افكار دبل خطوبة وشبكة لعروسة 2015
فرحة شرا الشبكة والدبل من اللحظات اللي ما تتنسيش طول العمر لأن فرحتها زي شراء فستان الفرح وتجهيزات البيت ويمكن كمان تكون اكتر لأنها اول فرحة بتبقى قبل الزفاف، والدبلة من الحاجات اللي البنت بتحلم بيها وبشكلها لفترات طويلة قبل ما تتخطب، وبما ان بنات حوا دايما بتشارككم مناسباتكم السعيدة ولحظاتكم الحلوة فإحنا جبنالك مجموعة من الافكار اللي حتساعدك في اختيار دبل خطوبة وشبكة مميزين وعلى موضه 2015
افكار دبل خطوبة وشبكة جديدة ومميزة
اولا الدبل
الدبل السنة دي بعدت هالص عن شكلها التقليدي السادة والمبروم ودخلت فيها اشكال مميزة واحيانا الوان كمان لكنها في النهايو لسه محتفظة بشكلها المختلف عن الخاتم العادي شوفي كده الافكار دي
الدبلة الصامولة
بتبقى شكلها سداسي او مثمن مش مبوم او مبطط عادي، بس لازم تجربيها على ايدك الاول لأنها بتحتاج ايد متوسطة مش بتليق اوي مع الايد الرفيعة ولا الايد المليانة لكن بتليق اكتر مع الصوابع الطويلة والمتوسطة الحجم
الدبلة المرصعة
بتبقى دبلة رقيقة بس فيها فص صغير او اكتر من فص بيبقى شكلها جميل ورقيق جدا لكن لازم برضه تكوني مقتنعة بيها لأن في كتير بيشوفوا أنها قريبة للخواتم
الدبل الملونة
ودي بيبقى داخل فيها اكتر من لون من الدهب زي الابيض والاحمر او الاصفر الغامق مع الاصفر الفاتح، والدبل دي بتبقى رقيقة جدا وفي نفس الوقت شكلها يلفت النظر
الدبل المحفورة
وبيبقى مرسوم عليها رسم بالحفر لورود او خطوط او اشكال هندسية وفكرتها زي الدبل الملونة أنها تبعد عن الشكل التقليدي للدبلة وفي نفس الوقت ماتبقاش شبه الخاتم
الدبل المشغولة
ودي بتبقى الدبلة نفسها مشغولة عبارة عن مجموعة من القلوب مثلا مشبوكة في بعد او شكل الحلقات المتركبة في بعض، وشكلها بيبقى حلو ومميز اوي بس برضه كتير بيفتكروها خاتم مش دبلة
دبلة مع الاسماء
بتبقى دبلة دهب او فضة برضه بس اسم العروسة او العريس محفور عليها من بره بدل ما يكون محفور من جوة وبيكون شكلها حلو وجديد
ثانيا الشبكات
فالسنة دي رجع تاني الذهب اكتر من الالماظ والسوليتير اللي كان منتشر السنين اللي فاتت، والموضة رجعت للاطقم الماركات زي داماس ولازوردي، وفكرة الالماظ برضه لسه موجودة بس بأشكال جديدة
اطقم الدهب الكاجوال
زي داماس ولازوردي وهي مختلفة شوية عن الاطقم الكلاسيكية المعتادة بتتكون من خاتم واسورة وحلق وسلسلة لكن التصميم بتاعها بقت افكاره مختلفة في الاشكال والالوان عن زمان
الالماظ
الالماظ مبقاش مجرد توينز عادي بقى توينز بيمكمل بعضه يعني جزء من الخاتم بيدخل في جزء من المحبس او العكس
وفي افكار تانية كمان زي الخاتم والحلق بدل المحبس
او اسورة الماظ بدل التوينز
ولو كنتي اخترتي شبكتك او مخطوبة من قريب شاركينا صور شبكتك ودبلتك
