نصائح لشعرك فى رطوبة الصيف

بقلميسرا خالد فيشعر visibility2617

الشعر و رطوبة الصيف مشكلة كل البنات طول الوقت بيكون هايش و متعب فى التسريح لأن اى شكل بنعمله بيبوظ.. شعرنا على المدى البعيد بيتقصف ويتساقط ويفقد حيويته وشكله الصحي لازم نتعامل مع شعرنا صح.. نهتم إزاي نحافظ عليه من العوامل الخارجية. جايبنلكم مجموعة من النصايح المهمة تساعدنا إزاي نحافظ على شعرنا في الصيف.. وخاصة لو نزلنا البحر أو حمام السباحة.. يعني هنصيف من غير مشاكل الشعر المزعجة.. يالا نبدأ..

شعرك و الرطوبة
شعرك و الرطوبة

نصايح للحفاظ على شعرك فى الرطوبة

•وضع الكونديشنر على المناطق المتعرضة للتطاير ورفع الشعر أثناء النوم بيساعد على إعادة ترطيب المناطق الجافة من الشعر.

• بلاش الاستحمام بالماء الساخن أو غسل شعرك بالماء الساخن. استخدمي الماء الدافئ أو الفاتر، لان الحرارة بتنشف وتتلف الشعر والبشرة.
• من الحجات المهمة  الحفاظ على مستوى الرطوبة في جسمك للحصول على شعر صحي احرصي على تناول كمية كافية من الماء.
• علشان نحمي شعرنا من الشمس والبحر مهم جداً نستخدم يومياً حمام كريم معالج للشعر ، ونكتفي بشطفه فقط بالمياه ، وهو على فكرة متوفّر في الصيدليات وأماكن مختلفة المهم يكون الكريم ماركة معروفة لسلامة الشعر.

• تجنبي حمامات الكريم ذات المكوّنات القوية ، لأنها ممكن ترهق الشعر وكمان هي غير مخصصة للإستخدام اليومي ونقدر نميّزها بأنها بيكون مكتوب على العلبة إرشادات تنصح بغسل الشعر جيداً بعد إستخدامه.
• نغسل شعرنا مرتين في الأسبوع في الصيف ونستخدم شامبو خالي من الصوديوم.
• في الصيف نغسل شعرنا بالمياه فقط يومياً ونحط عليه كريم معالج ونشطفه نص شطفة يعني نسيب آثار للكريم على شعرنا.
• نتجنّب ربط الشعر بعد غسله مباشرة لازم ينشف ولو مستعجلين نستخدم السيشوار الخفيف أو “البيبي ليس”.
• البنات المحجبات بلاش ربط الشعر وتغطيته بعد الحمام لازم تهوية الشعر قبل ربط الإيشارب ، وإستخدام بندانا قطن تحت الإيشارب ، وبعد لبس الحجاب لفترات طويلة لازم نفك الشعر علشان نهويه كويس جداً ، للحفاظ عليه من التساقط وكمان عشان تكون ريحته حلوة.
• الكريم المعالج كمان مهم للبنات المحجبات في الصيف.
• الكيراتين هيخلي شعرك حلو في الصيف ومع الحر والرطوبة هيكون مظهره كويس بإستمرار بدون سيشوار.
• خلي بالك الكيراتين الأصلي ممتد المفعول وممكن تنزلي البحر أو حمام السباحة.. لكن الكيراتين المقلّد بيتعرف في البحر أو حمام السباحة.
• تجنبي وضع “السيرم” أو “الزيت” على شعرك عشان بيقصف الشعر وبيزيد من تساقطه جداً، كمان بلاش الكريمات مجهولة الهوية حفاظاً على شعرك.
• لو كان شعرك بيتعرض للشمس إختاري لون صبغة أغمق درجة من لونك المعتاد ، لأن الشمس بتفتّح اللون.
• تجنبي الأحمرات الفاقعة في الصيف عشان مع الشمس والحر بتقلب على درجات اللون البرتقالي والنحاسي.
• ممكن تختاري في الصيف درجات اللون البني وتعملي خصلات غامقة بيكون شكلها جميل جداً.
• البنت المحجبة تختار العكس ، تختار درجة أفتح من المعتاد عشان تغطية الشعر مع الوقت بتغمّق اللون.
• تجنبي الوجبات السريعة في الصيف ، لأنها تزيد من تساقط الشعر ، إهتمي بالفاكهة والخضار وشرب المياه.