ايه هى تحضيرات استقبال العريس لأول مرة؟!

بقلميسرا خالد فيعلاقات visibility28906

لكل بنت مقبلة على تجربة الجواز و مقابلة العريس لاول مرة عشان مترهقيش أعصابك ولا تتعبي نفسيًا احذفي من عقلك فكرة أنك بضاعة العريس جى يعاينها لان دى اول فكرة بتختر على دماغ بنات كثير و فكرى ان ده ممكن يكون احلى يوم فى حياتك لانه ممكن يكون شريك حياتك، و دايما فكرى انه زيك بيدور على اللى هتكون شريكة حياته. تعالى اعرفى شوية نصايح هتساعدك فى تحضيرات استقبال العريس..

1 – البيت :

الفخ اللى بيقع فيه اغلب العائلات هو التمسك بمظاهر الاحتفالات و كانه يوم الفرح و لكن الحقيقه ان اليوم هو يوم للتعارف بس و ملوش داعى الاحتفال بزيادة و الاحتفال بيجى بعدين اليوم بيحتاج بساطه ومش بيحتاج البهرجه او التكليف المنزل لازم يكون مرتب و نظيف و مفيش مانع من استعمال بخور او معطر جو ملوش رائحه نفاذه و الإضاءة مريحه و غير مباشرة وملئ أركان البيت بالورود الطبيعية.

2 – استعداد العروسة :

حاولي على قد ما تقدري تخلّي أعصابك هادية جدا وتبعدي عن أي مصدر قلق أو توتر.. علشان التوتر ممكن يبان على وشك واحنا مش عايزين كده احنا عايزين عروسة زي القمر وياريت كمان قبل الميعاد ده تاخدي دش دافي:

الملابس :

ابدأي في اختيار لبسك.. وعلى فكرة النقطة دي بتحير بنات كتيييير أوي لأنهم بيحتاورا يلبسوا كلاسيك ولا لبس عادي …بس ياريت أول مرة دي تلبسي لبسك العادي اللي انتي بتلبسيه وأنت خارجة.. يعني لو كنت بتلبسي بنطلون وبلوزة البسيهم بس ياريت البنطلون يكون قماش مش جينز أو لو كنت بتلبسي جوب وبلوزة البسيهم برضه وده علشان يشوفك على طبيعتك في اللبس وبلاش موضوع إنك تلبسي بدلة لأن دي هتخلي الحكاية تبقى رسمي أوي وممكن تبيّنك أكبر من سنك واوعي تنسي تختاري الألوان اللي تكون مناسبة عليكي وتنور وشك.لو كان اللقاء ده هيتم في البيت فياريت ما تلبسيش كعب عالي قوي وخليكي في الكعب اللي 3 سم.

المكياج :

ياريت في اليوم ده ما تكتريش في المكياج علشان ما تبقيش شكلك مش حلو.. وخليكى بسيطة جدا في مكياجك يعني كفاية أوي إنك تحطي روج وترسمي عينيك بالكحل والآي شادو وتحطي ماسكرا وبلاش أحمر خدود لأن طبيعي جدا إن وشك هيحمر في اليوم ده فمش هتحتاجي لأحمر الخدود لأنه هيكون موجود طبيعي.

3 – أثناء اللقاء نفسه:

-بلاش تشيلي صينية عصير في إيدك وأنت داخلة لأنك ممكن ترتبكي وتوقعيها على اللي قاعدين.. كفاية قووي إنك تدخلي بابتسامة بسيطة على شفايفك وتسلمي على كل اللي موجودين وعليه هو كمان.. واقعدي وخليكي شاطرة واختاري إنك تقعدي في الكرسي اللي يكون مواجه له علشان تقدري تشوفيه كويس لأن ده حقك  وخليكي واثقة من نفسك وخدي الموضوع ببساطة علشان يعدّي.

-لو مامته جات معاه ياريت تخلّي بالك منها وبلاش تكشّري في وشها وهي قاعدة.. خليكي مبتسمة ليها دايما حتى لو قالت حاجة مش عجباكي اوعي تردي عليها رد مش مناسب وكلميها عادي وحاولي تكسبي رضاها وخليكي ذكية وفكري في كل كلمة قبل ماتقوليها.

-وأنت قاعدة اتكلمي براحتك من غير تكلف وافتحي مجالات للكلام واسمعيه كويس وهو بيتكلم علشان تقدري تحكمي عليه .لو فيه حاجة تضحك يا ريت ماتضحكيش ضحك بصوت عالي أو ضحك هيستري كفاية قوي ابتسامة بسيطة على شفايفك و خليكي جريئة ولو وجه لك الكلام ردي عليه بذوق من غير كسوف.

-المقابلة لازم تكون عادية بدون أسئلة تفصيلية و لازم تدوا فرصة للعريس يقول اللى عايزه بيبدأ الحديث عن كل حاجة إلا الزواج على الأقل بنصف ساعة ومش مستحب سؤاله عن الشقة وتفاصيل أول زيارة ، ويؤجل الكلام لاجتماع خاص بين والد العروس والعريس .

– لو حصل و قعدتوا لوحدكم شوية اتكلمي معاه في أمور عادية جدا.. زي مثلا البرامج اللي بتعجبك في التليفزيون أو عن حاجة تكون حصلت قريب وشدت انتباهك وابعدي عن الكلام في أي مواضيع تكون مسار جدل زي مثلا الكرة والأهلي والزمالك.. ولو تطور الكلام بينكم لأي مواضيع فيها جدل خليكي ذكية وبلاش يكون عندك تحيز في الرأي واسمعي منه وابدي رأيك بأسلوب لطيف من غير ما تحرجي نفسك أو تحرجيه واوعي في أول كلام بينكم تسأليه أي أسئلة شخصية أو أسئلة محرجة زي مثلا إنك تسأليه إذا كان خاطب قبل كده ولا لأ أو مثلا مرتبه كام؟؟ لأن الأسئلة اللي من النوع ده ما ينفعش تسأليها في أول مقابلة.

3 – الاكل و المشروبات :

– يفضل تقديم صنفين من العصير فى الاول عشان تديهم فرصة للاختيار ، زىالبرتقال والفراولة في كاسات طويلة.

– ولان الزياره مسائية يفضل تقديم الشاي في أبريق ، مع سكرية منفصلة اللبانة والفناجين ، وسؤال كل فرد بيحب الشاى يكون كام معلقة سكر.

– مع الشاي هتقدمى فى أطباق صغيرة اللى بيقولوا عليه بالإنجليزى  finger food ,و بتكون سندوتشات صغيرة ، سالمون مدخن ، مكعبات جبن حلو ، لحم بارد. مأكولات سهل التقاطها باليد أو الشوكة ، وبعض الحلويات ، تغرف في أطباق بكميات بسيطة وشوكة وفوط صغيرة  بطريقة أنيقة.