اسباجتي الهوت دوج في 20 دقيقة

اسباجتي الهوت دوج, سمعتي عنه قبل كده؟ فكرة جديدة ومبتكرة ومش هتاخد منك اكتر من تلت ساعة! الأطفال هيحبوه عشان شكله وهيشجعهم علي الاكل وإنتي كمان هيشجعك عشان سريع ولذيذ.

المكونات:

كيس مكرونة اسباجتي أو شرايط, علي حسب اختيارك

كيس هوت دوج

الطريقة:

– هتقطعي الهوت دوج علي شكل قطع صغيرة.

– هتطلعي المكرونة من الكيس وهتغرزي جوه كل قطعة هوة دوج 10 عيدان مكرونة أو أكتر.

– حطيهم في ماية مغلية عشان يتسلقوا مع بعد لمدة 15 دقيقة.

– في الوقت ده اعملي الصوص بتاع المكرونة سواء كان صوص طماطم احمر أو صوص كريمة ابيض.

لصوص الطماطم:

5 وحدات طماطم وبصلة, ممكن تزودي فص توم لو عايزة, اضربيهم مع بعض في الخلاط وبعدين في حلة ومع قطعة زبدة سبكيهم. زودي ملح وفلفل اسود.

لصوص الكريمة:

دوبي قطعة زبدة في الحله وبعدين ضيفي نص لتر لبن أو كريمة, وسيبها لحد لما تغلي وبعد كده زودي حوالي معلقتين دقيق أو لحد لما تحسي إن الصوص وصل للسماكة اللي إنتي بتحبيها, زودي ملح وفلفل أسود.

حطي الصوص علي المكرونة وبالهنا والشفا :)