5 وصفات لعلاج فراغات الشعر بسهولة

بقلمأنجي سليمان فيشعر visibility39126

كتير مننا بيعانوا من ظهور فراغات في شعرهم. بقع كاملة غالبا دائرية بتبقى فاضية من الشعر وشكلها مزعج جدا وغالبا بتؤثر علينا نفسيا وبتحسسنا أنها بتشوه جمالنا حتى لو بقية الشعر مفيهوش مشكلة. وبنات حوا جايبالكم هنا 5 وصفات لعلاج فراغات الشعر عشان تعرفي ازاي ممكن نخلي الشعر يرجع ينمو في الأماكن دي بأسرع وقت ممكن..

وصفات لعلاج فراغات الشعر

1- وصفة المساج والتدليك:

تدفق الدم في فروة الرأس وبصيلات الشعر من أهم العوامل اللي بتخليه ينمو وبيساعد على ملء الفراغات اللي بتظهر في فروة الرأس. لازم الدم يتدفق دائما لفروة الرأس ومنابت الشعر وعشان كده حاولي دايما تسرحي شعرك باستخدام فرشاة ناعمة عدة مرات في اليوم وسواء كنتي بتغسلي شعرك أو بتضيفي زيت أو ماسك احرصي على التدليك بأطراف الأصابع وعمل المساج وخاصة في المناطق المصابة. استخدمي خليط من زيت الخروع وجل الصبار في التدليك مرة او مرتين في اليوم لمدة خمس دقايق وسيبيهم يومين وبعدين اغسلي شعرك نهار اليوم التالت

2- وصفة الزيوت:

المكونات

  • زجاجة نظيفة فاضية
  • معلقة زيت خروع
  • معلقتين زيت جوز هند نقي
  • معلقتين زيت زيتون بكر
  • معلقة زيت بذر الكتان
  • معلقة من زيت اللوز
  • عشر نقاط من زيت النعناع الصافي

الطريقة:

اخلطي الزيوت مع بعض في الزجاجة

قبل ما تستخدمي الخليط ده لدهان المناطق المصابة رجيه كويس جدا عشان الزيوت كلها تتداخل ودفيه سواء لمدة عشرين ثانية في الميكروويف أو باستخدام حمام ماء ساخن على الزجاجة من الخارج

دلكي المناطق المصابة مرتين يوميا. شيلي بقية الزيت في التلاجة ومتنسيش الرج والتدفئة قبل كل استخدام.

علاج فراغات الشعر

3- وصفة  ماسك البيض:

المكونات

  • بيضة كاملة 
  • معلقتين زيت جوز هند نقي
  • معلقة كبيرة عسل النحل
  • عصير ليمونة

الطريقة:

اغسلي شعرك بالشامبو والماء الدافي.

اخلطي المكونات كلها مع بعض كويس.

وزعي الخليط على الجدور كويس جدا ودلكي اماكن الفراغات كويس.

سيبي الماسك لمدة 45 دقيقة الى ساعة.

 اشطفيه كويس جدا واستعملي بلسم مغذي. والماسك ده يتعمل مرة أو مرتين بالكتير كل أسبوع وهو بشكل عام مفيد لكثافة الشعر.

4- وصفة زيت الخردل والحنة:

 المكونات

كوباية من زيت الخردل

اربع معالق كبيرة من بودرة الحنة

الطريقة

اغسلي شعرك كويس ودلكي تحت ماية دافية عشان المسام تتفتح

سخني الزيت على حمام ماية سخنة

ضيفي بودرة الحنة وقلبي كويس جدا عشان يتخلطوا مع بعض كويس

دلكي فروة الشعر كويس بالخليط الدافي وركزي على الاجزاء اللي فيها فراغات

اربطي شعرك ببنسة او كلبس وسيبيه لمدة ربع ساعة وبعدين اغسلية

5- وصفة الحليب والعرقسوس:

المكونات

اربع معالق حليب دافي

معلقتين بودرة عرقسوس

رشة بسيطة زعفران

الطريقة

اغسلي شعرك كويس ودلكيه تحت الماية الدافية عشان المسام تتفتح

دفي الحيب في المايكروويف او على نار هادية جدا

دوبي العرق سوس في الحليب وحطي الزعفران

حطي المزيج على الفراغات والاماكن اللي محتاجة تنبتي فيها الشعر ودلكي كويس

وزعي باقي الخليط على جدور الشعر

سيبيه طول الليل واغسلية الصبح

وزي ما اتفقنا قبل كده لازم التدليك المستمر بالزيوت، وبلاش تمشطي شعرك وهو مبلول لازم ينشف الاول كويس وكمان خلي ادوات التسريح بتاعتك من الخشب او العاج بلاش البلاستيك والسلك، واخيرا فكي شعرك اغلب الوقت بلاش تربطية بالتوك او الايشارب طول وجودك في البيت وبشكل خاص جدا بلاش تربطيه اثناء النوم.