ايه هو اللف التنحيفى ؟!
مصطلح اللف التنحيفى او اسلوب اللف التنحيفى في التخسيس من اكتر الوسائل اللي انتشرت مؤخرا على الانترنت وفي مراكز التجميل وصالات الجيم وغيرها من الاماكن المهتمة بالصحة والرشاقة، وطبعا اكيد بنسمع اراء كتير جدا وطرق كتير لتنفيذه كتير منها ايجابي وبعضها سلبي والنهاردة بنات حوا بتقدملك دليلك الكامل عن اللف التنحيفى واثاره طبقا لأراء الاطباء وخبراء التجميل وكمان تجارب شخصية لستات وبنات كتيرة.
اللف التنحيفى واثاره
ايه هو اللف التنحيفى ؟!
اللف التنحيفى هو طريقة تخسيس موضعية، الهدف الاساسي منها انها بتساعد على تركيز جريان الدم في المنطقة المراد تخسيسها ايا كانت لأنه بينفع استخدامه في جميع اجزاء الجسم وبالتالي بتساعد على حرق الدهون فيها، وكمان اثبتت الابحاث العلمية وذكر العديد من الاطباء في اللقاءات التلفزيونية وعلى شبكات الانترنت ان اللف التنحيفى قادر على التخلص من الترهل والسليوليت والمياة المحبوسة تحت الجلد وكل ده بسبب تنشيط الدورة الدموية في المنطقة دي.
فوائد اللف التنحيفى :
زي ماكلنا بنات وستات كتير جربوا اللف التنحيفى بنفسهم ورأيهم ممكن نلخصه لكم في الكام نقطة اللي جايين دول:
- ترطيب الجلد والتخلص من السليوليت في منطقة اللف.
- تخليص الجسم من عدة سنتيمترات في القياس بعد الانتهاء من الكورس.
- سهولة تخسيس بعض المناطق اللي كان من الصعب تخسيسها قبل كده بالاعتماد على الدايت والرياضة بس.
سلبيات اللف التنحيفى :
لم يثبت ان له اضرار بالمعني الحرفي للكلمة ولكن في بعض السيدات اللي قالوا ان اللف التنحيفى معملش معاهم اي نتيجة وده بيرجع لعدة اسباب اهمها الاتي
- اللف التنحيفى بيقلل من القياس ومش بيقلل الوزن على الميزان فلو مش بتتابعي المقاس بالسنتيمترات او بقياس الهدوم مش حتلاحظي الفرق اوي.
- بعض السيدات انتظروا النتيجة من اول وتاني جلسة في حين ان اللف التنحيفى بيحتاج في حدود من 6 الى 8 جلسات عشان يظهر التأثير بتاعه.
- وفي كمان سبب بيأخر من ظهور النتائج وهو ان بعض السيدات مش بيتحركوا كفاية اثناء اللف وده بيأخر من ظهور النتيجة.
اللف التنحيفي واثاره
خطوات عمل اللف التنحيفى في البيت
الاحتياجات
- كريم تخسيس مصرح به من وزارة الصحة ويفضل يكون بزيوت القرنفل او الجنزبيل، والافضل استخدام مجموعة من الزيوت الطبيعية عبارة عن (زيت الجنزبيل – زيت القرفة – زيت القرنفل – زيت الزيتون – زيت الياسمين).
- ورق تغليف شفاف الخاص بتغليف الخضروات والاطعمة.
- رباط ضاغط او كورسية او ملابس ضيقة.
خطوات العمل
- اخلطي معلقتين من كل من زيت الجنزبيل وزيت القرفة وزيت القرنفل وهي زيوت حامية بتحفز جريان الدم وتنشط الدورة الدموية، وعشان الحفاظ على الجلد اخلطي معاهم معلقتين من زيت الزيتون وفي النهاية ضيفي 15 قطرة من زيت الياسمين.
- اغسلي المكان المراد تنحيفه كويس بالليفة وادعكيه عشان تجري في الدم شوية وبعدين جففيه كويس اوي وحطي طبقة من الزيت او من الكريم.
- قيسي المنطقة المراد تخسيسها بشريط القياس واحتفظي بالرقم وماتقيسيش الجسم تاني غير في نهاية الكورس.
- لفي الجسم كويس بورق التغليف حوالي اربع الى خمس طبقات بحيث انه يكتم الهواء تماما عن الجسم.
- وبعدين اربطي فوق ورق التغليف برباط الضاغط لو كانت منطقة الساقين او الذراعين والبسي الكورسية او حزام البطن بالنسبة لمناطق الفخذين والارداف او البطن والاجناب.
- ودلوقتي لازم لمدة ساعة تعملي اي نوع من انواع تسخين الجسم لغاية ما يعرق جدا، ممكن تستخدمي الساونا المنزلية او المشاية الكهربائية او الاعمال المنزلية لكن تبذلي فيها مجهود قوي، او ممكن تبحثي على شبكة الانترنت على تمارين رياضية وتعمليها لمدة ساعة، اما في حالة صعوبة الحركة فممكن تنامي بالاربطة لكن مفعول اللف التنحيفى مش حيظهر بسرعة زي في حالة ممارسة التمارين او تحريك الجسم.
- في الاخر شيلي الاربطة واغسلي مكان الزيوت.
- كرري العملية لمدة 6 الى 8 مرات على بفرق حوالي يوم الى يومين بين كل مرة والتانية، وفي نهاية الكورس قيسي المنطقة مرة تانية وشوفي الفرق.
لو كانت ليكي تجربة مع اللف التنحيفى حننتظر مشاركتك معانا عشان نعرف رأيك في اللف التنحيفي، ولو لسه حتجربيه شاركينا تجربتك وقوليلنا رأيك.
شوفي كمان 5 وصفات لعمل اللف التنحيفى في البيت
