اجمل الاماكن لقضاء شهر العسل في مصر

أنجي سليمان
أنجي سليمان
6106

من الخطوات المهمة لما بنحضر للزفاف وتجهيزات الجواز هي اختيار مكان قضاء شهر العسل وبالرغم من ان في ناس كتير بيحبوا يسافروا خارج مصر لكن في ناس اكتر بيحبوا يسافروا في مكان قريب جوه مصر وبيدوروا على اماكن للاستجمام وعشان اغلب الناس بيفكروا في شرم الشيخ او الغردقة وما يعرفوش غيرهم فبنات حوا النهاردة جمعتلكم اجمل الاماكن لقضاء شهر العسل في مصر غير الاتنين دول عشان لو لسه بتختاري مكان للسفر في شهر العسل نلفت نظرك لاماكن جديدة ومميزة

اجمل الاماكن لقضاء شهر العسل في مصر

1- سهل حشيش

بيقع جنوب الغردقة على بعد حوالي 20 كيلو، وله شاطيء مميز جدا وفيه مجموعة كبيرة من الاماكن والقرى السياحية الفخمة والمطاعم غير انه بيقع على بعد حوالي عشر دقايق مشي من اكبر مول تجاري في الغردقة، وسهل حشيش من الاماكن المميزة لقضاء شهر العسل عشان هو مش زحمة وبيدي فرصه كبيرة للاستجمام في الهدوء بجوار البحر والهواء النقي، وبالرغم من كل المميزات الا ان قضاء اسبوع في سهل حشيش مش مكلف لأن سعر الليلة متوسط ومش غالي

اجمل الاماكن لقضاء شهر العسل في مصر 1
اجمل الاماكن لقضاء شهر العسل في مصر 1

2- الجونة

بيقع برضه على ساحل البحر الاحمر لكن شمال الغردقة بيبعد حوالي 20 كيلو عن مطار الغردقة الدولي، وبيتميز بكثرة الخلجان على الشاطيء واللي بتخلي تقريبا لكل فيلا او وحدة سكنية مطل مميز وخاص جدا على الماية بيخليها كأنها شاطيء خاص، وطبعا غير المميزات اللي بيقدمها المنتجعات هناك زي السبا والمطاعم الفاخرة والالعاب المائية ورياضة الغطس وغيرها، والاسعار متوسطة الى عالية على حسب القرب من الشاطيء لكن بشكل عام المكان مميز جدا من ناحية الهدوء والخصوصية

اجمل الاماكن لقضاء شهر العسل في مصر 2
اجمل الاماكن لقضاء شهر العسل في مصر 2

3- مرسى علم

مدينة كبيرة بتقع على البحر الاحمر لكن في الجنوب خالص تقريبا على بعد 280 كم من الغردقة، والمدينة شهدت تطور كبير من ناحية تمهيدها وتجهيزها عشان تبق مدينة سياحية مميزة، اشهر حاجة في المدينة هي رياضة الغطس لأن البحر مليان بالاسماك النادرة والشعاب المرجانية المختلفة اللي بتخلي من فكرة الغطس هناك متعة حقيقية، وكمان في مجموعة كبيرة من القرى السياحية والمنتجعات اللي بتقدم خدمات ترفيهية مميزة وبتخلي من زيارة المكان متعة حقيقة وتجربة جميلة للراحة والاستجمام، بالنسبة للاسعار فهي على حسب الموسم السياحي وبتختلف من قرية للتانية لكن بشكل عام الاساعار متوسطة الى عالية

اجمل الاماكن لقضاء شهر العسل في مصر 3
اجمل الاماكن لقضاء شهر العسل في مصر 3

4- راس سدر

بتقع على خليج السويس وراس سدر مدينة كبيرة فيها عدد كبير من القرى السياحية اللي بتطل مباشرة على مياة الخليج وده بيخلي البحر نضيف جدا وخالي من الامواج وبيخلق جو رائع من الاستجمام والمتعة، في انواع كتيرة من الرياضات المائية وبتختلف الخدمات اللي بتقدمها القرى السياحية على حسب المنتجع او القرية وكذلك بتختلف الاسعار على حسب شهرة القرية ومساحتها وقرب الوحدة او الفيلا من شاطيء البحر، وجدير بالذكر ان مدينة رأس سدر بتقابل العين السخنة من ناحية سيناء بيفصل بينهم نفق الشهيد احمد حمدي يعني المسافة من القاهرة مش بعيدة اوي

اجمل الاماكن لقضاء شهر العسل في مصر 4
اجمل الاماكن لقضاء شهر العسل في مصر 4

5- دهب

وعلى الناحية الاخرى يعني على خليج العقبة بتقع مدينة دهب وهي مدينة مميزة جدا من حيث جمال الطبيعة والبساطة اللي بتميزها، دهب بتتميز بالجبال اللي بتجاور الماية مباشرة ولون المياة النقي الجذاب، وكمان فيها رياضة الغطس منتشرة جدا لأن الشعاب المرجانية وقاع البحر هناك مليان بمخلوقات وكائنات رائعة، وبيميز دهب الرحلات على الجمال لأماكن زي البلو هول وهي مغارة جوة الماية جذابة جدا لهواة الغطس او ممكن تتشاف بالمراكب ذات القاع الزجاجي، وفي كمان محميات طبيعية زي محمية نبق ومحمية ابو جالوم والاتنين فيهم مجموعة نادرة من الكائنات البحرية والبرية ده غير المناظر الطبيعية الجذابة جدا، وفي دهب كمان سوق سياحي صغير ممتع وشارع للمشاه فيه العديد من المحلات الصغيرة اللي بتبيع هدايا تذكاريه جميلة، اما اكبر مميزات دهب فهي الاسعار المنخفضة بالرغم من كل المميزات الجمالية اللي في المكان

اجمل الاماكن لقضاء شهر العسل في مصر 5
اجمل الاماكن لقضاء شهر العسل في مصر 5

6- الساحل الشمالي

ولو كان كل اللي فات مش من اهتمامتكم او ماكونتوش من عشاق الهدوء الزايد يبقى ممكن نلفت نظركم للساحل الشمالي، طبعا هو بيكون مناسب في فترة الصيف بس غير الاماكن السابقة اللي مناخها مناسب في الصيف والشتا، والساحل الشمالي مليء بالقرى السياحية والمنتجعات وبيمتد بطول كبير جدا على شاطيء البحر المتوسط، والمتعة الرئيسية هي الاستمتاع بالبحر وحامات السباحة ده غير القرى اللي بتقدم حفلات لمطربين وفنانين مشهورين وخدمات المطاعم والكافيهات المشهورة، والمميز في الساحل الشمالي هو الجو الصاخب واماكن السهر والحفلات، اما بالنسبة للاسعار فهي بتختلف من قرية لأخرى يعني قرى زي بورتو مارينا ومارينا وعايدة وستيلا دي ماري وغيرها من القرى الفاخرة جدا بتعتبر من اغلى قرى الساحل الشمالي لكن في عشرات القرى اللي  بتتميز باسعارها المتوسطة وتقديم خدمات جيدة ومريحة

اجمل الاماكن لقضاء شهر العسل في مصر 6
اجمل الاماكن لقضاء شهر العسل في مصر 6

7- سيدي عبد الرحمن

بتقع على الساحل الشمالي بالقرب من مطروح وبتعتبر المنطقة دي من اجمل شواطيء الساحل الشمالي لأنها بتطل على خليج وبتكون المياة فيها اهدا واجمل من الشواطيء العادية، والمميز في منطقة سيدي عبد الرحمن انها مش مزدحمة زي مطروح او زي القرى اللي قبلها على الساحل الشمالي، وفيها قرى سياحية متنوعة وفندق سياحي وبتقدم خدمات مختلفة زي حمامات السباحة والمنتجعات الصحية والمطاعم المميزة وغيرها وبتعتبر مكان مميز لقضاء شهر العسل لأنها  بتتسم بالهدوء ومنظر البحر والرمال البيضاء اللي بيدي فرصة للاستجمام والراحة النفسية وبتختلف الاسعار على حسب المكان لكنها عالية الى متوسطة

اجمل الاماكن لقضاء شهر العسل في مصر 7
اجمل الاماكن لقضاء شهر العسل في مصر 7

8- رأس الحكمة

بيقع في نطاق محافظة مطروح وهو خليج بيتميز بالماية الهادية من غير الامواج العالية، وبيعتبر من اكتر الاماكن المميزة على الساحل الشمالي لأنه بيتمتع بهدوء جميل وبيبعث على الراحة والاستجمام، وفي مجموعة كبيرة من القرى والشاليهات بتقع في المنطقة دي ومعروف عنها انخفاض الاسعار بالرغم من تميز المكان من ناحية نضافة المياة وجودتها

اجمل الاماكن لقضاء شهر العسل في مصر 8
اجمل الاماكن لقضاء شهر العسل في مصر 8

مقالات متعلقه

حكاية وتاريخ فانوس رمضان

حكاية وتاريخ فانوس رمضان

برامج ومسلسلات راديو نجوم اف ام في رمضان 2024

برامج ومسلسلات راديو نجوم اف ام في رمضان 2024

برامج ومسلسلات الراديو 9090 في رمضان 2024

برامج ومسلسلات الراديو 9090 في رمضان 2024