إزاي نقدر نتغلب على ألم الفراق

مين فينا ممرتش بتجارب حب فى حياتها و مكنش مكتوبلها النجاح ؟ كلنا مرينا بالمشاعر السلبية و الزعل ووجع القلب و سمعنا كلام كتير مش مفيد زى انتى احسن و تستاهلى احسن و هيجيلك احسن منه و لازم تنسى ..لو انتى بتمرى بتجربة زى دى و محتاجة مساعدة اقرأى السطور اللى جاية لأنها حلول عملية و متجربة …

إزاي نقدر نتغلب على ألم الفراق؟!

1 – طلعى طاقة الحزن

لازم تتقبلى انك هتكونى زعلانة و مضايقة و بتعيطى من اى حاجة فى الفترة دى اوعى تكتمى زعلك لان المشاعر دى هتتخزن جواكى و تزيد . زعقى عيطى انزلى روحى الجيم و اجرى المهم متتضحكيش على نفسك و سيبى قلبك يعيش الفترة دى لانها طبيعية تماما و صحية.

2 – دلعى نفسك

اشترى علب الشيكولاتة اللى بتحبيها اتفرجى على الافلام اللى بتضحك انزلى روحى الكوافير او انزلى اشترى لنفسك لبس جديد كلى ايس كريم او بيتزا من اللى بتحبيها كتير اعملى كل حاجة بتبسطك بس خلى بالك برده متاكليش باسراف.

3 – اتكلمى مع اصحابك و اخرجى معاهم

شوفى صديقة قريبة ليكى و اشرحيلها بزوق انك مش محتاجة نصيحة او تأنيب ضمير انتى محتاجة حد يسمعك و بس و حاولى على قد ما تقدرى تخرجى و تتفسحى حتى لو مش هتكونى مبسوطة اوى عشان متنقطعيش عن اصحابك و تعزلى نفسكو تزودى مشاعر الاكتئاب.

4 – حددى وقت للزعل

لو سبتى نفسك لمشاعر الحزن كتير هتزيد جواكى. بعد لما تتحسنى من الصدمة شوية هتبدأى تعملى لنفسك وقت معين فى اليوم انك تفكرى فى الشخص ده و تزعلى زى مثلا ربع ساعة فى اليوم و لما الوقت ده يخلص هتقومى تشغلى نفسك على قد ما تقدرى و متسمحيش لنفسك انك تفكرى فى اى حاجة بتزعلك . الموضوع صعب و هياخد وقت بس ده تمرين لقلبك عشان يقوى و يتحسن و ينسى. ممكن فى الوقت ده تتعلمى هواية جديدة او اى حاجة تشغلك.

5 – ابعدى عن اى تواصل بينك و بينه

اهم حاجة فى الفترة دى انك تدى لقلبك فرصة انه ينسى و يبعد مينفعش تقابلى الشخص ده مهما كان ولا ينفع تنزلى فى مكان انتى عارفة انه هيكون فيه او حد من الاصحاب يكلمكوا تتقابلوا و تتفأجى انه فى نفس الخروجة كل ده هيزود تعلقك و حزنك اكتر.

6 – بلاش مراقبة

كلنا بنلجأ للحيلة دى لما الشخص يوحشنا او نحب نعرف اخباره بنفتح الفيسبوك و التويتر و كل مكان نقدر نوصله فيه و نفضل بالساعات نراقب كل كلمة و نعيط بعدها . انتى كده مش هتستفيدى حاجة غير تضيع الوقت و تطويل فترة النسيانة  . شيلى الشخص ده من كل مواقع التواصل الاجتماعى و ابعدى كمان لو قدرتى عن اصحابه .

7 – ارمى كل حاجة

ابعدى عن اى حاجة ممكن تفكرك بالشخص ده . صور او هدايا او اغانى كل دى اعتبريها ممنوعات عشان قلبك يخف و يرتاح لان الذكريات دى انتى مش محتجاها فى حياتك خلاص.

8 –  بلاش علاقات جديدة

متسمعيش كلام الناس انك لازم تقابلى ناس جديدة او ترتبطى بأول عريس يتقدملك عشان تنسى حبك القديم الكلام ده مش صح خالص و هيرجعك تانى لأول خطوة انك مفتقداه و نفسك ترجعى كل حاجة كانت بينكم حتى لو انتى عارفه انها مش صح لانك طبيعى مش هتحسى بنفس الراحة مع الشخص الجديد بسرعة كده . ادى لنفسك وقت على قد ما تقدرى و لما تهدى خلاص ابدأى تانى اتعرفى على ناس و افرحى.

9 – حبى نفسك

لازم تحبى نفسك و شكلك و  متفقديش ثقتك بنفسك ابدا و لا فى قراراتك و خليكى دايما واثقة فى تفكيرك و انك عملتى الحاجة الصح المناسبة ليكى و انك هتقفلى كل الابواب انك ترجعى لأنك تقدرى تكونى لوحدك و انتى انسانة قوية و عارفة انك تتحبى . لما بنحب نفسنا بنقدر نجذب لينا الناس تانى انها تحبنا من جديد و نكمل حياتنا معاهم بعيد عن اى حزن او وجع قلب.

نصيحة اخيرة من بنات حوا سيبى نفسك للوقت لان ده الحاجة الاساسية اللى هتخليكى تنسى مهما كنتى زعلانة لأن مفيش حد بيفضل زعلان علاطول