توافق برج العقرب مع الابراج التانية

مواليد برج العقرب اللي بيتميزوا بالقوة والاصرار، اصحاب العزيمة والمثابرة، الواضحين اللي بيكرهوا اللف والدوران هما مواليد الفترة بين 23 اكتوبر الي 21 نوفمبر، اتعرفنا على كل صفاتهم في الموضوعين دول، والنهاردة حنعرف معاكم طريقة توافق برج العقرب مع الابراج التانية.

العقرب مع الأبراج التانية من أنجح علاقاته بتكون مع  (الحوت, السرطان, الجدي والعذراء) ومن أصعبهم واللي بتكون محتاجة شغل وصبر عشان تنجح (الأسد والدلو).

توافق برج العقرب مع باقي الابراج

1- برج العقرب والحمل:

الطرفين بيتصفوا بالعند والشغف وعندهم رغبة قوية في انهم يعيشوا حياتهم باستمتاع وهما الاتنين بيحبوا في بعض الطبيعة دي، والحياة بينهم مليانة اثارة ومشاعر قوية، لكن احيانا بتحصل بينهم خناقات ومشاكل قوية غالبا بعد ما بتنتهي الحمل بينساها وكأنها محصلتش في حين ان العقرب بيفضل فاكرها جدا وبتفضل مأثرة فيه وبيفتكر اي غلطة بيعملها الحمل حتى لو من غير قصد بزعل واستياء لفترات طويلة. كمان العقرب بيحب يحس انه قريب من شريكة ويحس برابط قوي معاه وده بيبقي على عكس طبيعة الحمل المحب أكتر للاستقلال والحرية.

نوع العلاقة: الشخصيات متناقضة بس بينهم قوة انجذاب قوية جدا، مع شوية تفاهم ومجهود بتكون علاقة ناجحة جدا.

2- برج العقرب والثور:

التوافق الفكرى والعقلى بينهم تقريبا مش موجود لكن بيتوافقوا عاطفيا جدا و لو قدروا يكونوا متفاهمين مش بس عاطفيا لكن فكريا مش هيقدروا يبعدوا عن بعض ابدا. هما الاتنين عندهم حب تملك شديد خصوصا العقرب اللى عنده غيرة قاتلة. العقرب احتياجه للحب والاهتمام بيكون زيادة شوية بعكس الثور الهادى العاقل حتى فى مشاعره . هم الاتنين بيتميزوا بالعند وعشان كده لازم يحاولوا يوصلوا لحل وسط عشان ميخسروش بعض بسبب اختلافاتهم وتمسكهم برأيهم.

نوع العلاقة : فى بينكم كل حاجة وعكسها وعشان كده الاختلاف اللى ما بينكم هو سر انجذابكم لبعض.

3- برج العقرب والجوزاء:

مختلفين لأن العقرب بيقرب ويرتاح بس لناس معينة وأماكن معينة, وبيحس إن الجوزاء مصطنع وطفولي والجوزاء بيحس إن العقرب معقد , متطلب وغير مفهوم. الاختلاف بينهم يتضمن اختلاف كمان في اسلوب الحياه ويحتاج إلى جهد عشان الاختلاف ده يتحول لحاجه يكملوا بيها بعض مش حاجة يختلفوا بيها مع بعض.

نوع العلاقة: متناقضين بس لو انجذبتوا لبعض بيكون في تأثير مغناطيسي قوي وبيبقي صعب انكم تحددوا إيه سبب الإنجذاب, محتاجين شغل جامد عشان العلاقة تستمر.

4- برج العقرب والسرطان:

سهل جدا انهم يرتبطوا ببعض لانهم شبه بعض, عاطفيين, عندهم نفس الأهداف وأمزجتكم متقاربه, الاختلاف ما بنهم إن العقرب اقل عاطفه شوية من السرطان عشان كده ساعات بيحس إن السرطان نكدي, لما السرطان بيتضايق بينسحب ويدخل جوه القوقعة بتاعته بس اللي حوله بيحسوا بزعله وضيقه على عكس العقرب اللي بيعرف يخبي مشاعر الزعل جوه وميبينش لأي حد إن فيه حاجه مضايقاه, الولاء مهم جدا لكم انتم الاتنين.

نوع العلاقة: علاقة مثيره وناجحة , بينكم تفاهم قوي وكافي عشان يخلي علاقتكم كلها اثارة.

5- برج العقرب والأسد:

الاتنين عندهم كبرياء, عند وارادة قوية, ممكن ينجذبوا لشخصياتهم القوية, بس الموضوع ده ممكن يعمل مابينهم مشاكل كبيرة جدا في علاقتهم على المدي الطويل, عنادهم والصلابة اللي في شخصيتهم هتخليهم مش قادرين يوصلوا لقرار يرضي الطرفين, مفيش حد فيهم بيبقي عايز يضحي أو يتنازل عشان التاني وبيفضلوا في الحرب دي كتير وبيعتمدوا سياسة النفس الطويل

مشكلة كمان ممكن تظهر هي موضوع الغيرة, لأن العقرب شخص عنده ولاء قوي ولما بيقع في الحب بيبقي مرتبط جدا بشريكة, وممكن ميقدرش يستحمل الجزء الإجتماعي الزيادة اللي عند الأسد مع إن الأسد برده عنده ولاء لكن العقرب وقتها مش بيقدر يفهم أو يستوعب ده وبيتغلب عليه بس شعور الغيره.

نوع العلاقة: التفاهم مابينكم صعب إلى حد ما, وفيه احتمال انه يحصل مابينكم اختلافات كبيره, العلاقة محتاجه مجهود جامد من الطرفين عشان تنجح وتكمل.

6- برج العقرب والعذراء:

الاتنين بيحبوا الدقة والتفكير العملي الواضح، وعندهم نفس الاحتياج لشرح وتحليل تصرفات الاخرين، ممكن الخلاف يحصل في بعض المواقف اللي العقرب بيتصرف فيها بعدم خوف في حين ان العذراء بيتردد كتير ويدرس ويحلل قبل ما ياخد اي خطوة، وساعتها العذراء بيشوف العقرب مفتقد للحكمة والعقرب بيشوف العذراء متزمت ودقيق اكتر من اللازم،  والعذراء عموما طبيعته اهدى وارق من العقرب اللي مش بيخاف واحيانا بيكون قاسي، لكن بشكل عام في قابلية كبيرة جدا للتفاهم بين الطرفين.

نوع العلاقة: علاقة قوية وانتو الاتنين بتقدروا تفهموا مشاعر بعض وطريقة تفكير بعض، سهل جدا يحصل ارتباط قوي بينكم.

7- برج العقرب والميزان:

الاتنين بينهم اختلاف في طريقة التعبير وقوة المشاعر يعني مثلا العقرب ممكن يتصرف في مواقف بعاطفية كبيرة جدا اكتر من الميزان، وغالبا مشاعر العقرب بتكون اعمق واعنف من الميزان يعني مثلا لما العقرب بيحب حد فهو بيقرب منه عاطفيا جدا وساعات كمان بيحاول يخضعه تحت سيطرته، لكن الميزان لما بيحب بيفضل محافظ على مساحة من الحرية والاستقلال للطرف التاني، الطريقة الحيادية اللي مش منحازة بتاعة الميزان بتغيظ العقرب في حين ان التقلبات المزاجية للعقرب وردوده العنيفة من وقت للتاني ده بيزهل الميزان وبيقلقه.

نوع العلاقة: انتم الاتنين مش بتبقوا فاهمين طريقة بعض في التفكير والتعبير عن المشاعر، العلاقة محتاجة مجهود كتير ومحاولات للتفاهم عشان تنجح بينكم.

8- برج العقرب والعقرب:

الطرفين متفاهمين جدا عشان طبيعتهم قريبة جدا من بعض لو حصل بينهم انجذاب عاطفي بيوصل لدرجة الهوس والعشق العميق، وغالبا العلاقة دي بتنتهي بالارتباط الحقيقي والجواز لأن الطرفين مايحبوش الحلول الوسط والمناطق الرمادية يحبوا الدنيا ابيض او اسود، وزي اي علاقة وارد ان يحصل فيها خلافات لكننها بتنتهي بسرعة والماية بترجع لمجاريها من تاني، الطرفين بيحبوا وبيكرهوا بعنف وبنفس القوة عشان كده علاقتهم حتبقى حب و مرضية للغاية أو مدمرة جدا لهم هما الاتنين مفيش وضع تالت.

نوع العلاقة: علاقة قوية وفيها تفاهم كبير عشان انتو الاتنين بتفهموا طريقة بعض في التفكير والتعبير عن المشاعر، لو حبيتوا بعض بجد حتبقى من انجح العلاقات

9- برج العقرب والقوس:

ﻋﻼﻗﺔ ﺻﻌﺒﺔ ﺑﻜﻞ اﻟﻤﻘﺎﻳﯿﺲ لأن اﻟﻘﻮس عنده حماس وشغف بالأفكار والخطط الجديدة, والعقرب مش بيقدر الجزء ده عند القوس وتلاقيه مش قادر يستوعب الخطة لانه اوقات مش بيبقي عنده بعد النظر اللي عند القوس.

القوس شخصية اجتماعية و ﻣﻨﻔﺘﺤﺔ ﻋﻠﻰ الناس و الاصحاب وﻋﻠﻰ اﻟﻌﻜﺲ فى ﺷﺨﺼﯿﺔ اﻟﻌﻘﺮب اللي يحب يبقي في جروب من اصحابة القريبين اللي فيه بينه وبينهم علاقة عميقة وقوية.

زي ما قلنا العقرب مشاعرة اقوي واعمق من القوس, ولما بيوقع في الحب بيتعلق جدا بشريكه وبيبقي عايز يحس بحبه واهتمامه طول الوقت, وده طبعا مش بينفع مع القوس اللي بيحب الحرية وإن شريكة يديله مساحتة الشخصية, العقرب غيور جدا وده صفة القوس مش بيحبها تماما وبيتجاهلها ودي ممكن تعمل مشاكل رهيبة ما بينهم.

نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, وفيه أحتمال كبير للمشاكل مابينكم.

10- برج العقرب والجدي:

الاتنين متحفظين في الاعتراف بمشاعرهم، او دوافعهم او نقاط ضعفهم، مش بالساهل بيعبروا عن اللي جواهم للغير وبيحتاجوا لشوية وقت قبل ما يثقوا عاطفيا في حد ويقدروا يعبروا له عن مشاعرهم، الاتنين اميل للتحفظ والاتنين ما يحبوش العلاقات المفتوحة ولكن يحبوا العلاقات اللي نهايتها جدية، اما الاختلاف فهو ان الجدي موضوعي اكتر وبيحافظ على مشاعره في مساحة أمنة ومش بيتعلق بحد اوي زي العقرب، لما بيكون في موقف مش مريح بالنسبة لهم الجدي بيتعامل بتحفظ وبيحط مسافة بينه وبين اللي قدامه لكن العقرب بيحكم مشاعره اكبر وبيشوف الموضوع بشكل عاطفي، الاتنين مشاعرهم عميقة بس الجدي بيقدر يحتفظ بمشاعره بعيد عن السطح اكتر من العقرب اللي لما بيقع في الحب بيفصح عن مشاعره بوضوح وده ساعات بيسبب بينهم مشاكل لأن العقرب بيحب يحس بمشاعر الطرف التاني والجدي مش عنده القدرة على اظهار عمق المشاعر والإستجابة لاحتياجات العقرب العاطفية.

نوع العلاقة: علاقة تناغم وتوافق بين الطرفين لأنكم فاهمين ومقدرين طريقة بعض في التفكير وفاهمين ازاي بتعبروا عن مشاعركم، سهل اوي تكونوا علاقة ناجحة سوا.

11- برج العقرب والدلو:

الدلو عقلاني وعملي علي عكس العقرب بيعتمد على احساسه الداخلى و الحاسة السادسة اللى عنده،وممكن يحب و يكره ويحس بكل حاجة بطريقة قوية جدا بتخلى الدلو مش بيعرف يتعامل مع الشخصية الحساسة اللى قدامه لان الدلو شخص مهما كان عاطفى فهو برضه عقلانى وعملى.

نوع العلاقة: التفاهم مابينكم صعب إلى حد ما, وفيه احتمال انه يحصل مابينكم اختلافات كبيره, العلاقة محتاجه مجهود جامد من الطرفين عشان تنجح وتكمل.

12- برج العقرب والحوت:

هما الاتنين حساسين، عاطفيين وفى تقارب وتفاهم وعمق مشاعر صعب انهم يلاقوه مع الابراج التانية، علاقتهم رومنسية بامتياز وفيها تناغم كبير وفريد.

نوع العلاقة: علاقة قوية وناجحة مليانة بالتناغم والتفاهم في التصرفات والمشاعر وشوية الاختلافات اللي ما بينكم بتخلق نوع جميل من الاثارة.

في النهاية حابين نقولكم إن موضوع الأبراج مش لازم ينطبق علي كل الناس زي بعض وبنفس النسبة عشان كده لو فيه بينكم مش بينطبق عليه الكلام ده, ده شيء طبيعي جدا. احنا قدمنا المقارنة من من جانب واحد بس, لكن في الحياة فيه جوانب تانية كتيرة جدا بتأثر في العلاقة احنا متأكدين طبعا انكم بتاخدوا بيها في حكمكم, وفيه في العالم علاقات كتيرة جدا ناجحة بين كل علامات الأبراج, لأن اهم حاجتين ممكن ينجحوا أي علاقة هما (الحب والتفاهم)…

اقروا كمان : الجذابة الغامضة انثى العقرب

الغامض القوي: رجل برج العقرب