!!مش على رأي المثل
مش على رأي المثل!!! مين الى قال ان الامثال حكم ولازم نسمعها ونستفيد منها؟اوقات كتيرة الأمثل بيبقى فيها حاجات غلط, احنا جيبنلكم عينة من الأمثلة اللي ممكن نكون مش متفقين علي معناها.
“ضل رجل و لا ضل حيطة”
لا، لمؤاخذة الحيطة انفع و افيد يعنى على الاقل الحيطة هحس بامان و انا وراها لكن اجيب واحد ينكد عليه و يطلع عينى و البس طول حياتى عشان ضل طيب ما اقف تحت شجرة و خلاص، و لو حكمت اجيب بودى جارد يحمينى و اهو يبقى انا الى مشغلاه. اياكى تجوزى عشان كلام الناس او امثال عفا عليها الزمن، اجوزى لما تلاقى رجل مش ضل.
“ايه تعمل الماشطة فى الوش العكر”
لا بتعمل وبتعمل كتير، بلاش نضحك على بعض فى نجوم كتير وممثلين كتير شفنا بعنينا الماشطة عملتلهم ايه، و كمان بينى و بينك كدا ليه هنروح بعيد جربى تشوفى نفسك اول ما تصحى من النوم و بعد ماتضبطى حالك و تستخدمى الماشطة، بس الفكرة بقى ان مفيش وش ربنا خلقه عكر و لازم تعرفى ان لو الماشطة عملتلك حاجة فعشان انتى اصلا جميلة كل الحكاية انها اظهرت الجمال دا.
“من امنك لم تخونه حتى لو كنت خاين”
الحقيقة انا مش قادرة افهم المثل دا اصلا، لان الخيانة اصلا معناها انك تخدع الانسان الامن ليك فازاى الخاين يبقى امين و ازاى اصلا انا اثق فى خاين، من الاخر الخاين خاين حتى لو حفظ سرك النهاردة فبكرة هيخونه فخلى بالك و احفظ اسرار غيرك عشان تلاقى الى يحفظ سرك.
“القرعة تتعايق بشعر بنت اختها”
المثل دا بقى بيضحكنى لانه بيبقى على النقيض، المفروض يقولوا القرعة بتشد شعر بنت اختها، القرعة مش طايقة بنت اختها، لكن تتعايق دى مش داخلة دماغى لان الغيرة موجودة عند بنى ادم طبيعي لان النفس امارة بالسوء لكن الفكرة انك و لا تحسد و لا تتعايق يعنى انت مش عندك الحاجة دى تروح تفتخر انها عند غيرك! دا كلام! و لا تتفاخر و لا تتغر، خلى عندك ثقة فى نفسك ، خلى عندك طموح لتحقق الى وصله غيرك من غير ما تتغر على البشر و لا تتعايق.
“قيراط حظ ولا فدان شطارة”
طيب بالذمة دا كلام يعنى المفروض ان الحكم دى اتعملت عشان يتعلم الناس و تنصحهم تروح تنصحهم بالتكاسل و الاستسلام لاسباب وهمية يععنى انا بدل ما اعلم ابنى الاعتماد على النفس و العمل ووالطموح اعلمه التخاذل و انتظار الحظ و الفكرة ان الفرصة مش هتيجى غير للى بيشتغل ة انك لو مش شاطر و لا قراريط الحظ الى فى دنيا كلها هتنفعك، الحظ مبيجيش غيرللى يستهله و هو الانسان الى بيشتغل و يتعلم فبلاش فهلوة!
و من الاخر كل واحد ليه المثل الخاص بيه والى ينفع معاه هو فمش على رأي المثل و لا انتم ايه رايكم؟ يلا كل واحدة تشاركنا ايه أكتر مثل بتحبه وبيمشي معاها في مواقف كتير.
