إزاى تتعاملى مع الرجل البخيل ؟
كثير من بنات حوا بيكنشفوا ان الرجل اللى فى حياتهم حريص او بخيل شوية و ده بيأثر على علاقتهم جدا اذا كان فى اساسيات و مطالب الحياة او حتى فى وقت الهدايا و المناسبات . معظم الرجالة البخيلة بيكون فيها صفة الانانية كمان يعنى ممكن يشترى لنفسه و ينساكى . ازاى تتعاملى مع الصفة دى او مع الرجل البخيل و تتجاوزى المضايقات اللى بتحسى بيها بسببها تعالوا نعرف…
النصيحة الاولى : حاولى تفهمى تصرفاته
قبل ما تحكمى عليه انه بخيل لازم تتأكدى هو ليه بيتصرف كده هل ده بخل و لا هو خايف من المستقبل و بيحوش و لا هو بيحب يصرف فى الحجات القيمة بس ؟ هل مرتبه مش بيكفى و لا هو مخصص فلوسه لنفسه و بس.
النصيحة التانية : اتكلمى معاه
لو الموضوع زاد عن حده لازم تتكلمى معاه بس بس الاول قبل ما تتكلمى حاولى توضحيله بطريقة غير مباشرة زى مثلا احكيلوا عن موقف حصل لواحدة تعرفيها و قد ايه اضايقت من جوزها او خطيبها فى بخله و عدم اهتمامه بطلباتها و لو محسش ابدأى قوليلوا انك مضايقة و محتاجة اهتمام منه اكثر من كده فى تنظيم المصاريف و الاولويات .
النصيحة التالتة : الحب بيصنع المعجزات
حاولى تخليه يحس انك دايما بتقدريه و قد ايه هو بيتعب عشان يريحك و يجيب الفلوس دى و كمان حاولى تجيبيله هدية لطيفة.فى المرحلة دى بعد لما تتكلمى معاه عشان تجيبى نتيجة لازم يعرف اد ايه انتى بتحبيه وان مش اساس حياتكم الفلوس و لا هى محور النقاش الرئيسى لازم يفهم ان حياتكم عشان تمشى اساها بيكون التفاهم و المودة و بعد كده تيجى الفلوس .
بدل ما تبدأى تهدديه و تتعصبى عليه كثير وتقولى انه مش بيجيبلك حاجة ولا بينفز طلباتك ابدأى حل المشكلة بطريقة تانية . خليكى رقيقة فى طلباتك زى مثلا : حبيبى انا و انت اخر مرة اتفسحنا فى مكان حلو امتى ؟ طيب ايه رأيك لوخدنا لفلان او فلانة حاجة بسيطة معانا ده احنا بقالنا كتير مزورنهمش و …الخ.
النصيحة الرابعة : الإتفاق
حاولي توصلي لاتفاق معاه, علي مبلغ معين اللي مفروض تكونى بتصرفوه كل شهر أو كل أسبوع, وحوالي متخروجشي في المصاريف برة الرقم ده , ده اتفاق ممكن يريحك ويريحه هو كمان. وحاجة مهمة جدا لو ينفع تشاركيه في مصاريفك يوم بـيوم عشان يكون فاهم إنتي صرفتي في إيه وليه ده ممكن يخليه يطلع بره دايرة الانانية اللي هو عايش فيها.
النصيحة الخامسة : اهتمى بنفسك وكونى صاحبة قرار
اهتمى بنفسك جدا لو ينفع تشتغلى وتجيبى فلوس بنفسك اشتغلى واهتمى بيبتك واولادك. حاجة تانية لازم تركزى فيها انك تكوني ماسكة زمام الامور فى البيت فى حجات معينة وريله انك تقدرى تاخدى قرارات و انك تقدرى تنظمى المصروف, الموضوع ده ممكن يخليه يحب يشارك فى اى حاجة فى البيت و يبعد شوية عن الانانية.
النصيحة الاخيرة : متتجوزيش واحد بخيل!
اكيد فى فترة الخطوبة هيبان انه مقتصد جدا فى الهدايا و لما بتخرجوا بيختار ارخص الاماكن او بيفكر انكم متاكلوش بره كثير و لو لقاكى نفسك فى حاجة بيعمل مش واخد باله ده طبعا فى حالة انك عارفة ظروفه المادية انه يقدر على كده و مش بيعمله . نصيحة فكرى فى قراراتك كويس عشان هتتعبى كثير مع النوع ده ومش هيتغير بسهولةوفي النهاية هتضطري إن إنتي اللي تغيري من طريقة حياتك عشانه .
ولو واحدة فيكم يا بنات عدت بتجربة مع واحد بخيل يا رت تقولنا علي خبرتها وإزاي قدرت تتعامل معاه أو تحكيلنا علي مواقف حصلت مابينهم عشان نستفيد منها.
