اللبقة متعددة الوجوه: انثى برج الجوزاء
الشخصية المثيرة للإهتمام, ردود افعالها صعبة التوقع, صاحبة الوجوه العديدة … شديدة الذكاء, فضولية, عقلها بيعرف يتنقل من موضوع لموضوع بشكل اسرع من أي حد تاني, ملولة للغاية وصعبة المنال… بنتكلم عن انثى الجوزاء طبعا…
بتحب التغيير, حركتها كتيرة وبتحب تدخل في حوارات ومناقشات مع الناس, مستمعة كويسة جدا وعندها اراءها الشخصية الفريدة.. عندها مزيج من الذكاء والبلاغة وخفة الدم والسحر وكل ده بيديها قدرة عالية علي التأثير في اللي حواليها وإنها تستحوذ علي اهتمامهم واعجابهم.
يلا نتعرف على مواصفات انثى الجوزاء من 21 مايو – 20 يونيو.
1- في الحب: صعبة المنال!
امرأة الجوزاء رومانسية جدا، بتسعى دايما للكمال.عندها معايير خاصة لشريك حياتها, بتحتاج الرجل المتحدث الماهر,المرح, خفيف الظل اللي يقدر يخليها تضحك, والذكي اللي يقدر يتماشي مع طريقة تفكيرها السريعة اللي بتحب التحدي والتغيير وكمان يكون رومانسي! طبعا ده معادلة صعبة جدا…. هي مش بسهولة إنها تقع في الحب، وتحب تاخد وقتها وبراحتها قوي لحد لما تتأكد من مشاعرها. بس أول لما بتتأكد من مشاعرها تجاهه, هتلاقيها مرة واحدة بتفتح شخصيتها اللي ممكن تكون مش مفهومة للناس كلها ليه هو بس لانه فعلا هيكون شخص محظوظ انه قدر يخطف قلبها وعقلها.
2- صاحبة الوجوه العديدة:
ساحرة، مستفزة، بتحب التحدي، مثيرة، ومعقدة – امرأة الجوزاء هي أكتر من شخصية ومحتاجة الشريك اللي يقدر يعمل توازن في العلاقة ويتجاوب معاها في مختلف حالتها! بتقدر تلعب أدوار كتيرة في العلاقة. هي أفضل صديقة، افضل مشجعة لشريكها، ناقدة بارعة، عاشقة شغوفة ومقاتلة، كل ده مع بعض. ممكن في يوم تصحي سعيدة وبتغني وبترقص ويوم تاني تصحي مش عايزة تتكلم ومزاجها مش رايق ومن غير سبب وجيه… أحسن مافي الموضوع إن شريكها مش هيزهق ولا هيمل أبدًا لانه عايش جديد كل يوم!
3- عادلة وصريحة:
الصفة الرئيسية للجوزاء هي قدرتها على إنها تسمع الطرفين في أي مشكلة ومن غير انحياز. ده بيخلي اصحابها يعتمدوا عليها وهما بيحكولها أي موضوع إنها هتسمع وتحكم بالعدل ومن غير تحيز, بيبقوا عارفين إن استشارتها لا تقدر بثمن وإنها كلامها عاقل ورأيها موزون… بس برضة اوقات كتير ده بيضايقهم لانهم مش بيبقوا قادرين يسمعوا الحقيقية وعايزين اللي يسمعهم ويريحهم بس…
4- شاطرة وناجحة في شغلها:
مع مهاراتها العالية في المناقشات والتحدث بلباقة مع الناس، ثقتها بنفسها وعقلها المنطقي, هنلاقي إن المرأة الجوزاء تقدر تنجح وبقوة في مجالات كتيرة بس أبرزها مجال المبيعات, الصحافة, التدريس, أو القانون والسياسة وممكن كمان مجال التمثيل أو أي مجال ليه علاقة بالكاميرات والتحدث قدام جماهير من الناس.. لو حطيتها في أي منصب وحسستها بالتحدي فيه خليك متأكد إنك مش هتلقي حد أحسن منها للمنصب ده.
5- بتحب تدلع نفسها:
امرأة الجوزاء بتعرف تحوش لو عايزة, بس هي معظم الوقت مش بتهتم بتوفير المال, بتحب تدلع نفسها وتجيب كل اللي هي عايزاه.. كمان هي بتحب تساعد الناس اللي بتحس انهم محتاجين مساعدة مالية, مش بتردد ولا بتبخل أبدًا في المواضيع ديه ..
6- تعشق المغامرة والاثارة:
بما انها شخصية متقلبة وبتحب التجديد والتغير هتلاقيها بتحب جدا حياة المغامرة وإنها تجرب حاجات جديدة ومثيرة, تخرج في اماكن جديدة أو تسافر تستكشف العالم … وده اللي بيخلي العلاقة معاها خالية من الملل وكلها متعة وتجديد.
امرأة الجوزاء ليها طبيعة ساحرة وطريقة سهلة وسلسة في استعمال الكلمات, هي علي طول جاهزة لأي تحدي يقابلها في الحياة وبتعرف تتكيف بسهولة مع أي موقف ممكن تلاقي نفسها فيه.. روحها الإيجابيه وتفاؤلها بيخلي كل اللي حولها منجذبين ليها.. انثى الجوزاء بتبقي مستنية الأمير الساحر اللي هيجي يخطفها بعيد في عالم مختلف عن اللي هي عايشاة. بس فكرتها عنه مش انه طويل و وسيم.لأ فكرتها عن أميرها الساحر انه يكون ذكي, ويعرف إزاي يضحكها ويكون رومانسي وصاحب قلب كبير.
