توافق برج العذراء مع الابراج التانية

بقلمأنجي سليمان فيبرج العذراء visibility123887

الباحثين عن المثالية، محبي التفاصيل والترتيب والنظام، الاشخاص الحساساين اللي بيهتموا بغيرهم طول الوقت وبيعتمد عليهم من الاهل والاصدقاء اتعرفنا سوا على صفات امرأة برج العذراء وصفات رجل برج العذراء والنهاردة معادنا مع التعرف على توافق مواليد برج العذراء مع مواليد الابراج التانية

انجح علاقات العذراء بتكون مع (الجدي ,الثور, العقرب والسرطان) واصعب العلاقات اللي بتحتاج مجهود كبير بتبقى مع (الجوزاء والقوس).

توافق برج العذراء مع باقي الابراج

توافق برج العذراء
توافق برج العذراء

1- برج العذراء والحمل:

الامانة وحب الصراحة من غير مجاملة وتذويق للكلام صفة مشتركة بين الاتنين.. هما الاتنين بيدورا عليها مع ان العذراء بيتقبل الانتقاد والصراحة أكتر من الحمل ما بيقدر يتقبلها منه عشان الحمل حساس للنقد جدا، واللي ممكن يسبب مشاكل بينهم ان العذراء بيحب التفاصيل وبيخضع كل حاجة للدراسة والتحليل قبل ما يتصرف، في حين ان الحمل مندفع ويحب يتصرف على هواه وقراراته وقتيه بتعتمد على احساسه ورغبته وده اوقات كتير بيضايق الحمل وبيحسسه بنفاذ الصبر لأنه يحب يتصرف بسرعة وبدون تخطيط كتير…

اما التوافق فهو موجود في ان الحمل طبيعته قيادية ويحب يبقى هو قائد العلاقة والعذراء معندهوش مانع انه يكون ملازم له ويسمع لرأيه من غير تسلط او رفض، والمميز في علاقتهم فهي انهم ممكن يتعلموا من بعض جدا وغالبا التناقض اللي بين شخصياتهم ده بيخلق نوع من الانجذاب…

نوع العلاقة: الشخصيات متناقضة بس بينكم قوة انجذاب قوية جدا، مع شوية تفاهم ومجهود بتكون علاقة ناجحة جدا.

2- برج العذراء والثور:

هما الاتنين علاقتهم منسجمة جدا و بيحبوا يساعدوا بعض دايما، هما الاتنين عمليين و يصلحوا لبعض جدا فى الزواج او الشغل عندهم القدرة انهم يوهبوا نفسهم لبعض او لعائلتهم او اطفالهم تماما . برج الثور هادى اكثر فى مشاعره عن برج العذراء اللى بيقدر طبيعة الثور اللطيفة الهادية المتماسكة و بالرغم من انهم الاتنين بيحبوا الاكل جدا لكن العذراء بيهتم اكثر بصحته وبانواع الاكل اللى بياكلها عكس الثور اللى بيستمتع بكل حاجة و مش بيهمه.

نوع العلاقة: علاقة مثيره وناجحة , بينكم تفاهم قوي وكافي وبينكم اختلاف بيجذبكم لبعض ويخلي علاقتكم كلها اثارة. 

3-  برج العذراء والجوزاء:

الاتنين عقلانين وعقلهم بيغلب على عاطفتهم, بيحبوا يتكلموا مع الناس وبيحبوا خفه دم بعض, العذراء افكاره إلى حد ما ليها هدف مش مجرد لعب بالنظريات واختبار الأخرين زي الجوزاء. و الجوزاء بيحب المخاطرة والتجربة على عكس العذراء تماما اللي شديد الحرص والحذر.

نوع العلاقة: التفاهم مابينكم صعب إلى حد ما, وفيه احتمال انه يحصل مابينكم اختلافات كبيره, العلاقة محتاجه مجهود جامد من الطرفين عشان تنجح وتكمل.

4-  برج العذراء والسرطان:

الاتنين بيعانوا من موضوع المشاعر المتقلبة ده وممكن في بعض الأوقات الصفة دي تسبب مشاكل ما بينهم, السرطان كتير مشاعره بتتقلب مابين حزن, قلق,عاطفة, حنين والعذراء مشاعره ممكن تقلب ويغضب جدا وفجأة من حاجات بسيطة وفي وقت زي ده ممكن يغلط ويجرح السرطان بكلام وسخرية ونقد وده بيأثر جامد قوي في السرطان اللي شخصيته حساسه.

وعشان كده العذارء لازم يتحلي بالحكمة والقدرة على السيطرة على مشاعرة, والسرطان لازم يحاول يقلل موضوع الحساسية ويكون اكثر تسامحا ده عشان العلاقة تنجح مابينهم. التوافق انكم عندكم قدرة على التفاني الهايل لبعض، ورعايتكم لبعض بيجي بشكل طبيعي من غير ماتبذلوا أي مجهود.

نوع العلاقة: أنتم عندكم حاجات حلوه بتجمعكم مع بعض بس مفيش نسبة عالية من التفاهم, والموضوع محتاج شوية مجهود.

5- العذراء والاسد:

علاقة مختلفة تماما! العذراء خجول, متواضع, مبيحبش الأضواء وانه يبقي مركز اهتمام الناس على عكس الأسد جدا اللي بيسعي للحصول اعجاب الناس, وتقديرهم وانه يبقي محور كلامهم واهتمامهم, العذراء مش بيعرف يبين مشاعره وعاطفته زي الأسد وده بيخليه مش قادر يدي الأسد المشاعر اللي بيبقي الأسد مستنيها من شريكه.

العذراء دقيق وبيحب إن كل حاجة حواليه تبقي كاملة عنده عين النقد الحادة, وده غالبا بتبقي كارثة لما بيجي يتعامل مع الأسد، لأن الأسد حساس للغاية من موضوع النقد, بياخد الموضوع شخصي وكأن العذراء قاصد يحطمه أو يضايقه، العذراء بيحب يحلل كل كلمة وكل حركة ودي حاجة بتجنن الأسد انه يحس انه بقي موضع اختبار وتحليل من العذراء. مشكلة تانية ممكن تحصل إن الأسد اوقات ممكن يستغل الحس المتفاني اللي العذراء بيقدمه في مساعدة الاخرين.

نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, وفيه أحتمال كبير للمشاكل مابينكم.

6- برج العذراء والعذراء:

الاتنين حيقدروا يتفهموا التأرجح والتوتر في التصرفات اللي ساعات بيصيب العذراء في مواضيع او في اوقات معينة، والاتنين بيعشقوا التفاصيل والدقة وبيسعوا للوصول للصورة الكاملة في كل حاجة عشان كده ساعات حيعانوا من عدم الرضا لأنهم بيسعوا دايما للكمال والمثالية، والتفاهم بينهم عالي جدا لأنهم بيقدروا المسئوليات والاعمال المنزلية وكمان بيعرفوا يعبروا عن مشاعرهم بالافعال مش بالاقوال ولما بيتحطوا في موقف بيتطلب تركيز كتير ومسئولية كبيرة بينسجموا جدا وبيؤدوا المهمة دي في انسب صورة.

نوع العلاقة: علاقة قوية وفيها انسجام عالي، لانكم بتتشاركو الصفات والمشاعر والتفاهم بينكم حيوصلكم لارتباط قوي

7- برج العذراء والميزان: 

العذراء دقيق ويحب يحلل كل حاجة بيسمعها وينتقدها ومش بيقبل الافكار الغلط او غير المنطقية في حين ان الميزان يحب الكلام جدا مع الناس وسماع خبراتهم وتجاربهم في كل المواضيع وما يحبش ابدا يبين عدم اعجابه برأي او وجهة نظر حد تاني حتى لو هي غلط مش متعود ابدا يحكم على تصرفات حد وده اول اختلاف بين الشخصيتين، اما الاختلاف التاني بقى فهو ان العذراء خدوم جدا يحب يقدم النصايح ويقف مع غيره والميزان مش بيقدر يقتنع بالتصرفات دي لأنه سعات بيشوفها تدخل زايد وتصرف محرج ودي المشكلة التانية، الحقيقة ان الطرفين صورتهم قدام بعض مش مفهومة العذراء بيشوف الميزان ضعيف شوية والميزان بشوف العذراء متزمت وبيشوف الامور بشكل معقد، الشكل المثالي للعلاقة ان الطرفين يحاولوا يتفاهموا شوية ويحترموا صفات ورغبات بعض.

نوع العلاقة: متضطربة إلى حد ما، مش عارفين تفهموا طريقة بعض في التفكير والتعبير عن المشاعر،العلاقة محتاجة مجهود وتفاهم كبير عشان تنجح.

8- برج العذراء والعقرب:

الاتنين بيحبوا الدقة والتفكير العملي الواضح، وعندهم نفس الاحتياج لشرح وتحليل تصرفات الاخرين، ممكن الخلاف يحصل في بعض المواقف اللي العقرب بيتصرف فيها بعدم خوف في حين ان العذراء بيتردد كتير ويدرس ويحلل قبل ما ياخد اي خطوة، وساعتها العذراء بيشوف العقرب مفتقد للحكمة والعقرب بيشوف العذراء متزمت ودقيق اكتر من اللازم،  والعذراء عموما طبيعته اهدى وارق من العقرب اللي مش بيخاف واحيانا بيكون قاسي، لكن بشكل عام في قابلية كبيرة جدا للتفاهم بين الطرفين.

نوع العلاقة: علاقة قوية وانتو الاتنين بتقدروا تفهموا مشاعر بعض وطريقة تفكير بعض، سهل جدا يحصل ارتباط قوي بينكم.

9- برج العذراء والقوس:

فيه احتمال كبير للاختلاف مابينكم, لما بيحصل ما بينهم مناقشة العذراء بيحب يدخل في تفاصيل التفاصيل والقوس بيحب يبص للموضوع بصة عامة, من ناحية ساعات الجوزاء بيبقي غلطان من كتر الدخول بزيادة في التفاصيل لأن ده ممكن يضيع الهدف الأساسي للنقاش أو الخطة ونفس الوقت القوس ساعات بيبقي محتاج التحليل بتاع العذراء بس هو مش بيحب يعترف بده.

الشكل الامثل للعلاقة هو إن كل واحد يلعب دوره صح, يعني القوس يهتم بالأفكار والخطة الكبيرة ويسيب التفاصيل والنصايح العملية للعذراء وساعتها الدنيا ممكن تنجح, بس برده فيه احتمال كبير إن القوس يتضايق من طريقة العذراء في النقد وانه بيقف كتير في الحاجات البسيطة الصغيرة والعذراء ممكن يجيله احباط من تهور القوس في قراراته أو تصرفاته…

نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, بس بمجرد إن ده يحصل علاقتكم هتكون رائعة عشان هتكملوا بعض.

10- برج العذراء والجدي:

الاتنين عقلانيين جدا وعمليين جدا ويمكن الاعتماد عليهم، الجدي يقدر يحط خطط زمنية واستراتيجية لكل حاجة في حياته ويحاول الالتزام بيها في حين ان العذراء بيعتمد شوية على القدرات العملية والموهبة، الطرفين يقدروا يتوافقوا فكريا جدا ولو اتحدوا في شغل او مهمة حتخرج في صورة ناجحة اوي بس على مستوى الحياة العاطفية او الشخصية ممكن تبقى الحياة عملية زيادة عن اللزوم حتحاج شوية مجهود عشان يبقى فيها جانب رومانسي وترفيهي اكتر من كده.

نوع العلاقة: علاقة قوية جدا متفاهمين عاطفيا وفكريا وشوية الاختلافات الموجودة بينكم بتخلق نوع حلو من الجاذبية والاثارة

11- برج العذراء والدلو:

هما الاتنين بيشوفوا الدنيا من زوايا مختلفة و فكر مختلف. العذراء بيركز جدا فى التفاصيل ويحب يفكر و يحلل اما الدلو فبيبص للموضوع بطريقة عامة و بيشوف الصورة الاكبر ومش بيحب يركز في التفاصيل. ده بيخلى العذراء يساعد الدلو اكثر فى انه يحطله خطط مظبوطة لأى حاجة بيفكر فيها و يساعده فيها. هما الاتنين بيكونوا فريق رائع فى التفكير والتخطيط. على الرغم من انهم شخصيات جادة شوية وعملية لكن مع بعض المحاولة بيقدروا يوصلوا للتفاهم العاطفى اللى لازم يكون موجود فى اى علاقة.

نوع العلاقة: ممكن يحصل مابنكم انجذاب الأضداد بس لو قدرتوا تفهموا بعض, لأنكم فيه بينكم احتمال انكم تكملوا بعض…

12- برج العذراء والحوت:

العذراء مش بيرتاح للغموض والحاجات اللي مش واضحة, يحب يصنف وينظم كل حاجة في حياته علي عكس الحوت اللي عنده قدرة على استيعاب أفكار كتيرة ومتناقضة في نفس الوقت ويحب الفوضي الخلاقة وعدم النظام. العذراء بيحب يركز في مجال واحد من مجالات الحياة, يتخصص فيه وينجح فيه جدا، في حين ان الحوت بيحب يجرب مجالات كتيرة متنوعة.
الحوت أكتر شاعرية من العذراء اللي بيحب أكتر الحقايق الملموسة. هما الاتنين مش انانيين و هما الاتنين شخصيات حنينة ولطيفة وخجولين وحساسين جدا. خلافاتكم مش لازم تتعارض مع بعض وفيه امكانية انكوم تتفاهموا وتقدروا اختلاف بعض بما فيه الكفاية لإنجاح العلاقة مابنكم.

نوع العلاقة: ممكن يحصل مابنكم انجذاب الأضداد بس لو قدرتوا تفهموا بعض, لأنكم فيه بينكم احتمال انكم تكملوا بعض…

في النهاية حابين نقولكم إن موضوع الأبراج مش لازم ينطبق علي كل الناس زي بعض وبنفس النسبة عشان كده لو فيه بينكم مش بينطبق عليه الكلام ده, ده شيء طبيعي جدا. احنا قدمنا المقارنة من من جانب واحد بس, لكن في الحياة فيه جوانب تانية كتيرة جدا بتأثر في العلاقة احنا متأكدين طبعا انكم بتاخدوا بيها في حكمكم, وفيه في العالم علاقات كتيرة جدا ناجحة بين كل علامات الأبراج, لأن اهم حاجتين ممكن ينجحوا أي علاقة هما (الحب والتفاهم)…

اقروا كمان: الباحثة عن المثالية انثى العذراء

المتفاني: رجل برج العذراء