11 نصيحة مهمة لجمالك متفوتيكش!
محدش بيبقي فاهم أو بيقدر اد إيه البنات بتتعب عشان تهتم بشكلها وجمالها, واد إيه العناية بكل تفصيلة كبيرة وصغيرة ممكن فعلا تاخد وقت, احنا النهردة جيبنلكم 11 نصيحة مهمة لجمالك عشان تسرع حياتك وتخلي العناية بمكياجك, شعرك, بشرتك, ضوافرك وحتي برفانك أسهل, يلا نبدأ؟
1- إيه أحسن اماكن تحطي فيها برفان عشان يدوم طول اليوم؟
أحسن أماكن تحطي فيها برفان هي, ورا الودن والرقبة وديه الاماكن المعروفة, فيه 3 اماكن تانيين مهمين هما, المعصم, داخل منطقة الكوع, و ورا الركبة.
2 – تعملي ايه مع قلم الكحل الناشف؟
لو قلم الكحل بتاعك نشف وبيوجعلك عنيكي وإنتي بترسميها, بدل ماترميه جربي تسيحي السن بتاعه على ولاعة, هتلاقيه بقي تحفه وبيرسم العين كأنه جيل أو ايلينر سائل.
3 – تعملي ايه لو عايزة تبيني شفيفك اتخن وتكون بارزة أكتر؟
جربي إنك بعد ماتحطي الروج بتاعك عادي, جيبي ايشادو يكون بيلمع وحطي طبقة خفيفة علي شفايفك اللي تحت, هتلاقيه ادي تأثير وخلي شفافيك تبان اكبر من حجمها وبارزة.
4- إزاي تحطي المانيكير الفرنش لنفسك؟
جيبي أي اسورة من المطاطين دول ولفيها كويس حوالين صوابعك وحطي طبقة المانيكير الفرنش وخليكي مسكاها لمدة 30 ثانية بس وبعدين شيليها وكملي باقي الصوابع
5- عايزة ترتاحي من شعرك المقصف؟
اقسمي شعرك نصين, ولفي كل نص وباقي الشعر اللي مش هيبقي ملفوف ده بيبقي الشعر المقصف, ممكن تقصيه بحذر وترتاحي من الشعر المقصف.
6- إزاي تثبتي الايشادو؟
لو الايشادو بتاعك بيسيح ومش بيكمل معاكي اليوم, حطي علي عينك طبقة من الكونسلير أو من الايشادو الأبيض تحت اللون الأساسي, هتلاقي الايشادو ثبت وكمان شكله بقي احلي ولونه بقي بارز أكتر.
7- اسهل طريقة لرسم المانيكير:
حطي طبقة مانيكير ملونة, وبعدين حطي لزق بلاستر الجروح المخرم, وبعد كدة حطي طبقة لون مختلف وسيبه لمدة 10 دقايق, بعد ماتشيليه هتكوني عملتي احلي واسهل شكل مانيكير منقط.
8- طريقة وضع الكونسلير الصح:
الكونسلير مفروض يتحط تحت العين علي شكل مثلث, يعني من تحت العين لحد جنب الأنف ومش علي شكل نص دايرة, نص الديرة بتخلي تحت العين يبان منفوخ ومكلعكع.
9- إزاي اخلي رموشي تبان أطول؟
حطي طبقة ماسكرا, وبعدين حطي من بودرة الأطفال طبقة علي طرف الرموش, وبعدين ارجعي حطي طبقة ماسكرا تانية, ده هيديكي شكل طويل وكثيف للرموش.
10- إزاي تخلي شفايفك مدورة؟
استعملي قلم تحديد شفايف, و تعملي علامة x في نص الشفايف اللي فوق, وبعدين كملي باقي الخط من الجنب خالص, واخر خطوة إنك تملي شفايفك بالروج.
10- من اسهل طرق الشعر الكيرلي:
بعد غسيل شعرك اعملي 4 أو 5 ضفاير, وبعدين امشي عليه بمكوة عريضة, فوكيه وكدة هتكوني عملتي شعرك كيرلي.
