ازاي تختاري تسريحة الشعر المناسبة علي حسب شكل وشك

بقلمأنجي سليمان فيشعر visibility15957

تسريحة الشعر من اكتر الحاجات اللي بتغير في اللوك بتاعك وممكن تغيره تماما، لكن قبل ما تختاري قصة وتسريحة الشعر لازم الاول تعرفي هي هتليق مع وشك ولا لأ، وعشان نسهل عليكي القرار جيبنالك كل شكل من اشكال الوش والتسريحة اللي بتليق معاه، اقري الموضوع واتعرفي معانا على التسريحة المناسبة لشكل كل وش..

التسريحة المناسبة لشكل الوش

الخطوة الاولى:

عشان تقدري تحددي القصة المناسبة ليكي أول خطوة هي إنك تحددي شكل وشك، واشكال الوش واحد من دول ولو مش عارفة شكل وشك شوفي الموضوع ده بيشرحلك إزاي تعرفي بالتفصيل.

أنواع الوشوش
أنواع الوشوش

الخطوة الثانية:

دلوقتي بعد ما حددتي شكل وشك تقدري تختاري التسريحة  المناسبة ليكي على الاساس ده، وكل واحد من اشكال الوشوش دي له مجموعة من القصات اللي بتليق عليه، اعرفي التسريحات وشوفيها واختاري منها اللي يعجبك.

1- تسريحات الوش المدور:

هو الوش اللي بتبقى فيه الجبهة عريضة، والخدود مليانة والدقن مدورة، وده بتليق عليه قصات شعر كتير لكن لازم يبقى فيها شوية ملحوظات اهمها دول.

الوش المدور
الوش المدور
  • التدريج اللي مش متماثل من الناحيتين:

 يعني الشعر يبقى متدرج بس الناحية اليمين مش شرط تقى بالظبط شكل الشمال بالاضافة كمان لأن القصة تكون على جنب والقصة قصيرة من ناحية الجنب وطويلة من الناحية التانية زي الصورة كده.

التسريحة المناسبة لشكل الوجه

  • التدريج على قصير:

 وده  في حالة ان الشعر يكون خفيف مش من النوع الكثيف عشان مايعملش كثافة ووتخن للوش، يعني لو شعرك خفيف ممكن تختاري الفرق من النص او الجنب وتعملي التدريج قصير بعد طول الكتف بشوية ويبدا التدريج من تحت شوية ناحية عضم الفك مش من بعد الودن.

التسريحة المناسبة لشكل الوجه

  • ديل الحصان الناعم:

لو كان وشك مدور يبقى ممكن تعملي تسريحة ديل الحصان لو كان شعرك طويل و”لييس” مافيهوش تدريجات او مش معمول كيرلي ولما ترفعي ديل الحصان تشيلي الشعر من على الودان ويفضل كمان انك ماتسيبيش القصة نازلة على الجبهة عشان ماتبينش الوش مليان.

التسريحة المناسبة لشكل الوجه

  • الكارية الهايش:

التسريحة دي لها شرط ضروري ان يكون طول العنق متوسط او طويل يعني مش بتليق مع البنات اللي رقبتهم قصير، ودي عبارة عن الشعر كارية طويل شوية في نص الرقبة ومايحصلش الكتف وفي نفس الوقت طولة من تحت مش متساوي بالظبط في شوية تدريج بسيط جدا، اما طريقة تسريحة فهي بتحتاج تتكربچ شوية او تتنفش بالمشط  يعني ماتبقاش ناعمة اوي ومتهدلة.

التسريحة المناسبة لشكل الوجه

  • القصير الناعم جدا “البيكسي كات”:

التسريحة دي بتليق مع الناس اللي بيحبوا الشعر الجارسون او القصير خالص لكن لازم يبقى الوش مش تخين اصلا يعني يكون الوش مدور لكن مش مليان، بيتقص بشكل ناعم ومش منتظم قصير جدا لكن شرط ان يكون في قصة نازلة على الوش عشان مانظهرش الخدود ممتلئة اوي، وبيتسرح بسيرم او زيت شعر عشان يبقى ناعم ولامع.

التسريحة المناسبة لشكل الوجه

  • الكارية الويفي:

التسريحة بتبقى رقيقة جدا مع الوش المدور وبتليق مع الشعر اللي طبيعته في كيرلي بسيط، هي كارية طويل شوية مقرب من طول الكتف وفي نفس الوقت متدرج والقصة ببتقص على الناحيتين مع الفرق من الجنب مش من النص بس القصة بتحاوط الوش من الناحيتين واقصر شوية من طول الكارية، والشعر بيتسرح متكربچ مش املس ممكن تستخدمي سيرم بيعمل ڤوليوم للشعر.

التسريحة المناسبة لشكل الوجه

2- تسريحات الوش البيضاوي:

الوش البيضاوي هو اللي بتبقى فيه الجبهة عريضة وعضم الخدود مرتفع والدقن رفيعة او مدببة، وده كمان بيحتاج لمجموعة من الملحوظات عشان قصات الشعر تبقى مظبوطة معاه ومتظهرهوش طويل زي مثلا:

الوش البيضاوي
الوش البيضاوي
  • القصة الرش:

لو كان شعرك طويل ماتسيبيش القصة تبقى بنفس طول الشعر لكن اعملي قصة رش كثيفة تنتهي عند خط الحواجب عشان تقطع المظهر الطولي للشعر والوش وتخلي الوش شكله مستدير شوية وتظهر نعومة الشعر.

التسريحة المناسبة لشكل الوجه

  • الحركة:

مش شرط تدرجي الشعر او تقصيه عشان تعملي فيه حركة سواء كان شعرك عند طول الكتف او اطول، ممكن تدخلي الحركة على شعرك عن طريق الخصلات الويفي او الكيرلي الواسع والفرق اللي مش منتظم يعني بيبقى اقرب لزجزاج مش من النص ولا من الجنب ولكن دخلي خصل بشك غير منتظم عشان مايبقاش الفرق حاد اوي وظاهر.

التسريحة المناسبة لشكل الوجه

  • القصير المدرج:

الشعر القصير مع الوش البيضاوي بيحتاج مايبقاش قصير اوي بيفضل انه يبقى لامس العضم بعد الرقبة، ويبقى الشعر متدرج في طبقات كتير ومش متساوي، اما بالنسبة للقصة فيفضل انها تفضل طويلة وناعمة برضه نفس الحكاية يبقى في حركة في الشعر حوالين الوش عشان مايظهرش طويل.

التسريحة المناسبة لشكل الوجه

  • الجرسون مع القصة الطويلة:

اما بالنسبة لمحبي الشعر الجرسون القصير خالص فبيفضل القصة الحادة الاطراف اللي واضح فيها خصل الشعر وبتظهر الرقبة والودان مع القصة الكبيرة على جنب.

التسريحة المناسبة لشكل الوجه

3- تسريحات الوش المربع:

الوش ده اللي بيبقى فيه القورة عريضة وعضم الخدود عريض وخط الفك واضح وبارز في شكل مربع، واهم حاجة في اختيارك لتسريحات الوش المربع ان خصلات الشعر تحيط بالجزء التحتاني من الوش وعضم الفك اللي هو بيعمل الشكل المربع للوش.

الوش المربع
الوش المربع
  • التسريحة الهايشة:

ايا كان طول الشعر سواء طويل او متوسط حاولي تعتمدي التسريحة اللي بتخلي الشعر مكربچ وهايش مش منسدل ومتهدل على الوش وخصوصا من ناحية الجزء المحيط بعظم الفك، ويفضل طبعا ان انتي تخلي شعرك متدرج وتدربجاته تبدأ من فوق شوية من نص الرقبة تقريبا.

التسريحة المناسبة لشكل الوجه (12)

  • قصير مش متساوي الطول:

وده في حالة الشعر القصير لأن الوش المربع مش بيليق معاه الكارية اللي بيحيط بالوش، عشان كده بيليق معاه اكتر القصير اللي من الامام بيوصل لعضم الفك ومن ورا قصير وبيفضل ان القصة دي تتساب بطبيعة الشعر لو كان كيرلي شوية او تتعمل سشوار لكن مش لييس اوي، بس برضي لو بتفضلي التسريحات اللييس ممكن تعمليها كده وحتبقى جميلة.

التسريحة المناسبة لشكل الوجه

  • الطويل الكيرلي والويڤي:

لو شعرك طويل وعايزة تعمليه كيرلي بلاش تبدأي الكيرلي او الويڤي من فوق اوي لكن ابدأي من عند الودن ولغاية تحت عشان لو بدأتيه من فوق بيكبر حجم الوش وبيبرز عضم الفك شوية وده مش بيليق مع الوش المربع.

التسريحة المناسبة لشكل الوجه

  • الطويل اللييس:

اما لو بتحبي الشعر الاسترايت او اللييس فده اكتر حاجة بتليق مع الوش المربع وبتخلي المظهر جميل خصوصا لو الفرق مش من النص ولا من الجنب لكن بيبقى تلت وتلتين وده مش بيركز على اي جزء في الوش وبالتالي مش بيبرز الشكل المربع لعضم الفك.

التسريحة المناسبة لشكل الوجه

4- تسريحات الوش على شكل قلب:

وده الوش اللي بتبقى سماته الجبهة الضيقة والخدود المرتفعة والدقن الرفيعة المدببة، والتسريحات اللي بتناسب الوش ده هي التسريحات اللي بتملى المنطقة اللي حوالين الدقن عشان توازن الجزء بتاع عضم الوجنتين.

الوش علي شكل قلب
الوش علي شكل قلب
  • المتوسط الويڤي:

الشعر المتوسط الطول اللي بيوصل لغاية الكتاف او نهايو الرقبة بيبقى احسن لو كان طول واحد ومش متدرج والتسريحة المناسبة له انه يتعمل ويڤي ويتكربچ من الاطراف من بعد الودن لغاية تحت.

التسريحة المناسبة لشكل الوجه

  • التسريح الى الخارج:

ودي بتليق مع الاطوال المتوسطة والطويلة وهنا الشعر بيتسشور او بيتسرح مقلوب لبرة في اتجاه عكس الوش مع وجود قصة ناعم نازلة على جنب واحد والفكرة من التسريحة دي انها تاخد العين لبرة بعيد عن الوش عشان تبعد العين عن منطقة الدقن اوالخدود.

التسريحة المناسبة لشكل الوجه

  • الويڤي المدرج والقصة الطويلة:

التسريحة دي بتليق مع الشعر الطويل والتدريج بيكون في القرب من الاطراف من تحت مش من فوق يعني بالقرب من عضم الكتف مش من عند الرقبة خالص وبعدين التصفيف بيبقى ويڤي والقصة بتتساب ناعمة ومنسدلة سواء كان الفرق من الجنب او من النص عشان تداري عضم الوجنتين.

التسريحة المناسبة لشكل الوجه

  • الكارية القصير الناعم:

الشعر الكارية القصير جدا اقرب لجارسون من الحاجات اللي بتليق مع الوش على شكل القلب، الكارية بيبقى بعد الودن على طول وبيبقى ناعم جدا وبيتسرح لييس مع سيرم او كريم والقصة بنفس طول الشعر وبيفضل يكون الفرق من الجنب.

التسريحة المناسبة لشكل الوجه

شوفي كمان ازاي تقصي شعرك بنفسك في البيت ؟

ازاي تقصي شعرك بنفسك
ازاي تقصي شعرك بنفسك