افكار جديدة لسندوتشات المدرسة سهلة وسريعة

أنجي سليمان
أنجي سليمان
18869

بدأ موسم العودة للمدارس وكل سنة وانتم طيبين، وفي وسط روتين المدرسة والصحيان والنوم في مواعيد وترتيب الكتب والهدوم وغيرها بيبدأ التساؤل اللي بيجي على بال كل ام، حنعمل ايه للولاد في الساندوتشات؟ واحيانا بيكون السؤال من ناحية الولاد نفسهم لما بيعبروا عن الملل والزهق من السندوتشات المعتادة اللي بياخدوها معاهم كل يوم، وزي ما عودناكي نفكر معاكي في كل مشكلة ونساعدك تلاقي الحل، فإحنا النهاردة جيبناللكافكار جديدة لسندوتشات المدرسة سريعة وصحية 

افكار جديدة لسندوتشات المدرسة

دي مجموعة من الافكار المتنوعة للجبنة والفراخ واللحمة والتونة والبيض تقدري تعملي منيو متنوع للاسبوع كله منها وتقدمي كل يوم فكرة جديدة وكلها افكار سهلة وسريعة

1- سندوتشات البيض:

سلطة البيض المسلوق:

افكار جديدة لسندوتشات المدرسة
افكار جديدة لسندوتشات المدرسة

المكونات:

  • 2 بيضة مسلوق كويس مش طري
  • معلقة كبيرة مايونيز
  • ربع معلقة صغيرة مستردة
  • رشة صغيرة بودرة توم
  • رشة صغيرة بابريكا
  • رشة صغيرة فلفل اسود
  • فلفل رومي مبشور رفيع جدا
  • شرايح خس
  • مكعبات طماطم من غير البذر والماية بتاعتها

الطريقة:

  • قشري البيض وقطعة مكعبات صغيرة بقطاعة البيض او السكينة
  • في بولة حطي المايونيز والمستردة والتوابل وقلبيهم كويس جدا
  • حطي الفلفل المبشور والطماطم مع المايونيز وقلبي
  • ضيفي عليهم البيض واخلطيهم كويس من غير ما تهرسي البيض
  • افتحي العيش وحطي شرايح الهس وفوقها وزعي خليط البيض بالمايونيز
  • لفي العيش كويس في ورق التغليف عشان تحافظي عليه طول اليوم

البيض المقلي بالخضروات:

افكار جديدة لساندوتشات المدرسة 1
افكار جديدة لساندوتشات المدرسة 1

المكونات:

  • بيضة كبيرة
  • بطاطس مبشورة ومسلوقة
  • بقدونس متقطع رفيع جدا
  • طماطم متقطعة مكعبات
  • شبت متقطع رفيع جدا
  • معلقة صغيرة دقيق
  • معلقة كبيرة حليب
  • ملح وفلفل
  • شرايح خس
  • خيار مخلل شرايح

الطريقة

  • اضربي البيضة كويس مع معلقة الدقيق والحليب والملح والفلفل
  • حطي معلقة سمنة صغيرة في الطاسة على النار وسخنيها
  • ارمي فيها البطاطس وقلبيها وبعدين الطماطم وبعدين الشبت والبقدونس وقلبيهم كويس جدا
  • حطي عليهم البيض المخفوق ووزعي البيض كويس على الخضار عشان ما يتجمعش في جزء واحد
  • لما البيض يستوي اقلبيه على الناحية التانية وسيبية يتحمر نص دقيقة
  • افتحي العيش وحطي طبقة من الخس وشريحتين من الخيار وبعدين اقطعي البيض على مقاس العيش وحطيه معاهم
  • لفي العيش كويس في ورق التغليف عشان تحافظي عليه لغاية ميعاد الاكل

2- سندوتشات الجبنة:

الشيدر بالتفاح:

افكار جديدة لساندوتشات المدرسة 2
افكار جديدة لساندوتشات المدرسة 2

دي اكلة حلوة مش حادقة يعني لو اولادك بيفضلوا الاكل الحلو حتبقى جديدة وجميلة

المكونات

  • تفاحة
  • معلقة عسل
  • شراح جبنة شيدر رفيعة جدا
  • عيش كيزر او فينو

الطريقة

  • قطعي التفاح شرايح رفيعة
  • حطي الطاسة على النار وامسحيها بشوية سمنة او زيت وحطي فيها التفاح ولما يتحمر اقلبيه على الوش التاني
  • افتحي العيش وادهنية عسل من جوة
  • رصي شرايح التفاح وفوقيها الجبنة الشيدر
  • دخلي العيش المايكروويف او الفرن دقيقة لغاية ما الجبنة تسيح
  • لما يستهدى بعد خمس دقايق لفيه بورق التغليف

عشاق الجبنة:

افكار جديدة لساندوتشات المدرسة 3
افكار جديدة لساندوتشات المدرسة 3

المكونات

  • جبنة بيضا (يفضل فيتا او ملح خفيف)
  • فلفل احمر مبشور رفيع (رومي)
  • حلقات زيتون اسود
  • جبنة ررومي مبشورة
  • شرايح خس
  • رشة كمون
  • نص معلقة صغيرة زيت زيتون

الطريقة

  • اهرس الجبنة البيضا مع الفلفل المبشور ومعلقة زيت الزيتون
  • اخلطي معاه حلقات الزيتون والجبنة الرومي
  • افتحي العيش وحطي طبقة من الخس وفيها طبقة من الجبنة ورشي الكمون على الوش
  • غلفيه كويس بورق التغليف عشان تحافظي على شكله

3- ساندوتشات الفراخ:

شاورما الفراخ (او اللحمة)

افكار جديدة لساندوتشات المدرسة 4
افكار جديدة لساندوتشات المدرسة 4

المكونات

  • 2 او 3 قطع صدور فراخ مخلية ومتقطعة رفيع (ممكن تستبدليها بلحمة مسلوقة ومتقطعة رفيع)
  • معلقة كبيرة زبادي
  • معلقة صغيرة صلصة
  • ملح
  • فلفل
  • كمون
  • بابريكا
  • جنزبيل بودرة
  • عصير ليمونة
  • معلقة زيت
  • بصلة صغيرة مبشورة
  • فصين توم مبشورين
  • طماطم متقطعة مكعبات
  • فلفل رومي متقع رفيع جدا
  • عيش
  • سلطة طحينة
  • شرايح خيار مخلل

الطريقة

  • اخلطي الفراخ المتقطعة مع الزبادي والصلصة والتوابل (ملح وفلفل وكمون وباربريكا وجنزبيل) وهصير ليمونة في بولة وسيبيهم مع بعض على رف التلاجة
  • في طاسة على النار حمري البصل في معلقة الزيت ولما يبقى لونه دهبي حطي الثوموحمري الاتنين لغاية ما يبقى لونهم دهبي
  • حطي الفلفل الرومي وقلبي معاهم وبعدين ضيفي الفراخ بالخلطة بتاعتها وقلبيهم شوية وزودي ربع كوباية ماية وغطيهم
  • لما الماية تقرب تتشرب قلبيهم كويس مع بعض ولغاية ما الماية تختفي حطي الطماطم وقلبيهم شوية لغاية ما الطماطم تبقى طرية شوية وبعدين طفي عن النار
  • افتحي العيش وادهنيه بالطحينة وبعدين شرايح الخيار المخلل وبعدين حطي الشاورما
  • لما يستهدى شوية غلفية بورق التغليف

كفتة الفراخ:

افكار جديدة لساندوتشات المدرسة 5
افكار جديدة لساندوتشات المدرسة 5

المكونات

  • 2-3 صدور فراخ مخلية ومفرومة في الكبة
  • ثمرة بطاطس صغيرة مسلوقة كويس
  • بقدونس مفروم
  • ملح وفلفل
  • بصل بودرة
  • ثوم بودرة
  • بيضة
  • بقسماط مطحون ناعم
  • زيت للقلي
  • طماطم شرايح
  • خس شرايح
  • مايونيز او سلطة طحينة
  • شرايح جبنة شيدر (اختياري)

الطريقة

  • اهرسي البطاطس كويس جدا بالشوكة واخلطيها مع الفراخ المفرومة والبقدونس المفروم
  • اضربي البيض مع الملح والفلفل والثوم والبصل البودرة (لو مش متوفرين استبدليهم بأي بهارات تحبيها)
  • اخلطي البيضة مع الفراخ والبطاطس كويس لغاية ما تختفي البيضة ولو لقيتي الخليط ناعم حطي رشة دقيق واعجنيها معاه لغاية ما تمسك في بعض
  • شكلي الكفتة اصابع او دواير واغمسيها في البقسماط كويس من الجانبين
  • حطي الكفتة في الفريزر ربع ساعة (ممكن تعملي كمية كبيرة شوية وبعد ما تجمد في الفريزر حطيها في طبق من الفلين او كيس نضيف واحتفظيها بيها جاهزة للقلي)
  • طلعيها واقليها في الزيت الغزير
  • افتحي العيش وادهني مايونيز او طحينة
  • حطي شرايح الطماطم وشرايح الخس (وشرايح الجبنة) وبعدين الكفتة
  • غلفي الساندوتش وجهزيه للمدرسة

4- ساندوتش التونة:

افكار جديدة لساندوتشات المدرسة 6
افكار جديدة لساندوتشات المدرسة 6

المكونات

  • علبة تونة
  • بصلة صغيرة جدا (او ربع بصلة متوسطة)
  • ثمرة جزر
  • ثمرة فلفل رومي
  • خيارة
  • ثمرة طماطم
  • زيتون شرايح
  • معلقة طحينة
  • ليمونة
  • رشة كمون
  • شريح خس

الطريقة

  • ابشري البصل مع الجزر والفلفل الرومي في الكبة مع بعض
  • قطعي الطماطم مكعبات والخيار مكعبات واخلطيهم مع الزيتون والبصل والجزر والفلفل المبشورين
  • صفي التونة من الزيت كويس واعصري عليها الليمونة واخلطيها معاهم
  • افتحي العيش وحطي شرايح الخس وفوقها طبقة من التونة ورشي على وشها شوية كمون
  • غلفي الساندوتش كويس بورق التغليف

اهم حاجة انك ماتنسيش ان الساندوتشات هي الجزء الاساسي من وجبة المدرسة لكن ممهم كمان انك تدي لولادك ثمرة فاكهة وعلبة عصير عشان تبقى الوجبة متكاملة، ولو عندك افكار لساندوتشات المدرسة ياريت تشاركيها معانا عشان نستفيد من بعض

مقالات متعلقه

طريقة عمل وصفة ميني ساندوتش جبنة مشوية مع الطماطم المجففة اللذيذة

طريقة عمل وصفة ميني ساندوتش جبنة مشوية مع الطماطم المجففة اللذيذة

وصفة كرات لحم الديك الرومي اللذيذة

وصفة كرات لحم الديك الرومي اللذيذة

وصفة سوفليه البيض الهش على الطريقة اليابانية

وصفة سوفليه البيض الهش على الطريقة اليابانية