كل اللي نفسك تعرفيه عن رجيم اللقيمات

بقلميسرا خالد فيتخسيس الوزن visibility3922

 رجيم اللقيمات ده حل سحرى للناس اللى بتحب تاكل اى حاجة ونفسها تخس ,اللقيمات ” نظام غذائي / رجيم بيتميز انه بيديكى الفرصة انك تاكلى كل الأطعمة ولكن بمقادير صغيرة على مدار اليوم، و مش بيعتمد على الحرمان أبدا. والهدف من اللقيمات هو أن المخ  يتعود على تناول كميات بسيطة من غير أن نشعر بالجوع .تعالوا نقرا اكثر عن رجيم اللقيمات …

رجيم اللقيمات
رجيم اللقيمات

 ليه الرجيم ده مميز ؟

رجيم ” اللقيمات” بيلعب على دور المخ من خلال مركز موجود فيه،  العلماء  اكتشفوا أن  المركز ده له دور وأثر كبير فى التحكم فى حالة النهم، باتبعنا النوع ده من الرجيم بنكون نجحنا فى ترويض حالة النهم و ترويض جسمنا على تناول لقيمات بأحجام صغيرة على فترات تتراوح بين الساعة ونصف أو الساعتين، وبتكون النتيجة مرضية جدا، كمان يحتوي  الرجيم وهو -خبر مفرح – على وجبة كبيرة واحدة بناكلها بليل اسمها  (الهابي ميل/ الوجبة المرحة) لأنها مكافأة للمركز الموجود في المخ.

رجيم اللقيمات مش بيحرمك من أي طعام له فائدة للوظائف الحيوية:

لانه مش بيعتمد  على نوعيات الطعام؛ولكن على تدريب المعدة على تقبل أحجام صغيرة من الطعام. رجيم اللقيمات ده عباره عن اى اكل عندك فى البيت بحجم تلت الكف والوقت بين اللقيمات من ساعه ونصف لثلاث ساعات اما الوجبه المرحه حسب الوزن وده نماذج من اللقيمات والوجبه المرحه :

في الفطار

(ربع رغيف بلدى ومعاه قطعة جبنة لايت او بيضة مسلوقة از معلقة كبيرة حلاوة او 2 ملعقة كبيرة فول ومعاه شاى بلبن ولو لبن نيدو يبقى معلقة واحدة وبس ) .

وبعد ساعتين هنبدأ اللقيمات ودى ليها حاجات كتيرة مختلفة لتعطى الصحة والقوة :

دى امثلة مختلفة للقيمات :-

  1. اى ثمرة فاكهة ” اى نوع مفيش اى حاجة محظورة خالص”
  2. ثمرة خضار ” اى نوع مفيش اى حاجة محظورة ”
  3. نص كوب لب
  4. نص كيس شيبسى
  5. اى نوع عصير ” هتاخدى لتر على خمس لقيمات بشرط لا يزيد معدل السكر في اليوم كله عن خمس معالق”
  6. كبشة فشار
  7. اى مشروب به لبن مثل نسكافيه او سحلب اى حاجة
  8. تلت الكف بيتزا ” يعنى نص مثلث ”
  9. قطعة حلوى حجهما اد علبه الكبريت.
  10.  نص كوب شوربة خضار او نص كوب شوربة لسان عصفور
  11. 2 برقوق او 1 برقوق ومعاها 2 ملعقة شوربة
  12. نص كوب سلطة
  13. واحدة زبادى
  14. عدد 2:3 بسكوت
  15. ربع رغيف او واحدة توست او اقل ومعاها اى غموس
  16. 3 بلحات
  17. نصف كوب عنب
  18. نص كوب بطيخ او كنتالوب
  19. قطعة صفيرة من الشيكولاته اد علبه الكبريت
  20. نص كوب صغير من الايس كريم
  21. ربع ساندوتش من الفاست فودز
  22. نص كوب لبن
  23.  3|4كوب عصير
  24. علبة تونة بس هتتقسم على لقيمتين
  25. لو عايزة تاكلى سمك في وسط اليوم ” مفيش ادنى مشكلة كليها بس تكون اد تلت الكف”
  26. واحدة كحكة
  27. اتنين ارصيا
  28. بالنسبة لعصير القصب  بس يكون اد نص كوب من بتاع البيت 250 جرام وممكن تكرريها طول النهار كل ساعتين ”
  29. ملعقة شاى بللبن بودرة اللى هو نيدو ومعاه شاى
  30. ربع رغيف مع بطاطس مسلوقة
  31. اتنين صوبع محشى كل ساعتين

واللقيمات دى يا جماعة تاخديها كل ساعتين لحد قبل ميعاد الوجبة المرحة بساعتين

بصى بقى قبل الوجبة المرحة بساعتين هتعلمى ايه:-

هتاكلى سودانى او لوز عشان يشبعك ومتحسيش انك عايزة تاكلى كتير ده بقى نظامه ايه:-

في الساعتين اللى قبل الوجبة المرحة هتاكلى 3 حبات لوز او خمس حبات سودانى وده كل نص ساعة لمده ساعتين قبل الوجبه .

” بس هنا فيه ملاحظة لازم مضغ السودانى او اللوز مضغا جيدا وفي خلال الساعتين دول ما تشربيش ميه خالص عارفه ليه عشان انتى لما بتاكمليهم بيحسسوكى بالشبع ولو شربتى ميه يبقى اكنك معملتيش حاجة وبينزلوا من نقظة الشبع اللى في معدتك فالاحسن تشربى الميه قبله ب 10 دقائق

الوجبة المرحة بقى ودى عبارة عن ايه :

كوب ونصف سلطه وعليها معلقه زيت زيتون او اى نوع زيت وده علشان الامساك ،

للوزن اللى فوق 90 كيلو هتاخد كوب الا ربع نشويات ومعاه كوب الا ربع خضار ومعاه قطعة بروتين اد نص الكف او ربع فرخة

وللوزن اللى تحت 90 كيلو هتاكل الاتى ( نص كوب نشويات ومعاه نص كوب خضار ومعاه قطعة بروتين اد الكف ومعاه قطعة حلوى اد علبه الكبريت).

بصوا بقى النشويات في النص كوب عبارة عن ايه

  1. رز او مكرونة
  2. نص رغيف عيش بلدى
  3. حجم الكف رقاق او بيتزا

والحلوى بقى عبارة عن ايه

  1. ممكن تكون بسبوسة
  2. قطعة جاتوه ” بنفس الحجم اد علبة الكبريت”
  3. 2 معلقة ايس كريم
  4. اى نوع من الحلويات انتى نفسك فيه بشرط اد علبة الكبريت

ايجابيات وسلبيات رجيم اللقيمات:

 اكيد احنا مع زيادة عدد الوجبات مع تقليل حجمها، لان الكتير من خبراء التغذية بيشجعوا على زيادة عدد وجبات الرجيم واستهلاك 5-6 وجبات صغيرة في اليوم بدل من 3 وجبات كبيرة. و ده لان الوجبات الصغيرة والمتكررة بتحافظ على توازن نسبة السكر في الدم. ومنع التغييرات الكبيرة في مستويات السكر في الدم بيساعد على الشعور بالشبع وبيشجع على استخدام مخازن الدهون في الجسم.  و كمان تناول الوجبات الصغيرة والمتكررة بيساعد في الحفاظ على نسبة الدهون في الدم،  و بييقلل من الشهية للحلويات .

نيجى بقى للسلبيات بالنسبة للوجبة الرئيسية والمتاخره بليل “الوجبة المرحة” بتسبب تراكم اكبر كم من السعرات الحرارية في نهاية اليوم، ومن المعروف ان تناول الطعام والنوم مباشرة بيؤدي الى مشاكل هضمية و تقل على المعدة وعسر الهضم.

الناس الممنوعة من رجيم اللقيمات:

– الحوامل .

-المرضعات .

– الاطفال.

– المصابون بالامراض المزمنة مثل السكري وامراض القلب والشرايين.

– ذوي المناعة المنخفضة.