5 طرق لعمل طاجن اللحمة في العيد

أنجي سليمان
أنجي سليمان
12048

طواجن اللحمة متنوعة وبتتعمل بأكتر من طريقة، وبما ان احنا دخلنا في موسم عيد الاضحى يبقى محتاجين ننوع اطباق اللحمة اللي حنقدمها في العزومات وعلى السفرة كل يوم، وزي ما بنات حوا معوداكم بمحاولاتها مساعدتكم طول الوقت، جيبنالكم النهاردة 5 طرق لعمل طاجن اللحمة وتقديمه في عزومات العيد.

5 طرق لعمل طاجن اللحمة

1- طاجن اللحمة الاورما:

الوصفة دي محتاجة لحمة متقطعة مكعبات صغيرة ومش شرط تكون سهلة التسوية لأنها حتدخل الفرن فترة طويلة

المكونات:

  • كمية من اللحمة متقطعة مكعبات صغيرة
  • ملح
  • فلفل اسود
  • شطة (اختياري)
  • ورق لورى
  • ثوم بودرة
  • بصل بودرة
  • حبهان بودرة
  • فصين او تلاتة مستكة
  • معلقة كبيرة زبدة
  • فصين توم مفرومين
  • بصل اورما صغير موجود عند الخضري او في السوبر ماركت وهو بصل عادي بس حجمه صغير زي بتاع المخلل (نص كيلو بصل لكل كيلو لحمة)

طريقة التحضير:

  • سخني الزبدة كويس جدا وحطي فيها المستكة تسيح
  • نزلي اللحمة وقلبيها تقليبتين لغاية ما يبقى لونها بني فاتح
  • حطي الفلفل الاسود والشطة والبصل والتوم البودرة والحبهان البودرة وورقتين اللورى وقلبيهم كويس
  • زودي كوبايتين ماية وسيبيهم مع اللحمة لغاية ما تتشرب الماية وقلبي من وقت للتاني
  • في طاسة تانية حطي شوية زبدة وشوحي فيهم البصل لغاية ما يدبل
  • حطي عليهم فصين التوم وقلبي لغاية ما يبقى التوم دهبي بس من غير ما تحمري البصل
  • حطي اللحمة على البصل وقلبيها شوية تاخد من طعمه
  • في طاجن الفرن او صينية حطي اللحمة والبصل وحوالي 3 كوبايات ماية مكان سلق اللحمة وبعدين ضيفيهم على الطاجن
  • غطي الطاجن بالغطا الفخار او ورق الفويل ودخليه الفرن على حرارة متوسطة وسيبيه لغاية ما يتشرب ويبقى الصوص بتاعه تقيل
  • شيلي الغطا في الاخر وشغلي الشواية عشان الوش يتحمر وقدميه
طرق لعمل طاجن اللحمة 1
طرق لعمل طاجن اللحمة 1

2- طاجن اللحمة بلسان العصفور:

الطاجن ده بيحتاج لحمة مسلوقة 3/4 سلقة ماينفعش تتعمل مع لحمة نيئة، وقطعية اللحمة ترجعلك سواء مكعبات او شرائح بدهون او لأ المهم تكون 3/4 سوي

المكونات:

  • مقدار من اللحمة
  • مقدار من لسان العصفور (كيس المكرونة على كيلو اللحمة)
  • 3 ثمرات بصل متقطعة جوانح
  • 2 فلفل رومي اخضر متقطع شرايح
  • 2 فلفل رومي متقطع شرايح
  • 2 ثمرة طماطم متقشرة ومتقطعة مكعبات
  • كوباية عصير طماطم متصفية
  • كوبايتين من شوربة اللحمة
  • ملح + فلفل اسود
  • 2 معلقة سمنة او زبدة
  • حبهان مطحون

طريقة التحضير:

  • في حلة او طاسة غويطة حطي اللحمة مع البصل المتقطع والطماطم والفلفل المتقطعين واخلطيهم كويس جدا مع التوابل
  • حطي عليهم كوباية من الشوربة وسيبيهمك على النار اول ما تغلي الشوربة طفي النار
  • حمري لسان العصفور في معلقتين السمنة
  • هاتي طاجن الفخار او البايركس وحطي فيه اللحمة والفلفل والبصل مع لسان العصفور وزودي كوباية الشوربة وعصير الطماطم
  • غطي المزيج ودخليه الفرن ربع ساعة على نار متوسطة
  • شيلي الغطا من عليه وسيبي وشه يتحمر وبعدين قدميه
طرق لعمل طاجن اللحمة (2)
طرق لعمل طاجن اللحمة (2)

3- طاجن اللحمة بالخضروات:

في الطاجن ده حنحتاج لحمة سهلة السوي شوية وتكون متقطعة مكعبات زي الفلتو مثلا او اي لحمة تصلح للطبخ

المكونات:

  • مقدار من اللحمة متقطعة مكعبات
  • 2 ثمرة بطاطس متقطعة مكعبات
  • باذنجان رومي متقطع مكعبات
  • ثمرتين كوسة متقطعة حلقات
  • ثمرتين جزر متقطع مكعبات
  • ربع كيلو بسلة
  • ربع كيلو فاصوليا خضراء متقطعة
  • فلفل رومي اخضر والوان متقطع شرايح
  • 2 ثمرة بصل متقطع حلقات او جوانح
  • 3 قص توم مهروس
  • كوبايتين عصير طماطم متصفية
  • معلقتين صلصة طماطم متدوبة في كوباية ونص ماية
  • ملح وفلفل اسود وبهارات
  • فصين مستكة
  • معلقة سمنة

طريقة التحضير:

  • حطي السمنة في حلة غويطة وسيحي فيها المستكة
  • حمري فيها اللحمة شوية لغاية ما تتشرب مايتها ويبقى لونها بني
  • شيلي اللحمة في طبق خارجي
  • حمري البصل مكان اللحمة لغاية ما يبقى لونه اصفر
  • ضيفي التوم لغاية ما الاتنين يبقى لونهن دهبي
  • حطي الخضار والتوابل وقلبيهم كويس مع البصل والتوم المتحمرين لغاية ما الخضار ياخد من لون وطعم البصل
  • هاتي طاجن الفخار او البايركس حطي نص الخضار وبعدين اللحمة وبعدين نص الخضار التاني
  • حطي الصلصة والطماطم فوق الخضار وغطيه بالفويل او الغطا الفخار ودخليه الفرن على حرارة متوسطة لغاية ما اللحمة تستوي
  • شيلي الغطا وشغلي الشواية عشان الوش يتحمر وبعدين قدميه
طرق لعمل طاجن اللحمة 2
طرق لعمل طاجن اللحمة 2

4- طاجن اللحمة التركي بالموتزاريلا:

الطاجن ده مميز جدا وطعمه مختلف وهو ممكن يتعمل بلحمة متقطعة صغيرة زي الشاورما او ممكن يتعمل بلحمة مفرومة ومعمولة زي الكفتة على شكل كور او اصابع عشان مش بيتحط فترة طويلة على النار فهو محتاج لحمة بتستوي بسرعة

المكونات:

  • مقدار من اللحمة متقطعة شاورما او معمولة زي الكفتة متتبلة ومعمولة كور او اصابع
  • بصل متقطع جوانح او شرايح
  • 2 فص توم مهروس
  • ملح وفلفل اسود والتوابل المفضلة عندك
  • فلفل رومي اخضر متقطع شرايح
  • فلفل رومي الوان متقطع شرايح
  • كوباية عصير طماطم معصورة ومتصفية
  • جبنة موتزاريللا

طريقة التحضير:

  • حمري البصل في السمنة لغاية ما يبقى لونه دهبي
  • حطي عليه التوم وقلبيه لغاية ما يتحمر
  • حطي الفلفل الرومي الاخضر والالوان وقلبيهم كويس
  • حطي الطماطم والتوابل وسيبيهم يغلوا شوية حوالي ربع ساعة او تلت ساعة ما الطماطم تتسبك
  • اتقلي الخليط كله في الفخار او البايركس
  • غطي الوش بالجبنة الموتزاريلا
  • وحطيه في الفرن عادي على درجة متوسطة لغاية ما الجبنة تسيح والطماطم تبقى سميكة شوية
  • شغلي الشواية لغاية ما الوش يحمر وقدميه سخن
طرق لعمل طاجن اللحمة (3)
طرق لعمل طاجن اللحمة (3)

5- طاجن اللحمة بالبطاطس:

في الطبخة دي حنحتاج لحمة سهلة السوي او لحمة نص مسلوقة ولو صعبة السوي ممكن نستخدم حلة الضغط

المكونات:

  • مقدار من اللحمة
  • بطاطس متقطعة طرنشات
  • ثمرة بصل متقطعة حلقات
  • فلفل رومي متقطع طرنشات
  • طماطم متقشرة ومتقطعة طرنشات
  • كوبايتين عصير طماطم معصورة ومتصفية
  • ملح وفلفل وتوابل
  • معلقتين سمنة

طريقة التحضير:

  • حمري البصل في معلقتين السمنة كويس لغاية ما يبقى لونه دهبي
  • ضيفي عليهم اللحمة وقلبيهم كويس لو كانت اللحمة نية ممكن تحطي كوباية ماية وتسيبيها لغاية ما تتشرب ولو كانت مسلوقة او نص مسلوقة حطي كوباية من عصير الطماطم وقلبيها شوية لغاية ما الطماطم تغلي
  • ادعكي البطاطس مع الملح والتوابل
  • رصي البطاطس ومعاها اللحمة في الطاجن
  • رصي طرنشات الفلفل والطماطم على وش الصينية
  • صبي عليهم صلصة الطماطم لغاية ما تغطيهم
  • غطي الصينية بالغطا الفخار او ورق الفويل ودخليها الفرن على حرارة متوسطة لغاية ما اللحمة والبطاطس يبقو مستوين كويس
  • اكشفي الوش وسيبيهم تحت الشواية شوية لغاية ما الوش يحمر وبعدين قدميها
طرق لعمل طاجن اللحمة (4)
طرق لعمل طاجن اللحمة (4)

مقالات متعلقه

احلى اماكن الفطار والسحور في اسكندرية

احلى اماكن الفطار والسحور في اسكندرية

افكار جديدة لعمل الشوربة في رمضان السنة دي

افكار جديدة لعمل الشوربة في رمضان السنة دي

تطبيقات رمضان للاندرويد والايفون

تطبيقات رمضان للاندرويد والايفون