اسباب عدم انتظام الدورة الشهرية و علاجها

يسرا خالد

في

10106

انتظام الدورة الشهرية بيدل على صحتنا الكويسة و ان احنا نظام حياتنا و اكلنا مناسب و صحى بس فى بنات بيعانوا من مشكلة عدم انتظام الدورة الشهرية اوتأخيرها وده بيأثر على مزاجهم وصحتهم العامة . فى اسباب كثير للمشكلو بس اكيد برده ليها حلول تعالوا نشوفها سوا …

اسباب عدم انتظام الدورة الشهرية:

1 – التمارين القاسية و الرجيم الشديد لفترات طويلة ممكن يسببلك لخبطة فى مواعيد الدورة و فقدان الوزن بزيادة يعتبر بيسبب عدم توازن فى النظام الغذائى و بالتالى بيأخر الدورة.

2 – الرضاعة و كمان حبوب منع الحمل بتأثر على الهرمونات و بتسبب منع حدوث الدورة الشهرية او تأخيرها.

3 – الارهاق و الضغط العصبى المزمن بيسبب لخبطة فى الهرمونات و بيأثر على الدورة.

4 – الاكياس الدهنية اللى بتتكون على المبيض نتيجة لحالات مرضية معينة بتعيق عملية الاباضة و بتأخر الدورة و الاكياس دى موجودة عند بنات كثير ومن السهل علاجها.

5 – النظام الغذائى الغير متوازن اللى بيكون فيه نسبة النشويات عالية جدا و كمان الزيادة الكبيرة فى الوزن.

6 – الكافيين و التدخين و استخدامهم بكثرة بيأثروا على الصحة العامة و بيلخبطوا هرمونات الجسم.

7 – بعض الادوية او العلاجات اللى بيكون فيها مواد بتأثر على هرمونات الجسم عشان كده لو بتتعالجى من اى حاجة لازم تعرفى مكونات الدواء لانه ممكن يكون سبب رئيسى فى تأخير الدورة زى مرض السكر .

نصائح لعلاج عدم انتظام الدورة الشهرية:

1 – تغير نظام حياتنا :

اكثر علاج بيكون مناسب لأغلب الحالات هو تغيير نظام الحياة و بالتالى نقلل الضغط و التوتر اللى يعتبر سبب رئيسى فى المشكلة دى .الاهتمام بصحتنا و ان احنا نتبع نظام غذائى مظبوط فيه كل العناصر الغذائية المفيدة و المعادن اللى جسمنا بيحتاجها و مفيش احسن من الخضروات و الفواكه و البروتينات و نسبة بسيطة من النشويات و اهم حاجة ميكونش فيه حرمان لان ده هيساعد فى حل المشكلة مع الاستمرارو المواظبة على التمارين و لو حتى المشى نصف ساعة كل يوم . التمارين و الرجيم ده بيساعد على تعزيز الدورة الدموية و تنظيم مرور الهرمونات فى الدم و تحسين المزاج ده بيخلى الدورة الشهرية تنتظم.

2 – الفيتامينات :

تناول الفيتامينات و المكملات الغذائية زى الكالسيوم و الماغنسيوم و كبسولات الاوميجا اوزيوت الاسماك لأن نقص الفيتامينات بيحرم جسمنا من حجات كثير محتاجها لتنظيم الهرمونات فى جسمنا.

3 – العلاج الطبى:

لو تنظيم الاكل و تغيير العادات اليومية مكنش بيجيبنتيجة يبقى لازم نلجأ للدكتور و نعمل التحاليل المناسبة عشان نعرف السبب لان ساعات بيكون فى مشاكل صحية او مشاكل فى الغدة الدرقية او حجات تانية فى الجسم بيكون ليها تأثير مباشر على نظام الهرمونات و الدورة الشهرية و دى محتاجة تدخل طبيب اللى فى اغلب الاوقات بينصح باستخدام اقراص هرمونية او بيعالج المشكلة الاساسية اللى مسببة التأخير ده.

وصفات طبيعية للمساعدة فى التخلص من عدم انتظام الدورة الشهرية :

1- الزنجبيل

مفيد جدا فى تنظيم الدورة و كمان تخفيف الالام .هنغلى نصف معلقة صغيرة فى كوب مياه و نسيبها 5 دقائق و نشربها 3 مرات بعد الاكل و نستمر فى كده لمدة شهر.

2 – القرفة

القرفة مفيدة جدا فى تنظيم الدورة الدموية و تعتبر علاج صينى قديم و من اهم العلاجات عندهم عشان تحسن من درجة حرارة الجسم و تطرد الالم و موجود فيها مواد طبيعية بتنظم الانسولين فى الجسم اللى ليه سبب رئيسى فى تنظيم الدورة الشهرية . هنحط نص معلقة قرفة على كوب لبن و نشربها مرة فى اليوم لمدة شهرين . ممكن كمان نستعل نبات القرفة فى الاكل او نمضغه.

3 – السمسم

حبوب السمسم ليها دور رائع فى توازن الهرمونات فى الجسم و فيها مواد فعالة بتتخلص من اى سموم او اضرار ممكن تأثر على الهرمونات. هنديب سمسم و نطحنه كويس و ناخد معلقة على الريق الصبح كل يوم قبل ميهاد الدورة المعروف بأسبوعين لمدة شهور . ملحوظة العلاج ده لا يستعمل فى وقت الدورة نفسها هنستعمله قبلها بس.

4 – الكركم

بيساعد على تحسين الدورة الدموية فى الجسم و تنظيم الدورة الشهرية و فيه مواد طبيعية مضادة للالتهاب . هنحط ربع معلقة كركم على كوب لبن و معاهم معلقة عسل و هنستعملها مرة واحدة فى اليوم لمدة شهرين او لحد ما نشوف تحسن . فى كمان فيتامينات فى الصيدليات من مكونتها الكركم ممكن نستعملها.