قطعيات اللحم البقري واستخداماتها

أنجي سليمان
أنجي سليمان
26923

بدأ العيد الكبير (عيد الاضحى) وكل سنة وانتم طيبين، وهدية بنات حوا ليكم في العيد هي المقال ده النهاردة اللي حنساعدكم فيه تعرفوا قطعيات اللحم البقري واستخداماتها ، تابعي معانا وانت تعرفي حتستخدميها ازاي في العيد.

قطعيات اللحم البحري واستخداماتها:

بيتقسم اللحم البقري الى مجموعة من القطعيات متقسمة كالاتي:

قطعيات اللحم البحري واستخداماتها
قطعيات اللحم البحري واستخداماتها

اولا: مقدمة الذبيحة:

  • لحمة الرأس: بينفع للسلق والشوربة.
  • اللسان: بيتسلق ويتحمر بعدها.
  • المخ: تسوية بالبخار او السلق وبعديم تحمير بالبيض والبقسماط.
  • الرقبة: لحم بالعضم للسلق والشوربة.
  • الدوش: ودي المنطقة اللي بتيجي بعد الرقبة وبتسبق الارجل اللي قدام وهي صعبة السوي شوية عشان كده الافضل انها تتفرم او تتسلق جامد.
  • الموزة الامامية: وهي الارجل الامامية ولحمها بيكون جامد شوية عشان فيها عضلات واربطة فبتحتاج وقت طويل شوية في الطهي واحسن حاجة لها هي السلق والطواجن.

ثانيا: الجسم ومؤخرة الذبيحة:

  • الزند: وهي المنطقة بعد الرقبة بيستخدم للسلق وممكن يتعمل مع طاجن الخضار.
  • الريش: وهي الضلوع و الريش وبتتعمل بأكتر من طريقة مشوية في الفرن او طاجن او غيرها من الطرق المعروفة للريش.
  • الاننتركوت: شرائح الشوي وبتقطع فيليه وطرنشات بتتعمل ستيك مشوي على الفحم او الشواية.
  • عرق الفلتو: وده موجود في الضهر من داخل الضلوع وبيستخدم في اكتر انواع الطبخات او السلق او الشوي وهو اكتر حتى في البقرة او الجاموسة بتستوي بسرعة.
  • الكولاتة: وده الجزء اللي قبل المؤخرة والفخدة على طول، وبيتسخدم كشرايح للشوي او في السلق والشوربة.
  • العكاوي: وهي اللحمة اللي في القرب من الديل وبتبقى فيها نسبة كبيرة من الدهون وكمان بتستغرق شوية وقت زياده في السلق لكن الشوربة بتاعتها بتبقى دسمة وقوية وممكن بعد السلق اللحمة نفسها يتعمل بيها طاجن في الفرن.
  • الموزة الخلفية: بيتاخد منها لحم بيتقطع مكعبات ويستخدم في السلق والطبخ.
  • عرق التربيانكو: ومعروف كمان باسم اللحمة الباردة وده بيتربط وبيتسلق كويس جدا وبعدين بيتقطع رقيق جدا وبيتحمر او يتاكل مسلوق بيبقى طعمه مميز جدا.
  • السمانة: وبيستخدم اللحم في المنطقة دي للسلق والطبخ.
  • هبرة البطن: لحم رقيق بيستخدم في الفرم اكتر من السلق او التقطيع عشان بيبقى لين وفيه دهون كتير وله طعم مميز جدا.

ثالثا: الاجزاء الداخلية:

  • الكبدة: وممكن تتقطع شرايح للشوي او تتقطع رفيع للكبدة الاسكندراني.
  • الكلاوي والقلب: بتقطع شرايح وبتتعمل زي الكبدة الاسكندراني بس بتاخد شوية وقت للسوي اكتر من الكبدة.
  • العصبان: ودي بتتنضف من الداخل والخارج وبتتحشي لحمة وتبقى سجق او تتجشي خلطة ارز وخضروات وتبقى ممبار.

مقالات متعلقه

احلى اماكن الفطار والسحور في اسكندرية

احلى اماكن الفطار والسحور في اسكندرية

افكار جديدة لعمل الشوربة في رمضان السنة دي

افكار جديدة لعمل الشوربة في رمضان السنة دي

تطبيقات رمضان للاندرويد والايفون

تطبيقات رمضان للاندرويد والايفون