طريقة رسم الحواجب بالخطوات والصور

بقلمأنجي سليمان فيمكياج visibility60551

العيون الجميلة والحواجب المصففة الخالية من الشعر الزائد من العناصر الاساسية لابراز جمالك، ودايما بنخاف من ان احنا نحاول نرسم الحواجب وننضفها في البيت بنفسنا وبنلجأ لخبيرة التجميل عشان تساعدنا في الموضوع ده، لكن ايه رأيك تعملي لنفسك حواجبك في البيت وبطريقة سهلة جدا كمان؟ النهاردة بنات حوا جيبالك طريقة رسم الحواجب بالخطوات والتفاصيل عشان تساعدك في الحصول على المظهر اللي بتتمنيه

طريقة رسم الحواجب بالخطوات

اولا الادوات اللي حنحتاجها:

ملقاط وخيط (لو بتعرفي تستخدميه لو لأ يبقى كفاية الملقاط)

مقص صغير

قلم كحل

مزيل مكياج

قلم حواجب بلون حواجبك او بودرة اي شادو ماط بلون الحواجب

فرشاه حواجب او فرشاه اسنان قديمة

ماسكرا شفافة او جل حواجب لو الاتنين مش متوفرين حتحتاجي فرشاه ماسكرا قديمة ومغسولة كويس اوي وكمية بسيطة من زيت جوز الهند او زيت الخروع

طريقة رسم الحواجب بالخطوات (2)

ثانيا الطريقة والخطوات: 

تحديد شكل الحواجب

1- عشان تحددي شكل الحواجب اقعدي في مكان اضاءته كويسة جدا وخلي المراية في مواجهتك بالظبط ما تميليش راسك خالص

2- هاتي مسطرة رفيعة او بقلم الكحل، حطي طرفه على جانب ارنبة الانف بالظبط وخليه مستقيم لفوق عشان تحددي مكان بداية الحاجب وحطي نقطة بقلم الكحل على المكان اللي حددتيه

3- ابدأي من نفس النقطة عند الانف بس وجهي القلم ناحية نهاية العين وفي النقطة اللي حيلمس فيها القلم حاجبك تحطي نقطة لأن دي نهاية الحاجب

4- دلوقتي حطي بداية القلم عند نص ارنبة الانف بالظبط ووجهية ناحية الحاجب بحيث انه يمر في نص العين بالظبط وده عشان تحددي المكان اللي حنعمل فيه زاوية الحاجب (الخط الابيض في الصورة)

طريقة رسم الحواجب بالخطوات

5- اخر خطوة هي انك تحددي سمك الحاجب بحيث ان انتي ما تخديش من الشعر الاساسي بتاعة استخدمي قلم الكحل في التوصيل بين النقط اللي عملتيها وارسمي التخن المناسب للحاجب

  • تنظيف ورسم الحواجب

1- دلوقتي هاتي الملقاط او الخيط وشيلي الشعر الزائد عن الخط من فوق ومن تحت, لو مش بتعرفي تستعملي الفتلة شوفي الموضوع ده بالصور والفيديو لازالة الشعر بالفتلة بنفسك في البيت

2- شيلي الرسم بتاع الكحل كويس اوي بمزيل المكياج واغسلي وشك

3- هاتي الفرشاه بتاعة الحواجب وسرحي الشعر لفوق براحة (زي الصورة) وقصي الشعر الطويل اوي اللي جاي من تحت لفوق باستخدام المقص الصغير

طريقة رسم الحواجب بالخطوات (3)

4- بعد ما خلصتي كل الخطوات دي استخدمي قلم الحواجب او بودرة الاي شادو في انك تمشي على الحاجب بخطوط رفيعة متقطعة كأنها شعيرات صغيرة بترسميها بين الشعر الاساسي عشان تخلي شكل الحاجب متساوي مش باين فيه اي فراغات او شعيرات مش مظبوطة

5- واخيرا سرحي الحاجب بفرشاة الماسكرا الشفافة او المغموسة في الزيت بس بعد ما تمسحيها كويس اوي عشان الزيت ما يسيلش على الوش

6- تابعي تنضيف الحواجب من الشعيرات الزائدة اول بأول عشان تحافظي على رسمتها

شوفي كمان رسمة الحواجب المناسبة لشكل كل الوش

رسمة الحواجب المناسبة لشكل كل الوش
رسمة الحواجب المناسبة لشكل كل الوش