نصائح لتجنب أثار الفتلة على الوجه

استخدام الفتلة على الوجه يعتبر افضل و اسرع طريقة لتنظيف الوجه من الشعر الذائد لانها بتشيل الشعر من جدوره و بتسيب وشك نظيف لاسابيع طويلة . لكن احيانا بيكون ليها جانب سيىء و هو أثارها على الوش لان فى ناس جلدها بيكون حساس جدا و الفتلة بتسببلها احمرار و حبوب و تهيج فى البشرة و لو سيبناها كده ممكن بعد فترة تخلى الجلد لونه غامق . جايبنلكم نصائح ازاى تتجنبى الموضوع ده و تعالجيه…

1 – إتاكدى انك متلمسيش المنطقة بعد الفتلة من 12 الى 24 ساعة عشان ممكن تسبب احمرار زيادة فى الجلد و قبل ما تعملى الفتلة اتأكدى انك مستمعلتيش سكرب على وشك.

2 – بلاش تنظفى وشك بأى منظف بعد الفتلة ب 12 ساعة على الاقل عشان بيكون فيه مواد كيميائية ممكن تسبب حساسية اكثر.

3 – استعملى الثلج مباشرة بعد الفتلة لانه بيهدى مسام وجهك و بيقلل من الانتفاخ و الاحمرار.

4 – ابعدى عن اى تنظيف للبشرة بالبخار بعد الفتلة.

5 – استخدمى اى مرطب هادى بعد الفتلة و يستحسن لو كان فيه صبار او نبات الكاموميل المهدىء.

6 – ابعدى عن الشمس المباشرة لمدة 48 ساعة بعد الفتلة و لو مضطرة يبقى لازم تستخدمى صن بلوك او واقى من الشمس.

7 – استنى على لالقل ساعتين بعد الفتلة لو عايزة تاخدى دش ساخن لان المياه الساخنة مش مفيدة لوشك فى الوقت ده.

8 – استخدمى مياه الورد اللى بتتباع فى الصيدلية او السوبرماركت بعد الفتلة عشان تهدى وشك.

9 – لو جلدك من النوع الحساس جدا لازم تستخدمى اى مرطب مخصوص للبشرة الحساسة بعد الفتلة.

وصفات هتساعدك فى تهدئة وجهك

1 – بودرة تلك اطفال و نشاء وماء ورد وزيت زيتون. اخلطي المكونات مع بعضها وضعيها على الوجه لمدة 20 – 30 دقيقة لمدة ثلاثة أيام متتالية.

2- معلقة نشا + معلقة عسل + معلقة ماء ورد. اخلطي المكونات مع بعضها وسيبيها على الوجه لمدة 20 – 30 دقيقة لمدة ثلاثة أيام متتالية منها تغذية وتفتيح وتهدئة للبشرة.

بنات حوا بتنصحك باستخدام غسول مضاد للبكتيريا بعد لما بشرتك تهدأ بكذا يوم و ممكن كمان استخدام كريم مضاد للبكتيريا بعد الفتلة علاطول.

شوفي كمان طريقة ازالة الشعر بالفتلة بنفسك في البيت !