طريقة عمل الارز البرياني بالفراخ
الارز البرياني من الاكلات الجميلة اللي لها نكهة وطعم مميزين جدا واحلى ما فيها انها ممكن تتعمل مع الفراخ او اللحمة واحيانا كمان بتتعمل مع الجمبري وفي كل الاحوال بيبقى طعمها مميز وبتعتبر وجبه متكاملة لأنها بتحتوي على الارز والبروتين والخضار يعني كفاية جدا نقدم جنبها سلطة خضراء وتومية وبطاطس محمرة ويبقى عندنا وجبة كاملة، شوفي معانا الموضوع ده عشان تتعرفي على طريقة عمل الارز البرياني بالفراخ بالخطوات والصور
طريقة عمل الارز البرياني بالفراخ
المقادير
- نص كيلو صدور فراخ مخلية
- 3 كوبايات رز بسمتي ويفضل الدهبي مش الابيض لكن لو الابيض بس المتوفر ممكن تستخدميه عادي
- بصلة كبيرة متقطعة جوانح
- 2 فص ثوم مفروم
- قطعة جنزبيل طازة متقشرة ومفرومة تساوي تقريبا معلقة كبير
- علبة زبادي
- زيت نباتي
- ثمرة بطاطس متقطعة مكعبات كبيرة
- ثمرة طماطم متقشرة ومتقطعة شرايح
- ثمرة فلفل رومي او حامي حسب الرغية متقطع صغير
- ملح
- فلفل اسود
- معلقة صغيرة كزبرة ناشفة
- معلقة صغيرة كركم
- معلقة صغيرة قرفة مطحونة
- معلقة صغيرة كمون مطحون
- نص معلقة صغيرة بودرة جنزبيل
- نص معلقة صغيرة حبهان مطحون
- نص معلقة صغيرة قرنفل مطحون
- ورق لورا
- فصوص حبهان
- فصوص قرنفل
طريقة التحضير
- انقعي الارز في حلة او وعاء فيه حوالي 5 اكواب ماية ومعلقة ملح كبيرة وسيبيه نص ساعة قبل ما تبدأي الشغل وممكن تستغلي الوقت في تحضير الخضروات وتقطيعها
- بعد النص ساعة اغسلي الارز كويس جدا لغاية ما تلاقي الماية اللي بتنزل منه شفافة ونضيفة تماما
- اولا حنبدأ بالأرز حطي ماية على النار ومعاها الحبهان والقرفة وورق اللورا وسيبيهم يغلوا كويس، حطي الملح وحوالي معلقتين كبار زيت وفي الاخر حطي الارز وسيبيه يغلي معاهم
- في حلة تانية سخني حوالي معلقتين زيت وحمري فيهم البصل لغاية ما يبدأ يبقى لونه دهبي
- ضيفي التوم والجنزبيل المفروم وحمريهم مع البصل
- وبعدين ضيفي البهارات والتوابل كلها اللي اتفقنا عليها في البداية وقلبيهم كويس
- بعد ما يتحمر البصل كويس ويبقة لونه بني حطي الفلفل والطماطم والبطاطس وقلبيهم مع بعض خمس دقايق
- ضيفي صدور الفراخ وقلبي مرة تانية لغاية ما الفراخ تاخد من لون الخليط
- دلوقتي ضيفي الزبادي وقلبي الخليط كويس جدا لغاية ما يتداخل في بعض كويس زودي ربع كوباية ماية عشان الفراخ تشرب من الخلطة كويس
- سيبيهم يغلوا لغاية ما الماية تتبخر تماما وقلبيهم مع بعض كل فترة عشان التوابل تتجانس مع الخضار والفراخ
- في الاثناء دي تتابعي الارز واول ما تلاقي انه بدأ يتضاعف حجمة ويطرى وطي النار شوية وسيبيه يكمل غليان عشر دقايق وبعدين اقلبيه في المصفاة وسيبيه يصفي الماية الزيادة بتاعته
- لو عايزة الارز يبقى اصفر ممكن تحطي مع الماية اللي بتغلي فيها الارز معلقة صغيرة من الكركم المطحون ولو مش عايزة ممكن تسيبيه بلونه العادي
- ودلوقتي هاتي قارب حراري او صينيه فرن وحطي نص كمية الارز وبعدين خلطة الفراخ وبعدين باقي الارز وغطيهم كويس بورق الفويل ودخليهم فرن متوسط حوالي نص ساعة لغاية ما تلاقي الارز استوى تماما
- طلعي الصينية وحطي الارز في قارب التقديم وزيني الوش بحلقات البصل المحمر والبقدونس المفروم وقدميه
