ازاي اعرف نوع بشرتي وازاي أهتم بيها؟!

بقلمأنجي سليمان فيبشرة visibility24463

البشرة الصحية عنوان الجمال، لأن لو بشرتك حلوة وصحية حتحسسك بالاشراق والاطلالة المميزة سواء مع استخدام المكياج او عدمه، وعشان تعتني ببشرتك صح لازم تعرفي نوع بشرتك الاول عشان تحددي الغسول المناسب وطريقة العناية المناسبة لنوع بشرتك، والنهاردة بنات حوا جاية تساعدك في الاجابة على السؤال ازاي اعرف نوع بشرتي وايه هو نوع الغسول المناسب لها…

ازاي اعرف نوع بشرتي

في اربع انواع للبشرة، اما انها تكون عادية او جافة او دهنية او مختلطة، وحنعرفك ازاي تعرفي نوع بشرتك بسهولة وايه العلامات المميزة لكل نوع، تابعي الخطوات دي وانتي تعرفي نوع بشرتك.

  • شيلي كل اثار المكياج من على وشك باستخدام قطنة نضيفة وشوية من مزيل المكياج.
  • اغسلي وشك بماية فاترة والغسول المعتاد بس بلاش الصابون، لو معندكيش غسول للوجه استخدمي نقطة من الشاور جيل.
  • نشفي وشك بفوطة نضيفة بطرقة الضغط والتربيت بلاش تدعكيه او تفركيه بالفوطة.
  • اقعدي حوالي ساعة من غير التعرض للشمس او التراب او العرق وبلاش تلمسي وشك نهائي.
  • دلوقتي بصي في المراية وشوفي لقيتي ايه من الاربع حاجات اللي جايين دول.
  • البشرة العادية

لو لقيتي بشرتك نضيفة ونضرة ومافيهاش اي جلد ناشف او مسام واسعة او فيها اجزاء لامعة تبقي واحدة من الناس المحظوظة جدا ببشرتك العادية وهي اسهل انواع البشرة في التعامل.

لو لاحظتي ان بشرتك فيها جلد ميت او اجزاء خشنة وجافة خصوصا حول الفم وبين الحاجبين تبقى بشرتك جافة ومحتاجة لمزيد من الترطيب، اختاري مرطب غني وقوي واستخدميه مرتين في اليوم على الاقل مرة قبل النوم ومرة قبل الخروج في النهار وبلاش الاكثار من غسيل الوجه مرة واحدة في بداية اليوم بالماية الفاترة فقط ومرة قبل النوم بالغسول وبعده على طول المرطب.

اما بقى لو لاحظتي ان بشرتك لامعة او مسام البشرة واسعة وواضحة وعليها طبقى زيتية خفيفة فانتي بالتاكيد بتعاني من البشرة الدهنية، النوع ده من البشرة بيحتاج معاملة خاصة من ناحية التنظيف والترطيب لأنه لازم يتنظف بانتظام وبغسول فيه مادة قابضة وكمان لازم تترطب بعناية بلوسيون خفيف خالي من الزيوت.

لو بصيتي في المراية لقيتي مسام الانف والدقن واسعة وفي طبقة بسيطة من الزيت في الجبهة والانف والدقن وفي نفس الوقت الخدود وحوالين الفم جاف وعليه طبقة من الجلد الميت فده بالتأكيد شكل البشرة المختلطة، وده من اشهر انواع البشرة اللي معظم السيدات والفتيات بيعانوا منها، النوع ده من البشرة بيحتاج عناية مركبة لأن المناطق الدهنية بتحتاج عناية مختلفة عن المناطق الجافة لكن الاكيد ان النوع ده من البشرة بيحتاج الترطيب والتنظيف اليومي بانتظام عشان تحافظي على نضارتها والعناية بيها صحية ونضرة.

ازاي اعرف نوع بشرتي
ازاي اعرف نوع بشرتي

ازاي اختار الغسول المناسب لبشرتي

كل بشرة ولها صفاتها المميزة زي ما اتفقنا وذكرناها من شوية، عشان كده لازم نركز ونراعي نوع بشرتنا اثناء اختيار الغسول المناسب لها عن طريق الاتي:

  • اختاري الغسول المناسب لنوع بشرتك، يعني مثلا لو بشرتك عادية لازم تختاري الغسول المكتوب عليها للبشرة العادية وابعدي قدر الامكان عن انواع الغسول المكتوب عليها لجميع انواع البشرة لانها اما بتكون قوية زيادة عن اللزوم ممكن لو بشرتك جافة تسبب التهابات وخدوش او بتكون اضعف من اللازم ومش بتنضف البشرة بشكل جيد.
  • بالنسبة للبشرة الدهنية اختاري الغسول اليومي المضاد للمعان او الغسول اللي فيه حبيبات دقيقة لأنه بينضف اعمق من المنظفات التانية، اما لو بشرتك جافة يبقى ابعدي قدر الامكان عن الانواع دي واختاري الغسول اللطيف ولازم تتأكدي من انه غسول يومي عشان ما يسببش اي التهاب للبشرة.
  • حاولي تقري على الانترنت عن اراء الناس اللي استخدموا المنظف او الغسول اللي انتي عايزة تستخدميه وشوفي اراء المستهلكين قبل ما تشتري ممكن الكام يفيدك او تلاقي منتج افضل.
  • قبل استخدام الغسول لازم تشيلي المكياج بمزيل المكياج وقطعة من القطن الطبي عشان ما ينفعش تستخدمي الغسول على المكياج على طول لأنه مش حيشيل المكياج وفي نفس الوقت حيفتح المسام وممكن اثار المكياج تتسرب للداخل وتسبب البثور والحبوب (خاصة مكياج العيون).
  • لتجربة الغسول هاتي قطعة من القطن الطبي وحطي عليها شوبة من التونر او مزيل المكياج وامسحي على جانب الانف او منطقة الدقن وبصي في القطنة لو لقيتي لونها اميل للاصفر او لسه فيها اثار للمكياج يبقى الغسول ده ضعيف ومش مناسب ليكي وانتي محتاجة غسول اقوى من ده.
  • اما لو حسيتي ان بشرتك مشدودة زيادة عن اللازم او حسيتي بلدغات خفيفة يبقى الغسول اقوى من اللزوم وانتي محتاجة غسول اضعف من ده شوية، وعامة حاولي تقرأي المكونات الموجودة على الغسول لو لقيتي فيها نسبة عالية من sodium laureth sulfate يبقى الغسول ده مش مناسب للبشرة الجافة لأن دي مادة قابضة وقوية وتعرفي ان المادة موجودة بنسبة عالية لو لقيتيها في بداية المكونات ده معناه ان تركيزها عالي.
  • اما اخر نصيحة فهي ان في الشتاء لازم تختاري غسول اضعف شوية من اللي انتي متعودة تستخدميه عشان البشرة في الشتاء بتتسخ اقل من الصيف