اعملى شامبو طبيعى فى البيت

بنات حوا بيحبوا جدا وصفات الطبيعة اللى بتحافظ على جمالهم و صحتهم بأقل تكلفة بعيدا عن المنتجات الغالية التجارية اللى ساعات كترة استعمالها بيكون مضر. النهاردة جايبنلكم وصفات طبيعية متجربة لعمل شامبو طبيعى رائع مناسب جدا لجميع انواع الشعر عشان يحافظ على شعركم من السقوط و الاجهاد و ينشط الدورة الدموية و ينظف فروة الرأس تعالوا يللا نجربهم سوا..

1 – شامبو البيكينج صودا:

المكونات و الطريقة : معلقة طعام بيكينج صودا – كوب مياه . هنخلطهم سوا و نحطهم فى زجاجة شامبو نظيفة فاضية و ممكن نزود المحتوى بنفس المقادير لحد ما نملى الزجاجة . هنرج الزجاجة قبل الاستعمال و ندلك بيها فروة الراش لمدة دقيقتين عشان تكون نظيفة كويس و بعدين نشطفها بمياه دافية . الشامبو ده مفيد جدا لفروة الرأس و بصيلات الشعر و خفيف عليها.

2 – شامبو جوز الهند:

المكونات و الطريقة كوب و نصف من لبن جوز الهند او علبة لبن جوز هند هنجبها من السوبر ماركت – كوبين الا ربع من زيت الصبار – هنخلط المكونات فى طبق و نحطهم فى الفريزر فى العلبة بتاعة التلج عشان يكونوا على شكل مكعبات كذا ساعة لحد ما يتجمدوا تماما . قبل الاستحمام هناخد مربع واحد و نسيبه شوية يهدا فى التلاجة و نستخدمه على شعرنا على الفروة و بطول الشعر و نسيبه 30 ثانية على الشعر . بعد ما نغسله هنستعمل خل التفاح عشان نتخلص من اى لزوجة ممكن تحصل فى الشعر . المكعبات دى ممكن تفضل فى الفريزر صالحة للاستعمال لمدة اسبوع .

3 – شامبو الزيوت:

المكونات و الطريقة

نصف كوب زيت خروع ربع كوب لبن جوز هند مثلجة ربع كوب عسل معلقتين زيت جوز هند 50 نقطة من اى نوع زيت عطرى

هنخلط كل المكونات و نرجها فى زجاجة مقفولة كويس قبل الاستعمال و هنستعمله زى اى شامبو عادى. للرائحة الرائعة : الزيت العطرى 20 نقطة لافندر او 20 نقطة نعناع و 30 نقطة لافندر و ممكن كمان 15 نقطة لافندر و 10 نقط ليمون . للقشرة : 10 نقط زيت ليمون و 10 لافندر و 10 روزمارى. للشعر الضعيف : 15 نقطة برتقال و 15 نقطة لافندر.

ملحوظة : الشامبوهات دى مش بيكون فيها الرغوة الصناعية زى الشامبوهات اللى فى الاسواق بس بتنظف و تعالج الشعر احسن منهم ..