طرق كونتور أشكال الوجوه المختلفة

بقلميسرا خالد فيمكياج visibility24486

اتعرفنا قبل كده على ايه هو كونتور الوجه “فن نحت الوجه بالمكياج” و طريقة عمل الكونتور و الهايلايت فى مقالة سابقة وعرفنا ايه هى الخطوات العامة و الادوات اللي محتجاها عشان تعمليه.. دلوقتى جايبنلكم إزاي تعملي كونتور علي حسب شكل وشك  … تعالى نتعرف على الكونتور لكل شكل وش واللي يناسبه.

في كل الصور هنلاحظ إن الدرجة الفاتحة وهي بالون الابيض ده عبارة عن هايلات وهو يعني الكونتور الابيض وده بنحطه في الأماكن اللي عايزين نكبرها وممكن تستعملي الكونسيلر درجتين افتح من بشرتك بداله, اما اللي بالون البني في الوش فده هو الكونتور البني وبنحطه علي الأماكن اللي عايزين نصغرها وممكن برده نستبدله بكونسيلر أغمق درجتين..

1 – كونتور الوجه المستطيل:

الوش المستطيل اللي هو طوله أكتر من عرضه.. الخطوط الاساسية لكونتور الوش المستطيل هي اننا نركز الكونتور في منطقة القورة من فوق عند منبت الشعر ومنطقة الدقن وهنعمل الهايلايت تحت العين في نص القورة وده عشان نقصر من طول الوش ونعمل توازن في شكله.

كونتور الوجه المستطيل
كونتور الوجه المستطيل

2 – الكونتور للوجه البيضاوي:

الوش البيضاوي اللي هو عبارة عن شكل بيضة مقلوبة.. وده أكتر أشكال الوجوه تناسقا واللي يعتبر معمولة كونتور طبيعي :) الخطوط الاساسية لكونتور الوش البيضاوي هي إننا نركز تحت الخدود عشان نبرزها أكتر .. ولو وشك بيضاوي طويل ممكن تزودي شوية كونتور عند قورتك من فوق وعند عضم الدقن تحت عشان تقصري من طول وشك. 

كونتور الوجه البيضاوي
كونتور الوجه البيضاوي

3 – كونتور الوجه المدور:

الوش المدور بيبقي مليان وحدوده ناعمة والدقن بتبقي مدورة  وطوله بيبقي اد عرضه تقريبا.. الخطوط الاساسية لكونتور الوش المدور هي إننا نركز بالكونتور في خط بالطول من جنب الودن لحد الدقن “علي عضمة الفك” وهنحط الهايلايت في نص الدقن وتحت العين في نص القورة بين الحواجب وده عشان ندي شكل اطول شوية للوش المدور.

كونتور الوجه المدور
كونتور الوجه المدور

4 – كونتور الوجه المربع:

الوش المربع هو الوش اللي فيه عضم الفك قوي وبارز مع وجود القورة العريضة … الخطوط الاساسية لكونتور الوش المربع هي إننا نشوف فين اماكن بروز عضم الفك وهنركز عليها بالكونتوروتحت عضمة الخد وهنعمل كونتور كمان للقورة من فوق عند منبت الشعر ده عشان نقصر من طول الوش ونحوله شوية ناحية الوش البيضاوي , اماكن الهايلايت بقي هتكون تحت العين وفي نص الدقن وفي تفاحة الخد, وده عشان ندي شكل انعم للوش وتوازن أكتر.

كونتور الوجه المربع
كونتور الوجه المربع

5- كونتور الوجه الماسي:

الوش الماسي هو أشكال الوشوش النادرة, الوش العريض من منطقة الخدود بس ضيق عند القورة وعند الدقن, كأنه علي شكل ماسة… الخطوط الاساسية لكونتور الوش الماسي هي إننا هنركز الهايلايت المرة ديه أكتر من الكونتور.. الهايلايت هيبقي عند القورة والدقن عشان يديهم شكل اوسع أو أكتر تناسق وتحت العين, أما الكونتور هيبقي بدرجة بسيطة تحت عضمة الخد.

كونتور الوجه الماسي
كونتور الوجه الماسي

6- كونتور الوجه اللي علي شكل قلب:

الوش اللي علي شكل قلب شبه جدا الوش المدور مع اختلاف إن الدقن بتبقي اصغر وبارزة عن باقي الوش عشان كده بنقول انه شكل قلب .. الخطوط الاساسية لكونتور الوش اللي علي شكل قلب شبه جدا كونتور الوش المدور, هي إننا نركز بالكونتور في خط بالطول من جنب الودن لحد الدقن “علي عضمة الفك” وهنعمل خط علي جانبين القورة, وهنعمل الهايلايت تحت العين في نص القورة بين الحواجب وأكتر مكان هنركز فيه عند الدقن وده عشان نعمل شكل اطول للوش وانعم للدقن ونقلل بروزها.

 كونتور الوجه اللي علي شكل قلب
كونتور الوجه اللي علي شكل قلب

ملحوظة مهمة

فى بنات بيشتروا اى علبة مكياج كونتور و بتكون الالوان غامقة اوى او فاتحة اوى على وشهم و مش بيعرفوا يعملوها صح .. خلي بالكم درجات الكونتور بتكون بحسب درجات البشرة زي درجات كريمات الاساس او البودرة.