6 أنواع من الرجالة.. من فضلك احذريهم!

يسرا خالد
يسرا خالد
16054

فى انواع كثير من الرجالة حوالينا و الواحدة مش بتقدر تعرف معدن الرجل غير لما تتعامل معاه فترة وتعاشره وتفهم تفكيرة و لما تيجى تختارى شريك حياتك لازم تعرفى انك بتختارى شخص هتكونى معاه وهيكون معاكى فى كل تفاصيل حياتك ولازم تكونى متأكدة من كل جوانب شخصيته..

أكيد كل واحد فينا فيه عيب, ولازم تبقي فاهمه انه صعب جدا إنك تغيري في شخصيته أو في طبعه عشان كدة لازم تختاري الشخص اللي تقدري تستحملى عيوبه وتقدري تتعايشي معاها طول حياتك. احنا حبنا نجمعلكم أسوء عيوب ممكن تقابلوها في أنواع الرجالة ووضحنا كل عيب منهم ممكن يأثر عليكي إزاي في حياتك معاه علي المدي الطويل… تعالى اعرفى شوية منها عشان تتجنبيها فى الشخص اللى هترتبطى بيه.

1- المتردد:

 النوع ده من الرجال دايما ملخبط و مشاعره مش مستقرة و مش عارف هو عايز ايه و مش عارف هو بيحبك بجد و لا لا . فى يوم بقولك انتى مفيش غيرك هتجوزها و بحبها و اليوم التانى فجأة يغير كلامه و مشاعره نحيتك و تلاقيه عنده خوف من الارتباط الجاد. الشخصية دى عمرها ما بتتغير وهيتعبك معاه وهيلخبطلك حياتك زي ما هو كل حياته ملخبطة و مش هتوصلى معاه لحل او نتيجة.

2 – المجامل:

هتلاقى فيه كل حاجة انتى عايزاها من كلام جميل و رقة فى المعاملة و الهدايا و الدلع بس كل ده بيحصل مش قدامك بس هو طبيعته كده مع اى بنت ! لو لقيتى الموضوع بزيادة لازم تراقبى تصرفاته مع البنات التانية عشان احتمال كبير تلاقيه لطيف اوى و كلامه جميل مع كل الناس مش انتى بس لان ده طبعه و ده اكيد عمرك ما هتثقى فيه.

3- رجل الكذبة البيضاء:

العلاقة من غير وضوح وامانة يبقى اكيد مش علاقة صحيحة . الرجل اللى تلاقيه بيكذب كثير و بيقولك دى كذبة بيضاء عشان اللى حواليه ميتضيقوش او تلاقى بيكذب على حد من الناس قدامك فى تفاصيل معينة هتلاقيه اكيد بيكذب عليكى انتى كمان وعمرك ما هتعرفى لان دى شخصيته و لعبته والكذب بيكون مهارة عنده وممكن لو الكذبة صغيرة دلوقتى قدام لما ترتبطوا ببعض تكون اكبر وتسببلك مشاكل كثيرة فبلاش منه احسن.

4- بتاع مامته!

مش عيب ان الواحد يكون بار بأمه و يحاول يرضيها حتى بعد لما يتجوز ويبعد عنها بس العيب انه ييجى على حقك عشانها دايما و فى كل مواقف الحياة بيسمع كلامها هى بس وده بتكون شخصيته منعدمة و بتحسى انك عايشة مع مامته مش معاه هو وده طبعا بيسبب مشاكل كثيرة بينكم لان بيكون بينه وبينها طاعة عمياء وهي دايما هتفضل الاولي في حياته ولو كسرتى كلام مامته ممكن يبعد عنك و يتهمك انك غلطانة علاطول. انتى محتاجة رجل فى حياتك مش طفل لسه مرتبط بأمه.

5- المسرف:

الرجل ده بيرمى فلوسه يمين و شمال فى اى حاجة حتى لو مش محتاجها وبيحب يعيش احساس الحرية عن طريق صرف الفلوس و اقتناء الحاجات اللى بتجذب اهتمامه واهتمام الناس اللى حواليه و دى حاجة مش هتحسى بيها غير لما يكون فى بيت ومسئوليات ومصاريف اولاد و هيكون هو مش مسؤؤل كفاية و لسه بيصرف فى حجات مش مفيدة وحجات تخصه بس. نوع الرجالة ده متقدريش تطمني علي مستقبلك ومستقبل اولادك معاه.

6- المهزوز:

المهزوز اللي مش واثق في نفسه, علاطول هتحسى انه غيران عليكى بزيادة و بيتضايق من اى نجاح تعمليه ومش عايزك تكونى احسن منه فى اى حاجة وهتلاقيه مش عايزك يكون عندك علاقات اجتماعية او صداقات كثير وبيبعدك عن الناس وعايزك ليه وقدامه بس و بيشك فيكى كثير. ده نوع متعب للاعصاب وفي حياتك معاه هتلاقيه دايما بيشدك لوره وبيأخرك ومش بيشجعك ولا بيساعدك إنك تنجحي ولا إن يبقي ليكي أي كيان لانه بيستمد ثقته بنفسه من شعوره بالقوة عليكي إنتي.

نتمني إن الموضوع يكون عجبكم وإنك تكونوا قدرتوا تحددوا بعض أنواع الرجالة من المجتمع اللي أنتم عايشين فيه وانكم تخدوا حذركم منهم ويكون عندكم الوعي الكافي وقت الاختيار…

مقالات متعلقه

ازاى تتعاملى مع الرجل الشكاك ؟

ازاى تتعاملى مع الرجل الشكاك ؟

شهريار الزمن دا

شهريار الزمن دا

إزاى تتعاملى مع الرجل البخيل ؟

إزاى تتعاملى مع الرجل البخيل ؟