أهم 5 أسباب لجاذبية برج الأسد!

بقلمسارة جمال فيبرج الاسد visibility31396

برج الأسد… البرج الناري الملكي اللي بيتميز بالفخر والكرم الشديد… القادة الاقوية أصحاب الأخلاق النبيلة وطيبة القلب, اللي من خططهم إزاي يسعدوا اللي حواليهم… هم مواليد 23 يوليو – 22 أغسطس, رمزهم علامته تشبه شكل راس ولبده الأسد, لونهم المفضل الأحمر الناري والدهبي والبرتقاني.. تعالوا نستكشف مع بعض ايه هي أهم مميزات برج الأسد…

أسباب جاذبية برج الأسد
أسباب جاذبية برج الأسد

1- الثقة بالنفس:

أصحاب برج الأسد ممكن يبانو مغرورين أو متعاليين عشان ثقتهم بنفسهم بتبقي زيادة شوية, بس ده يبان من بعيد فقط… الحقيقة إن الأسديين متواضعين جدا جدا …  وخاصية الثقة في النفس ده بتشتغل بشكل غير متوقع, يعني مثلا في أي مشكلة هم أول ناس بتلوم نفسها وبيبقي عندهم تحمل كامل للمسئولية وبيتحولوا من شخص يبان مغرور لشخص واعي للمواقف, مراعي مشاعر الاخرين ومتواضع…

2- أصحاب رؤي ومقنعين:

مواليد برج الأسد بيعرفوا يشوفوا الصورة من بعيد, بكل ابعادها, أصحاب مباديء ورؤي نقدر نقول انهم بيبقوا معتزين بأفكارهم وفخورين بيها لدرجة قوية جدا … بارعين في فن الإقناع! بيعرفوا إزاي يتكلموا بشغف وبطريقة كلها دراما! ويوصلوا رسالتهم للي قدامهم صح جدا وبقوة ويعرفوا يأثروا عليه… وبيعملوا ده بمنتهي حسن النيه مين غير خبث ولا لف ودوران! ديه بتبقي شخصيتهم الحماسية الطبيعية…

3- عشاق سخيين:

نقدر نقول بكل ثقة إن الحب هو أهم حاجة في حياة الاسديين… هما عشاق سخيين جدا, مخلصين وحياتهم بتزدهر لما شريكهم يكون بيبادلهم نفس المشاعر والعكس صحيح بمجرد انهم يحسوا إن شريكهم فقد اهتمامه هتلاقيهم قلبهم انكسر وبمنتهي البساطة…. الأسد في الحب بيخلق علاقة كلها دفء ومشاعر جياشة وعلاقة بلا ملل! هم اشخاص قلبهم كبير ومتسامحين وبيعيشوا وحياتهم بتتمحور بس حوالين اللي بيحبوه. 

4- قادة ومبدعين!

طبعا الأشخاص المبدعين المؤثرين دول لو بصينا نظرة سريعة على المشاهير اللي فيهم هنلاقي إن معظمهم يغلبهم صفة القيادة وروح التحدي والاصرار, فيهم الناس اللي كان نفسها تحكم العالم! وفيهم المبدعين العظماء اللي صعب انهم يتكرروا تاني, اللي شغفهم وإحساسهم عالي جدا وهو اللي بيحركهم, وفيهم اللي سابوا تراث للعالم صعب انه ينساه, حبنا نجيبلكم بس عينة من مشاهير البرج:

· نابليون بونابرت · موسوليني · رشدي اباظة · فريد شوقي · جورج برناردشو · روبيرت دينيرو · مادونا · جينيفر لوبيز · فيديل كاستر · نجاة الصغيرة · منة شلبي · تامر حسني · كريم عبد العزيز · تشارليز ثيرون · داستن هوفمان · انتونيو بانديراس · ويتني هيوستن · ساندرا بولوك · كيفن سبايسي · شون بين · كيني روجرز · ماثيو بيري · أرنولد شوارزنيجر · تييري هينري

5- الكرم الشديد!

مواليد برج الأسد كرمة جدا و بيحبوا يعيشوا ببذخ ويتمتعوا بالحياة, ومش بيعملوا ده بس لنفسهم, لأ ده بيعملوه كمان لأصحابهم وعيلتهم وشريك حياتهم طبعا, عندهم طاقة بتشع منهم وبتخليهم طول الوقت مهتمين باللي حواليهم مش بس يدلعوهم لأ وكمان يحللوهم مشاكلهم ويساعدوهم, بيحسوا إن حياتهم السعيدة ديه جزء من مسؤلياتهم الشخصية.

برج الأسد من أكتر الأبراج العاطفية القوية اللي كلها حب وشغف وحماس وكمان قوة وطاقة… سواء صديق أو شريك هو شخص هيفرق في حياتك وهيغيرها للأحسن أهم حاجة انه بس يحس بالقدر من الأهتمام اللي يحمسه ويديله الطاقة اللي محتاجهها.

اقروا كمان الملكة الفاتنة: انثى برج الأسد

القائد الواثق: رجل برج الأسد

توافق برج الأسد مع باقي الأبراج

أيه هي عيوب برج الأسد؟!

إزاي تكسب قلب انثى الأسد؟

إزاي تكسبي قلب رجل برج الأسد؟