفي تحطيها برحتك ومن غير لحوسة.
14- املي فراغات الحواجب:
للحواجب الرفيعة, استعملي فرشة ماسكارا قديمة, اغسليها كويس و مع ايشادو بني أو اسود علي حسب لون حواجبك سرحي بيها الحواجب واملي الفراغات.
15- كبري أو صغري مناخيرك.
خدعة جديدة عشان تكبري أو تصغري بيها مناخيرك.. المسافة اللي بين الحواجب مفروض تعبر عن حجم المناخير. بمعني تاني إن البنات اللي محتاجة تصغر مناخيرها محتاجة إنها تضيق المسافة مابين حواجبها. والبنات اللي مناخيرها رفيعة قوي محتاجة توسع المسافة اللي بين الحواجب.
16- كريمك المرطب + كونسيلر:
اخلطي مع كريمك المرطب كونسيلر أو كريم أساس. واستعمليه ككريم مداري لعيوب الوش. وممكن تحطي الخليط ده في علبة ويبقي معاكي في شنطتك وإنتي بره البيت تستعمليه أي وقت للترطيب أو تظبيط مكياجك.
