توافق برج الجدي مع الابراج التانية

بقلمأنجي سليمان فيبرج الجدي visibility41712

اصحاب الشخصية العملية الجادة الصارمة موضوعين ومش بيحبوا يضيعوا وقتهم، مولعين بترتيب حياتهم والالتزام بالخطط والجداول والمواعيد المدروسة كويس، بيقدسوا العمل والشغل وشخصياتهم قيادية بامتياز وده اتعرفنا عليه بالتفصيل لما اتكلمنا عن صفات انثى الجدي وصفات رجل برج الجدي، والنهاردة حنعرف درجات توافق برج الجدي مع الابراج التانية

الجدي مع الأبراج التانية من أنجح علاقاته بتكون مع (الثور, العذراء, الحوت والعقرب) ومن أصعبهم واللي بتكون محتاجة شغل وصبر عشان تنجح (الحمل والميزان).

توافق برج الجدي مع باقي الابراج

توافق برج الجدي
توافق برج الجدي

1- برج الجدي والحمل:

الاتنين عندهم نشاط وطموحين، بس الحمل بيميل اكتر لأنه يكون معتمد على نفسه ومستقل ومبتكر، لكن الجدي بيفضل الخطط الموضوعة بعناية ، الاستقرار والطريق الواضح للنجاح، الحمل بيحس بانه مقيد جدا ومستغل من التقاليد الاجتماعية وبيئة الشغل والجداول والمواعيد بعكس الجدي اللي يحب يشتغل في بيئة منظمة وتقاليد اجتماعية ومواعيد مترتبة بعناية، الحمل ممكن يعلم الجدي شوية حماس وشجاعة وتفاؤل، والجدي ممكن يعلم الحمل ازاي ينظم وقته وطاقته الكبيرة.

نوع العلاقة: عرضة للخلافات المتكررة، صعب اوي تتفهموا طريقة بعض في التفكير والتعبير عن مشاعركم، الموضوع محتاج تحدي ومثابرة ومجهود كبير.

2- برج الجدي والثور:

عملين, واقعين, ومتوافقين جدا فكريا.. ساعات حياتهم بتكون مملة وروتينية لانهم بيعملوا ثنائى عقلانى وعملى بزيادة و مفيش فى حياتهم اى مجال لتضيع الوقت او الاسترخاء و عشان يتجنبوا الملل ده لازم يشاركوا بعض فى اى هواية او يجربوا رحلات السفر ويحاولوا يغيروا من روتين حياتهم . هما الاتنين معتمدين على بعض جدا لان الجدى بيخطط للحياة والثور بينفذ و يوافق على الخطط دى لانه بيثق فى رأى الجدى و تفكيره.

نوع العلاقة : على الرغم من ان فى اختلافات فى مشاعركم و طبيعتكم العاطفية لكن انتم بتلاقوا حاجة حلوة فى الاختلاف لانه بيزود الانجذاب بينكم.

3- برج الجدي والجوزاء:

مختلفين لأن الجدي بياخد الحياة بالتخطيط والصبرعلى عكس الجوزاء. الجدي بيحب يعمل لنفسه خطط على المدي الطويل, بيخطط لسنين قدام يعني, مخلص جدا ويعتمد عليه, ومتحفظ الي حد كبير بيحسسك انه واخد دور الاب والأم في الحياة, على عكس الجوزاء اللي بياخد دور الطفل المحب للتجربة والاستكشاف.

نوع العلاقة: متناقضين ومختلفين, صعب انكم تقتنعوا بشخصية بعض, بس لو حصل ما بينكم انجذاب بيكون قوي وبتقدروا تغيروا وتأثروا في شخصيات بعض.

4- برج الجدي والسرطان:

شخصياتكم على النقيض من بعض, زي ماذكرنا قبل كده اد إيه حب السرطان للبيت, العيلة, الأصحاب, الجدي عنده مشكلة في التعبير عن مشاعره وارتباطه عاطفيا بالاخرين, بالنسبه للسرطان بيحس إن الجدي جاف وطموح زيادة عن اللزوم, والجدي مش بيقدر يستوعب ولا يفهم جزء المشاعر الزايد عند السرطان، اما نقطة التلاقي اللي بينهم فهي ان الاتنين بيدورا على الأمان, الإستقرار والإخلاص في العلاقة

نوع العلاقة: ممكن يحصل مابنيكم انجذاب الأضداد بس لو قدرتوا تفهموا بعض, لأنكم فيه بينكم احتمال انكم تكملوا بعض.

5- برج الجدي والأسد:

أكتر تحفظا, أكتر واقعية, ده برج الجدي, طبيعته بتختلف كتير مع الأسد الحماسي اللي كله دفء وحيوية، حتي في ذوقهم الشخصي هتلاقي اختلاف واضح, الجدي ذوقه أكتر كلاسيكية, أنيق, ويعشق البساطة, الأسد هتلاقيه بيحب الألوان, علي الموضة وميحبش حد يبقي لابس نفس ستايله, ده ممكن يكون بيعبر عن شخصيتهم الداخليه برده, الجدي أكتر حرص وهدوء, أقل اندفاع ويحب يبقي متأكد من أي قرار قبل مايخده, الأسد أكتر تفتحا, عنده قدرة اكبر على التعبير عن مشاعرة وبيحتاج لوفره من المشاعر والتقدير من الشريك وده شيء الجدي مش بيقدر يوفرهوله اما الحاجة المشتركة مابينهم ان هما الاتنين ملتزمين قوي وعندهم ولاء ووفاء لشريك حياتهم.

نوع العلاقة: متناقضين ومختلفين, صعب انكم تقتنعوا بشخصية بعض, وقدامكم تحدي كبير عشان تقدروا تنجحوا العلاقة ديه.

6- برج الجدي والعذراء:

الاتنين عقلانيين جدا وعمليين جدا ويمكن الاعتماد عليهم، الجدي يقدر يحط خطط زمنية واستراتيجية لكل حاجة في حياته ويحاول الالتزام بيها في حين ان العذراء بيعتمد شوية على القدرات العملية والموهبة، الطرفين يقدروا يتوافقوا فكريا جدا ولو اتحدوا في شغل او مهمة حتخرج في صورة ناجحة اوي بس على مستوى الحياة العاطفية او الشخصية ممكن تبقى الحياة عملية زيادة عن اللزوم حتحاج شوية مجهود عشان يبقى فيها جانب رومانسي وترفيهي اكتر من كده.

نوع العلاقة: علاقة قوية جدا متفاهمين عاطفيا وفكريا وشوية الاختلافات الموجودة بينكم بتخلق نوع حلو من الجاذبية والاثارة.

7- برج الجدي والميزان:

الميزان متفتح جدا ويحب الحياة اللي كلها تواصل مع الاخرين، حتى في شغله ما يحبش الاعمال المكتبية اللي مافيهاش تواصل مع الاخرين على عكس الجدي العملي اللي يحب بيئة العمل الجادة الصارمة، ساعات كتير الميزان بيتمنى لو ان الجدي كان اكثر تفتحا وحياته في جانب من المرح والترفيه، وساعات كمان الجدي ذوقه بيميل للكلاسيكيه والموضات القديمة شوية ودي حاجة بتزعج الميزان اوي، ممكن لو حصل بينهم تفاهم يوصلوا لشكل متوازن لحياتهم عن طريق ان الجدي يحط الخطط والاستراتيجيات اللازمة للحياة والاولاد والفلوس في حين الميزان يهتم اكتر بجانب التواصل الاجتماعي والجزء الترفيهي ومايخليش الشغل والمسئوليات يطغوا على الجوانب التانية من الحياة، وكمان الجدي مسيطر شوية ويحب يفرض رأيه في حين ان الميزان ديموقراطي اكتر ويحترم رأي الاخر

نوع العلاقة: عرضة للخلافات المتكررة، صعب اوي تتفهموا طريقة بعض في التفكير والتعبير عن مشاعركم، الموضوع محتاج تحدي ومثابرة ومجهود كبير.

8- برج الجدي والعقرب:

الاتنين متحفظين في الاعتراف بمشاعرهم، او دوافعهم او نقاط ضعفهم، مش بالساهل بيعبروا عن اللي جواهم للغير وبيحتاجوا لشوية وقت قبل ما يثقوا عاطفيا في حد ويقدروا يعبروا له عن مشاعرهم، الاتنين اميل للتحفظ والاتنين ما يحبوش العلاقات المفتوحة ولكن يحبوا العلاقات اللي نهايتها جدية، اما الاختلاف فهو ان الجدي موضوعي اكتر وبيحافظ على مشاعره في مساحة أمنة ومش بيتعلق بحد اوي زي العقرب، لما بيكون في موقف مش مريح بالنسبة لهم الجدي بيتعامل بتحفظ وبيحط مسافة بينه وبين اللي قدامه لكن العقرب بيحكم مشاعره اكبر وبيشوف الموضوع بشكل عاطفي، الاتنين مشاعرهم عميقة بس الجدي بيقدر يحتفظ بمشاعره بعيد عن السطح اكتر من العقرب اللي لما بيقع في الحب بيفصح عن مشاعره بوضوح وده ساعات بيسبب بينهم مشاكل لأن العقرب بيحب يحس بمشاعر الطرف التاني والجدي مش عنده القدرة على اظهار عمق المشاعر والإستجابة لاحتياجات العقرب العاطفية.

نوع العلاقة: علاقة تناغم وتوافق بين الطرفين لأنكم فاهمين ومقدرين طريقة بعض في التفكير وفاهمين ازاي بتعبروا عن مشاعركم، سهل اوي تكونوا علاقة ناجحة سوا.

9- برج الجدي والقوس:

ﻋﻼﻗﺔ ﻣﻌﻘﺪة وﺻﻌﺒﺔ بتجمع ﺑﯿﻦ ﻣﻮاﻟﯿﺪ ﺑﺮج اﻟﻘﻮس اﻻﺟﺘﻤﺎﻋﯿﻦ واﻟﻮدودﻳﻦ واﻻﻧﺒﺴﺎطﯿﻦ ﻣﻊ الناس وﻣﻮاﻟﯿﺪ اﻟﺠﺪي الجدين ﻓﻲ اﻟﺘﻌﺎﻣﻞ. القوس متفائل ومتهور على عكس الجدي تماما الشخصية الواقعية الشكاكة اللي بتحب تدرس وتخطط قبل كل خطوة, القوس مثلا بيبقي عايز ينطلق ويسافر لكن الجدي بيبقي حاسس إن عنده مسئوليات مينفعش يتخلي عنها, وده بيخليه يحس إن القوس شخصية غير مسئولة والقوس بيحس إن الجدي شخصية رتيبة ومملة جدا.

نوع العلاقة: البرجين بينهم أختلاف بس مش متطرف أو منفر, محتاجين وقت ومجهود عشان تعرفوا تتفاهموا, ولو ركزتوا في التفاهم بدل ماتحبطوا بعض علاقتكم هتكون رائعة عشان هتكملوا بعض.

10- برج الجدي والجدي:

الاتنين عملين جدا واقعين جدا، بيعرفوا يحددوا اهداف حياتهم ويرتبوا طريقة تحقيقها والوصول لها، من ناحية العمل هما من النوع اللي يعتمد عليه جدا واللي غالبا بيحققوا مستويات عالية جدا من النجاح، تقدروا تبنوا مع بعض حياة مستقرة جدا لأنهم بيقدروا عقلانية وجدية وواقعية بعض، حياتهم العاطفية بتفتقر شوية للحيوية والانطلاق بسبب العملية والموضوعية بتاعتهم، المشكلة ان الاتنين مش بيتعلقوا ببعض عاطفيا بقوة لأن دي طبيعة الجدي فحياتهم بتبقى متمحوره حول المسئوليات والخطط والشغل وكلها جد لو حبوا علاقتهم تنجح شوية لأزم يتعلموا ازاي يدخلوا جانب من المرح والضحك والترفيه لحياتهم.

نوع العلاقة: علاقة قوية وفيها تفاهم كبير عشان انتو الاتنين بتفهموا طريقة بعض في التفكير والتعبير عن المشاعر، علاقتكم متينة وناجحة.

11- برج الجدي والدلو:

الاتنين بيستثمروا اغلب وقتهم فى الشغل وهواياتهم و اهتمامتهم دايما بتكمل بعض. الجدى شخصية يعتمد عليها, عقلانى جدا, عملي وموضوعي , اما الدلو فهو عنده قدرة اكبر على الابداع واكتشاف الحاجات الجديدة ومتواكب أكتر مع التغيرات وعنده قدرة اقوي على تكوين علاقات جديدة. فى مشكلة بتنشأ بينهم انهم بيركزوا اكثر على الحاجات من بره ومعندهمش عمق في علاقتهم مع بعض, ممكن لومركزوش في المشكلة ديه كفاية, يلاقوا نفسهم بعاد عن بعض وبيفقدوا الصلة و الاهتمامات المشتركة بينهم و ده بيأثر على الجانب العاطفى فى العلاقة و بيضعفها. ممكن يحاولوا يقربوا لبعض اكثر ويتجنبوا فكرة الروتين وعدم الاهتمام ده وبسهولة هيقدروا يخلوا علاقتهم تكون ناجحة.

نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, بس بمجرد إن ده يحصل علاقتكم هتكون رائعة عشان هتكملوا بعض.

12- برج الجدي والحوت:

مختلفين من نواحي كتيرة، برج الجدي عملي وواقعي، عنده شعور علي بالمسئولية وبيتعامل مع الحياة بجدية شديدة. الحوت بقي حساس، خيالي وحالم، وأكتر عاطفية بكتير من الجدي. الحوت عارف أن الحياة فيها حاجات كتيرة مختلفة عن بس الخطط والشغل. إختلاف تاني مابنهم إن الجدي شكاك جدا ولازم يشوف بعينه عشان يصدق أي حاجة على عكس الحوت اللي ممكن يكون ساذج إلى حد ما وبيصدق الناس اللي حوله بسرعة. الجدي بيميل للنظام والدقة والحوت بيحب شوية حياة الفوضي الخلاقة. الاتنين عندهم نوع من العمق والتأمل  وعندكم قدرة عطاء قوية لشريك حياتكم.

نوع العلاقة: أنتم عندكم حاجات حلوه بتجمعكم مع بعض بس مفيش نسبة عالية من التفاهم, انتوا لازم تتعلموا إزاي تحترموا الاختلاف وإزاي تقدروا تظبطوا العلاقة والموضوع محتاج شوية مجهود.

في النهاية حابين نقولكم إن موضوع الأبراج مش لازم ينطبق علي كل الناس زي بعض وبنفس النسبة عشان كده لو فيه بينكم مش بينطبق عليه الكلام ده, ده شيء طبيعي جدا. احنا قدمنا المقارنة من من جانب واحد بس, لكن في الحياة فيه جوانب تانية كتيرة جدا بتأثر في العلاقة احنا متأكدين طبعا انكم بتاخدوا بيها في حكمكم, وفيه في العالم علاقات كتيرة جدا ناجحة بين كل علامات الأبراج, لأن اهم حاجتين ممكن ينجحوا أي علاقة هما (الحب والتفاهم)…

اقروا كمان: الطموحة الواقعية انثى الجدي

الطموح المثابر: رجل برج الجدي