13 نصيحة للمكياج والشعر والأظافر جربيهم دلوقتي!

سارة جمال
سارة جمال
في
مكياج
21572

المكياج والجمال أسرار وكل يوم بتطلع حيل وحركات جديدة عشان تسهل علينا إزاي بأقل مجهود وفي اقل وقت نعرف نظبط مكياجنا أو شعرنا, النهرده في بنات حوا بنقدملك نصايحنا المميزة عشان جمالك …يلا جربيهم دلوقتي معانا..

13 نصيحة للمكياج والشعر والأظافر جداد جدا, يلا نبدأ؟

1- إزاي تبيضي ضوافرك بطريقة طبيعية؟

استعملي الوصفة ديه عشان تبيضي ضوافرك وتخلي لونها أبيض كأنك عامله مانيكير فرنش: 2 معلقة صغيرة ماية أكسجين 4 معالق باكينج صودا 1/2 كوباية ماية سخنة اخلطي المكونات مع بعض وانقعي فيهم ضوافرك لمدة دقيقتين,كرري العملية مرة كل يوم لحد لما توصلي لدرجة التبيض اللي عجباكي وعشان تحفظي علي ضوافرك, حطي عليهم طبقة من ملمع الضوافر.

إزاي تبيضي ضوافرك بطريقة طبيعية
إزاي تبيضي ضوافرك بطريقة طبيعية

2- عايزة تعملي خط الايلينر مظبوط؟

جربي تستعملي أي كارت عندك في البيت إنك تظبطي بيه الايشادو وخط الايلينر, حطيه جنب عينك بالزاوية اللي إنتي عيزاها عشان القلم و الايشادو ميطلعوش بره الخط ده.

عايزة تعملي خط الايلينر مظبوط؟
عايزة تعملي خط الايلينر مظبوط؟

3- شعرك دهني وعلى طول محتاج غسيل؟

لو شعرك دهني وعاملك إزعاج إنك محتاجة تغسليه علي طول عشان بيلزق بسرعة, جربي تستعملي الدري شامبو “dry shampoo” ده منتج موجود دلوقتي في مصر ومفيد جدا للبنات اللي شعرها دهني, لانه باستعماله بيخلي شعرك مشرق وكأنك لسه غسلاه بس من غير مايه. بصي كمان علي الوصفات ده للشعر الدهني 

شعرك دهني وعلى طول محتاج غسيل
شعرك دهني وعلى طول محتاج غسيل

4- لو عاملة تسريحة في شعرك وعايزة البنس تثبت:

اوقات كتير لما بنجرب تسريحة جديدة ونستعمل فيها بنس, يادبوك بتثبت ساعتين تلاتة وبعد كده البنس بتتحرك وتتزحلق من مكانها, لو عايزة البنس تثبت طول اليوم, جربي إنك تحطي عليها رشة من مثبت الشعر, ده هيخلي البنسة ثابتة والتسريحة تدوم طول اليوم.

لو عاملة تسريحة في شعرك وعايزة البنس تثبت
لو عاملة تسريحة في شعرك وعايزة البنس تثبت

5- لو زهقتي من ألوان المانيكير العادية:

جربي الطريقة الجديدة ديه عشان تعملي لوك جديد لمانيكيرك, جيبي اسفنجه, وقصيها بالمقص, وجيبي أكتر 3 ألوان بتحبيهم بس يكونوا ليقين علي بعض, وحتي منهم علي الاسفنجة في شكل 3 خطوط متوازيين, وبعدين طبقي الاسفنجة على ضوافرك.

لو زهقتي من ألوان المانيكير العادية
لو زهقتي من ألوان المانيكير العادية

6- عايزة تعرفي تستعملي الماسكرا لحد اخر نقطة فيها؟

الماسكرا معروف عنها إنها بتنشف بسرعة واحنا طبعنا أول لما ده بيحصل بنقوم رمينها وجيبين غيرها على طول, لأ جربي إنك قبل ماتستعملي الماسكرا تدفيها يا إما في ماية دافية لمدة دقيقة تحت الحنفية, يا إما جربي تحطيها في البرا أول لما تلبسي عشان تسخن بحرارة جسمك! أنا عارفة إنها طريقة غريبة وجديدة بس هي طريقة فعالة عشان تستفيدي اقصي استفادة من الماسكرا قبل ماتقولي خلصت وترميها.

عايزة تعرفي تستعملي المسكرا لحد اخر نقطة فيها؟
عايزة تعرفي تستعملي المسكرا لحد اخر نقطة فيها؟

7- عايزة البرفان يدوم وقت اطول؟

اتكلمنا قبل كدة عن الاماكن المفروض نحت فيها البرفان عشان يدوم اطول وقت, لو عايزة يدوم أكتر جربي تحتي فازلين في الأماكن ديه قبل البرفان, هيخلي البرفان يثبت فيكي ويدوم طول اليوم.

8- إزاي تفتحي لون الكونسيلر:

اوقات كتير بنجيب كونسيلر ولما بنرجع البيت نجربه بنتفاجأ إن لونه طلع أغمق من لون بشرتنا, ده طبعا بيبقي مطب كبير ووقتها بنضطر نرميه أو نديه لواحدة صاحبتنا,بس عايزة اقولك  إن فيه حيله إنك تخلطي كمية منه في ايدك مع كمية كريم وجه, ده هيخلي اللون يفتح ومع توزيعه علي الوجه هيدي الدرجة اللي إنتي عايزها.

إزاي تفتحي لون الكونسيلر
إزاي تفتحي لون الكونسيلر

9- البسي شراب قبل ماتنامي:

لو رجلك فيها تشققات أو كالو, جربي تحطي طبقة كريم مرطب أو فازلين قبل ماتنامي وبعدين البسي شراب, هتصحي الصبح تلاقي رجلك في منتهي النعومة.

البسي شراب قبل ماتنامي
البسي شراب قبل ماتنامي

10- مناديل ازالة المكياج:

اتكلمنا كتير قبل كده عن مشاكل البشرة وإننا لازم ننام واحنا شايلين المكياج تماما عشان نحافظ علي جمال بشرتنا, بس اوقات كتير بنبقي مقتولين نوم ومش قادرين نعمل العملية ده قبل ماننام, عشان كده دايما خلي معاكي مناديل ازالة مكياج جنب سريرك عشان تستعمليها في المواقف ده. اهم حاجة إنك عمرك ماتنامي وإنتي في وشك أي مكياج.

مناديل ازالة المكياج
مناديل ازالة المكياج

11- مش لازم الفل ماكيوب خصوصا الصبح:

لو صاحية مستعجلة ومعندكش وقت تحطي مكياج كامل, ممكن تركزي علي حاجة واحدة بس, يا إما عينيكي يا إما شفايفك, اوقات كتير التركيز علي منطقة واحدة بس بيبرز جمالها وبيخليكي بسيطة وجذابة من غير ما يبان إنك حطه ماكيوب كتير.

مش لازم الفل ماكيوب
مش لازم الفل ماكيوب

12- لو زهقانة من شعرك ومحتاجة تغيير:

جربي إنك من وقت للتاني تعملي تسريحة سهله وجديدة باستعمال الباندنا, لو صاحية شعرك مش عجبك, هايش مثلا أو مزيت, جربي إنك ترفعيه وتلميه بالبندانا , شوفي أكتر من 30 فكرة للوك مختلف للبندانا من هنا 

لو زهقانة من شعرك ومحتاجة تغيير
لو زهقانة من شعرك ومحتاجة تغيير

13- رموش جذابة في المناسبات الخاصة:

من غير ماتحتاجي تركبي رموش, لو عندك مناسبة مميزة, جربي إنك بين طبقات المسكرا باستعمال قطنة حطي من بودرة الأطفال  طبقة علي طرف الرموش, وبعدين ارجعي حطي طبقة ماسكرا تانية, ده هيديكي شكل طويل وكثيف للرموش كأنك مركبة رموش بالظبط.

رموش جذابة في المناسبات الخاصة
رموش جذابة في المناسبات الخاصة

مقالات متعلقه

10 حيل تجميلية بسيطة ممكن تعمليها عشان تطلعي بلوك احلى في وقت سريع

10 حيل تجميلية بسيطة ممكن تعمليها عشان تطلعي بلوك احلى في وقت سريع

10 نصايح مكياج من خبراء مكياج المشاهير هتفرق معاكي

10 نصايح مكياج من خبراء مكياج المشاهير هتفرق معاكي

ازاي تنظمي المكياج بتاعك بسرعة وبطريقة سهلة

ازاي تنظمي المكياج بتاعك بسرعة وبطريقة سهلة