إزاى تتعاملى مع الرجل المتحكم

يسرا خالد
يسرا خالد
3807

الرجل المتحكم من اصعب الشخصيات اللى ممكن تقابليها لأن ممكن تحكماته تهد حجات كتير جميلة فى علاقتكم و هتخليكى تحسى ان افعالك و تحركاتك كلها متقيدة و مرتبطة بمزاجه و قراراته ..فى طرق ممكن تساعدك انك تتغلبى على جزء من  المشكلة دى او انك تتعاملى معاها تعالوا نقرا النصايح اللى جاية و يا رب تفيدكم …

الرجل المتحكم
الرجل المتحكم

1- المناقشة :

لو حاسة ان شريك حياتك بيتحكم فيكى بزيادة, الكلام معاه ساعات كتير بيكون مفيد و بيجيب نتيجة لأن كتير من الازواج بيتعاملوا على اساس تربيتهم و ازاى شافوا اهلهم بيتعاملوا مع بعض . لو قالك مثلا مش عايزك تعملى كذا عشان انا قلت كده يبقى هنا ليكى الحق تسألى أسئلة كثيرة بمنتهى الهدوء و من غير عصبية تخليكى تفهمى و يشحرلك سبب طلبه . لو حصل لغة حوار ما بينكم ممكن تقدرى توصلى لسبب تحكماته ممكن يكون خايف او مش فاهم و بيقلد بس اللى شافه فى بيته قبل كده . فى اوقات كتير طلب المساعدة من معالج نفسى او مستشار نفسى للتقريب بينكم و فهم وجهة نظر كل واحد فيكم بتكون فكرة مفيدة

 2 – الحدود

الحدوج الشخصية دى مهمة جدا فى اى علاقة و معظم المجتمع بيفتكروا ان لو البنت اتجوزت يبقى حريتها الشخصية و حياتها و خصوصيتها خلاص لازم تنساها لأنها اتجوزت و دلوقتى كل حياتها لوجها و اولادها . الكلام ده مش صحيح تماما لو حسيتى ان تحكمات زوجك جاية على حياتك الشخصية لازم تشرحيله و تفهميه ان فى حدود من غير ما تيجى على كرامته او رجولته . لو مثلا قالك انا عايز باسوورد الفيسبوك بتاعتك او مش عايك تنزلى مع اصحابك كل فترة هنا لازم تتكلمى . لما الطرف الآخر يحس انه بيجرحك و انه بأفعاله بيقلل من احترامه ليكى ممكن يبدأ يسكت و يغير من نفسه . فهميه ان افعاله دى بتأذيكى نفسيا و انك هتكونى مرتاحة اكثر معاه و فى علاقتكم لو بطل يتحكم بالاسلوب الغير مبرر ده .

3 – التجاهل

ساعات كتير التجاهل بيكون حل للاوامر الكثيرة و التحكمات . سيبيه بقولك اعملى و متعمليش و متبينيش اى رد فعل و بعد لما يهدى ممكن تتكلمى معاه و تفهميه انك هتتعاونى معاه و هتعملى اللى يريحه بشرط تكون حاجة تريحك انتى كمان لأنكم شركاء حياة و مينفعش تتحكموا فى كل تصرفات بعض.

4 – متدوريش على حل سريع

مش من المنطقى التركيز على انك تغيرى شريك حياتك بسرعة و لو فكرتى كده هتحطى نفسك فى ضغوط نفسية كبيرة و احسن حاجة انك تتقبلى العيب ده مؤقتا لحد لما الكلام و النقاش بهدوء يبدأ فى التغيير فى شخصيته و لو بنسبه بسيطة هتريحك

5 – اهتمى بنفسك

المرأة بتدخل فى دوامة من الاكتئاب و الضغوط النفسية لما تحس انها ضعيفة و مش قادرة تغير الشخص اللى قدامها او انها تتحمل تصرفاته . بنات حوا بتنصحك لو حسيتى بالاكتئاب و انك مش سعيدة فى حياتك لازم متستسلميش للدوامة دى و تحاولى تخرجى منها بأى طريقة عن طريق الكلام مع اصحابك او الانشغال بأى هواية و ابعدى دايما عن المواقف اللى بتسبب تصرفاته التحكمية و اللى بتخليكى تكتئبى و تضيقى

مقالات متعلقه

ازاى تتعاملى مع الرجل الشكاك ؟

ازاى تتعاملى مع الرجل الشكاك ؟

شهريار الزمن دا

شهريار الزمن دا

إزاى تتعاملى مع الرجل البخيل ؟

إزاى تتعاملى مع الرجل البخيل ؟