ازا ى تتعاملى مع الرجل الغيور

مراقبة مستمرة و تليفونات 24 ساعة و شك كثير واتهامات من غير مبرر !! لو كل ده كان جزء من حياتك يبقى زوجك او خطيبك رجل غيور جدا و لازم تعرفى انك  عشان بتحبيه و اختارتيه لازم ترضى بعيوبه لأن مفيش حد بيتغير تماما و ده جزء من شخصيته.. بس عشان نسهل عليكى الدنيا شوية فى كذا نصيحة لازم تعرفيها وانتى بتتعاملى معاه, تعالى اقرأيها فى السطور اللى جاية …

1 – اتكلمى معاه و اعرفى الاسباب

لازم تعرفى ان الغيرة ليها اسباب كثيرة عند الرجالة زى عدم الثقة نتيجة لتجارب سابقة او ممكن يكون خايف يفقدك بأى سبب او مش واثق فى نفسه فبيحاول يتملكك .لو عرفتى السبب عن طريق كلامه اكيد هتتعاملى بسلاسة و تفاهم اكثر ومش هتضايقى من غيرته بنفس الطريقة.

2 – خليه يثق فيكى اكثر

ابعدى عن اى كلام ممكن يزعجه ويشعل غيرته مع شخصيات معينة و بلاش تعملى الحجات اللى بتضايقه زى انك تقومى تردى بالتليفون بعيد عنه او انك متحكيلوش كنتى بتكلمى مين او خرجتى فين. متسبيش مجال لاغضابه و متفكريش انه ده خنقة ليكى بالعكس بعد فترة هيتعود و هيبطل و هيقدر اللى بتعمليه عشان ترضيه و تسكتى الشكوك اللى جواه.

3- العناية الخاصة

بلاش تحسسيه انك مخنوقه و اتعاملي معه على أنه شخص يمر بأزمة ويحتاج لحد يقف جانبه ويحيطه بالحب والحنان لأن زى ما قلنا الغيرة دى مرض مش بس طبع ومتضايقيش و لا تنفعلى لو سألك عن حاجة لكن بالعكس لازم توضحي له كل شبهة فيطمئن و يعرف انها أنها مجرد وساوس. اعرفى منه ايه التصرفات اللى بتضايقه منك و اتجنبيها و اعرفى ازاى و ايه هيطمنوا و اتفقوا على انكم تنفذوه و قصاد كده هو كمان يتفق معاكى ان معدا اسئلته و عصبيته يقل لأنك عملتى اللى يريحه.

4 – استعينى بأصحاب او اقارب

لو الموضوع كان زايد عن حده و بيوصل للاهانة ليكى او تعب لأعصابك زيادة حاولى تكلمى حد قريب منه و يتكلم معاه بهدوء و يشرحله ان تصرفاته  وشكوكه ملهاش اساس من الصحة و ان ده بيخليكوا تبعدوا عن بعض و تفقدوا الحب اللى ما بينكم . ساعات الكلام لو جاى من حد غريب بيكون استيعابه اكثر والواحد بيقدر يلاحظ عيوبه.

5 – حسسيه بنفسه و اهميته عندك

قوليله دايما بأنك تحبينه دائماً  وبينيله الحب ده له  والاهتمام وحسسيه بأنك مش عايزه تخسريه و انه اهم حاجة عندك ،ده هيخفف من خوفه وغيرته عليكى .قوليله دائما بأنك فخورة به وأنه في عينك احسن واحد لأن من وراء الغيرة الشديدة ساعات شعور بالنقص أو بأنك احسن منه فبلاش تزودى المشاعر في الصراخ أو التذمر منه.

6 – عرفيه بأصحابك و الاماكن اللى بتروحيها

خليه على علم بكل تحركاتك ولقاءاتك هيشعر بثقة كبيرة بك، وتعاملي مع الأمر بكل بساطة وترحيب. ردى على على مكالماته وانتى خارجة أو مع أصدقائك، واتكلمي معه بكل هدوء ولطف، خليكى صريحة معاه، ومتخبيش عنه حاجة، وقومي ببناء ثقة كبيرة عنده بكل اللى بتقوليه و تعمليه.عرفيه على أصدقائك عشان يشعر بالراحة والاطمئنان لهم ، و احكيله دايما عن تفاصيلك يومك و حياتك. لما تعملى كده اكيد اسألته هتقل و هيكون هادى معاكى نوعا ما.

خليكى واثقة من نفسك وأظهري محبتك ليه وثقتك به و متتوقعيش تغييره في وقت قصير لو كانت الغيرة طبعا متأصل فيه و حاولي واستعيني بالصبر و حبيه بكل حالاته لأن ده اختيارك و مفيش حد فينا كامل و كل شخص ليه عيوبه .. من اكثر الابراج المشهورين بالغيرة الاسد و الثور والعقرب.