هى الستات عايزة ايه؟
هى الستات عايزة ايه؟ السؤال الذى حير الجميع ومش بس الرجالة الى مش عارفين يجاوبوه دا البنات و الستات نفسهم بيعجزوا عن إجابته و دا طبعا لصعوبة السؤال وصعوبة الاجابة عليه، تعالوا نشوف سوا حال كل واحدة وهي ممكن تكون بتفكر في إيه وإزاي.. يلا نبدأ؟
1- الانسات:
البنات اللى لسة متجوزتش، متكدرين وكمان متجنين وهيموتوا ويتجوزوا حتى لو العريس ميسويش فى سوق الرجالة قرشين، وتلاقيها عمالة تحسد فى بنت خالتها المتجوزة اللى سبحان الله متكدرة بردو، وفى لحظة نسيت كلامها وارائها عن استقلالية البنت واعتمادها على نفسها وانها لازم تحقق احلامها وطموحها اللى بتتحول بقدرة قادر بس لبحث عن عريس!
2- المرتبطين :
دا غيرالبنات المرتبطين وعمالين يحسدوا المخطوبين ونفسهم المرتبطين بيهم يخطبوهم. وخايفين انهم يفشكلوا وعلاقتهم تبوظ.
3- المخطوبين:
والغريبة بقى ان المخطوبين تلاقيهم مضايقين برضه وبيقولوا مش كل الخطوبة حلوة فيها حاجات كتير تضايق وخناقات ومشاكل وخايفين للموضوع يتفشكل وهيموتوا و يتجوزوا!!
4- المتجوزين:
نيجي بقى للستات المتجوزين تلاقيهم متكدرين والواحدة منها تقول “كان يوم اسود يوم ما قلت يا جواز” وتفضل تتحصر على شبابها الى ضاع وجمالها اللى راح وعمرها الى اتسرسب ادام عينيها وكل دا عشان راجل وغالبا ما تكمل الجملة و تقول “راجل ميستهلنيش”.
نشوف بقى الست المتجوزة ومخلفة تلاقيها طالع عينها ومتجننة ومش بعيد تكون منفسنة من اختها اللى متجوزة بس لسة مخلفتش وعايشة حياتها مع جوزها وعلى قد حبها وعشقها لولادها وممكن تموت اللى يجى جنبهم على قد اشتياقها لحريتها وخروجاتها مع جوزها واصحابها وعشان كدا تبدأ النفسنة !
نيجى بقى على الست اللى متجوزة بس مبتخلفش اولسة ربنا مرزقهاش بالعيال تلاقيها مكتئبة ومضايقة وحزينة على طول وبردو مش طايقة نفسها لانها عايزة عيال ومبتفكرش فى انها مسؤلية او تضحية ممكن متكنش قدها لكن كل الى يهمها انها تخلف ومش بعيد تلاقيها راحت وعملت احجبة و زار كمان عشان تخلف.
خلاصة الكلام الستات مش عارفين عايزين ايه اوممكن نقول محتارين فى قرارتهم و مواقفهم ، نبتدى بالبنت المرتبطة الى بيكون كل هدفها الخطوبة عشان تقدر تخرج و تروح و تيجى زى صحابها بغض النظرعلى تأثير الخطوبة دى بعد كدا فى حياتها لانها بتكون شايفة جانب واحد بس من الخطوبة وهو جانب الهزار والفسح . لكن لما تتخطب وتلاقى اسئلة كدا زى رحتى فين؟ و راجعة امتى؟ و مع مين؟ و…الخ بتبدى تتصدم بس غالبا بتختار انها تكمل لانها مش معقولة تقول انا عايزة الحياة تبقى وردى على طول وخروجات و فسح وبس فبتدخل بقى عند المرحلة الأصعب الا و هى الجواز.
و هنا بقى بيكون كل الى فات حمادة والى جاى حمادة تانى خالص لانها مرة واحدة و بدون سابق انذار بتلاقى نفسها مسؤلة عن نفسها كاملة و مش على نفسها وبس وعلى كائن اخر موجود فى البيت و مفيش ماما الى بتعملها اكلها وتضبطلها لبسها ولا بابا الى بيدلع و يطبطب لكن بتلاقى نفسها هى الى مطالبة بالطبطبة والدلع دول وفى نفس الوقت متقدرش تعترض لان المفروض انها واحدة ناضجة وان دا كان اختيارها فبتكمل عشان بعد 9 شهور اوسنة تلاقى نفسها ام والمسؤلية بقيت اتنين وعلى قد حبها لابنها على قد ما يبتدى الحسد على اصحابها الى لسة مجوزوش او مخلفوش.
3 حاجات لازم تفكرى فيهم قبل ما تاخدى اى قرار خاص بالارتباط او الحب او الجواز:
1- إنك تكوني فعلا اد مسؤلية الارتباط بشخص لان الحكاية مش مجرد كلام حب و بس ده جواز و خلفة ومسؤلية…
2- قبل الخطوبة هل دا الشخص المناسب فعلا ليكى؟ وهل احلامكم وطموحكم مشتركة؟ وأهم حاجة هل انتم متفاهمين؟
3- طولي فترة الارتباط قبل الجواز عشان تدي نفسك وتديله فرصة انكم فعلا تكونوا متأكدين من اختياركم..
يمكن نكون احنا اللى معرفناش الستات عايزة ايه بس انتى لو عارفة او ليكى تجربة تفيدنا شاركينا بيها.
