ازاى تخلى حبيبك يحبك اكثر؟

العلاقة اللى بينك و بين حبيبك فى حياتك مهما كانت حلوة و ماشية و متفاهمين اوقات كثير بتحتاج منك مجهود انك تحافظى عليها و تخليها جميلة دايما و حاجة حلوة انك تكونى عارفة ان شريك حياتك هيفضل منجذب ليكى و بيحبك دايما . السطور الجاية فيها نصايح فعالة جدا “ازاى  تخلى حبيبك يحبك اكثر”؟

1 –  التقدير :

من اكثر الحجات اللى بتخلى زوجك او خطيبك يحبك و ينجذب ليكى لما يحس ان انتى نفسك منجذبة ليه . الرجل بيحب يحس انه دايما كسبان و انه احسن واحد فى الدنيا فى نظر الست اللى معاه . خليه يكون عارف انك مقدره كل حاجة بيعملها و بيوفرهالك ف البيت و اد ايه هو كويس معاكى فى معاملته و ان وجوده فى حياتك بيفرق .دلعيه كثير و قوليله كل حاجة يحب يسمعها  خدى رأيه فى مشاكلك و زودى ثقته بنفسه .

2 – تألقى :

فى بنات كثير مش بتهتم بنفسها بحجة انها مش بتفهم فى الموضة او ان معندهاش وقت او بيخلوا اللبس الجميل و التزويق ساعة المناسبات الخاصة بس و بيقولوا عادى ده جوزى و اتعود على شكلى او ده خطيبى و لازم يشوفنى على طبيعتى . اكيد دى حاجة صح انك متكونيش مصطنعة بس كمان لازم تهتمى بنفسك و تحاولى على قد ما تقدرى تتشيكى و تتجملى و تخليه يحس انه دايما قاعد مع جميلة الجميلات .

3 – ممنوع تنتقدى نفسك :

الرجل اللى هتكلمى معاه حياتك اختارك و حبك زى ما انتى بغض النظر عن انك شايفة نفسك او شكلك عامل ازاى او مضايقة من وزنك او طولك او لون بشرتك او اى عيب فيكى .هو مش شايف العيوب دى فيكى او شايفها و مش بيركز فيها فهو مش محتاج منك انك تفكريه بيها كل شوية لما تقعدى تتكلمى عليها قدامه و تحسسيه انك قليلة . الرجل بيعشق الست اللى واثقة فى نفسها مهما كان فيها ايه و بينجذب ليها جدا . خلى الثقة تبان فى كلامك و مشيتك و لبسك و كل حاجة فيكى .

4 – مستمعة هائلة :

اى راجل فى الدنيا بيحب الست الذكية اللى بتعرف تتكلم و تسمع كويس و تحتوى مشاكله و افكاره . خليكى مستمعة كويسة عشان تقدرى تجمعى الكلام منه و توصلى معاه لحل فى اى مشكلة بيحكيهالك و اعرفى ان دى فرصة كبيرة عشان الرجل مش بيتكلم بسهولة و بيفضفض كل فين و فين و لو عرف انك بتسمعيه كويس و بتفهميه هيحبك جدا و يقربلك و يجى يحكيلك عل كل حاجة . لما يكون بيتكلم اسمعيله و استنى يخلص و اسأليه اسألة عشان يحس انك مهتمة و لخصى كلامه او مشكلته فى كلمتك يعنى انت مضايق عشان كذا؟ طيب ايه رأيك تعمل كذا ؟ .

5 – ممنوع اللوم :

اكثر حاجة بتخلى الرجل يبعد عنك و يتجنب انه يقعد معاكى هو انك دايما تلوميه و تنتقدي اى حاجة بيعملها و بتضايق بأسلوب جامد او فيه اتهام كتير. يعنى لو حاجة مضايقاكى مثلا او حصل منه تصرف معجبكيش بلاش نبرة الكلام دى بتاعة انت علاطول مش بتهتم باللى بيضايقنى انت عمرك ما عملتلى حاجة ..الخ . اللى احسن من كده و هيجيب بجد نتيجة انه يربلك و يحبك و يعملك اللى انتى عايزاه هو الكلام بطريقة تانية . قوليله انا كان نفسى تعملى كذا طيب ايه رأيك لما نتخانق نتكلم بهدوء شوية و نحاول نفهم بعض..الخ .